06 October 2024

ကွတ်ခိုင်မြို့နယ်တွင် စစ်ကောင်စီထောင်ထားသည့် မြေမြှုပ်မိုင်းအားနင်းမိပြီး ကျွဲရှာသည့်အမျိုးသားတစ်ဦး  ခြေထောက်တစ်ဖက်ပြတ်ထွက်ဒဏ်ရာရ

ကွတ်ခိုင်၊ အောက်တိုဘာလ (၆) ရက်
တအာင်းပြည်သတင်း

တအာင်းပြည် တပ်မဟာ(၅)နယ်မြေ၊ ကွတ်ခိုင်မြို့နယ် လွယ်ဆိုင်ကျေးရွာတွင်နေထိုင်သည့် အမျိုးသားတစ်ဦးသည် စစ်ကောင်စီထောင်ထားသည့် မြေမြှုပ်မိုင်းတစ်လုံးကို နင်းမိပြီး ပေါက်ကွဲကာ ​၎င်း၏ခြေထောက်တစ်ဖက်ပြတ်ထွက်သွားခဲ့သည်။

ဖြစ်စဥ်မှာ အောက်တိုဘာလ (၃)ရက် နေ့လည်(၂း၅၀)အချိန်တွင် မိုင်းအိုက်ကျင် အသက်(၂၅) နှစ်သည် ၎င်း၏ကျွဲများအား လိုက်ရှာနေစဥ် စစ်ကောင်စီထောင်ထားသည့်မိုင်းတစ်လုံးကို နင်းမိပြီး ပေါက်ကွဲခဲ့ခြင်းဖြစ်သည်။ ထိုနေရာသည် ယခင်စစ်ကောင်စီ၏အမြောက်တပ် တပ်စွဲထားသည့်နေရာဖြစ်သည်။

ထိုမိုင်းပေါက်ကွဲမှုကြောင့် မိုင်းအိုက်ကျင်၏ ညာခြေထောက်တစ်ဖက် ပြတ်ထွက်သွားခဲ့ပြီး ၎င်း၏ ဘယ်ခြေထောက်၊ လက်နှင့် ခန္ဓာကိုယ်တို့တွင်လည်း မိုင်းစအများအပြားထိမှန်ဒဏ်ရာရရှိခဲ့သည်။

ဒဏ်ရာရရှိခဲ့သူအား ကွတ်ခိုင်မြို့ PSLF/TNLA အုပ်ချုပ်ရေးတာဝန်ရှိသူများနှင့် တရားဥပဒေစိုးမိုးရေးအဖွဲ့တို့ သွားရောက်ကြည့်ရှု့စစ်ဆေးကာ ကွတ်ခိုင်ပြည်သူဆေးရုံသို့ ပို့ဆောင်ဆေးဝါးကုသပေးခဲ့သည်။

လွန်ခဲ့သည့် စက်တင်ဘာလ (၆)ရက်နေ့ကလည်း ကွတ်ခိုင်မြို့ အမှတ်တရကျောက်တိုင်အနီး ပျားသွားဖွတ်သည့် အမျိုးသားတစ်ဦးသည် စစ်ကောင်စီထောင်ထားသည့် မြေမြှုပ်မိုင်းကို နင်းမိခဲ့သည်။

ထိုနေရာတွင် စစ်ကောင်စီထောင်ထားသည့် မြေမြုပ်မိုင်းများ ကျန်ရှိနေသောကြောင့် ပလောင်ပြည်နယ်လွတ်မြောက်ရေးတပ်ဦး PSLF/TNLA တာဝန်ရှိသူများသည် အဝင်အထွက်မပြုလုပ်ရန် ကန့်သတ်ထားသည်။

#PSLF/TNLA
#သတင်းနှင့်ပြန်ကြားရေးဌာန

အမည်မဖော်ပြပါ

အမည်ဖော်ပြမည်

မှတ်ချက်ပြုမည်

မှတ်ချက်များ

သင်၏ ထင်မြင်ချက်