ကွန်စလမ်းကျေးရွာ ဘုန်းကြီးကျောင်းကို ဦးတည်၍ စစ်ကောင်စီတပ်မှ လေကြောင်းဖြင့် ဗုံးလာရောက်ကြဲချတိုက်ခိုက်မှုကြောင့် ကလေးငယ် (၁)ဦးသေဆုံး၊ သံဃာတော်အပါအဝင် ပြည်သူလူထု (၇)ဦးထိခိုက်ဒဏ်ရာရ
23 August 2025
ကွန်စလမ်းကျေးရွာ ဘုန်းကြီးကျောင်းကို ဦးတည်၍ စစ်ကောင်စီတပ်မှ လေကြောင်းဖြင့် ဗုံးလာရောက်ကြဲချတိုက်ခိုက်မှုကြောင့် ကလေးငယ် (၁)ဦးသေဆုံး၊ သံဃာတော်အပါအဝင် ပြည်သူလူထု (၇)ဦးထိခိုက်ဒဏ်ရာရ
မိုင်းငေါ့၊ သြဂုတ် ၂၃ရက်
တအာင်းပြည်သတင်း
တအာင်းပြည်၊ တပ်မဟာ (၁)နယ်မြေ၊ မိုင်းငေါ့မြို့နယ်၊ ကွန်စလမ်းကျေးရွာတွင် စစ်ကောင်စီတပ်မှ လေကြောင်းဖြင့် ဗုံးလာရောက်ကြဲချတိုက်ခိုက်မှုကြောင့် ကလေးငယ် (၁)ဦး သေဆုံးခဲ့ပြီး သံဃာတော်အပါအဝင် ပြည်သူလူထု (၇)ဦးဒဏ်ရာရရှိခဲ့ပါသည်။
ဖြစ်စဥ်တွင် ယနေ့ ညနေ (၃း၄၀)နာရီအချိန်၌ စစ်ကောင်စီတပ်မှ ဂျက်ဖိုက်တာဖြင့် ပေါင်(၂၅၀)ဗုံး (၂)လုံးဖြင့် ကွန်စလမ်းကျေးရွာ ဘုန်းကြီးကျောင်းကို ဦးတည်၍ လာရောက်ကြဲချတိုက်ခိုက်မှုကြောင့် ကလေးငယ် (၁)ဦးသေဆုံးခဲ့ပြီး သံဃာတော် (၂)ပါး ၊ သံမဏေ (၁)ပါး၊ အမျိုးသမီး (၂)ဦးနှင့် အမျိုးသား (၂)ဦးတို့အပါအဝင် စုစုပေါင်း (၇)ဦး ထိမှန်ဒဏ်ရာရရှိပါသည်။
ထိုအပြင် ဘုန်းကြီးကျောင်းအတွင်းရှိ ဘုရားခန်း (၁)ခန်း၊ ဆွမ်းစားဆောင် (၁)ဆောင်၊ ဇရပ် (၂)ခု၊ ကျေးရွာဆေးပေးခန်း (၁)ခန်းနှင့် နေအိမ် (၁၂)အိမ်တို့လည်း ဗုံးစထိမှန်ပျက်စီးသွားခဲ့သည်။
အလားတူ စစ်ကောင်စီတပ်သည် ယခုလအတွင်း လေကြောင်းဖြင့် မိုးကုတ်မြို့တွင် (၄)ကြိမ်၊ ကျောက်မဲမြို့နယ်တွင် (၂)ကြိမ်၊ သီပေါမြို့တွင် (၃)ကြိမ်ဖြင့် ဗုံးများကြဲချမှုကြောင့် ကလေး (၃)ဦး၊ သံဃာတော် (၂)ပါး၊ အမျိုးသမီး (၁၇)ဦးနှင့် အမျိုးသား (၁၆)ဦးတို့ သေးဆုံးခဲ့ရပြီး သံဃာတော် (၁)ပါး၊ အမျိုးသမီး (၁၁)ဦးနှင့် အမျိုးသား (၂၁)ဦးထိခိုက်ဒဏ်ရာရှိ ကာ နေအိမ် (၆၂)အိမ်၊ အဆောက်အဦး (၁)လုံး၊ စာသင်ကျောင်း (၁)ကျောင်း၊ ကား (၄)စီး၊ ဆိုင်ကယ် (၃)စီးတို့လည်း ထိမှန်ပျက်စီးခဲ့ပါသည်။
ထိုကြောင့် မိဘပြည်သူများအနေဖြင့် စစ်ကောင်စီ၏ ဗုံးကြဲတိုက်ခိုက်မှုများ ရှောင်ရှားနိုင်ရန် စစ်ရေးသတိအမြဲ ရှိရန်လိုအပ်ပြီးလေကြောင်းရန်မှကာကွယ်နိုင်ရန် လေကြောင်းရန်ကာကွယ် ရေးဆိုင်ရာနည်းလမ်းများ လိုက်နာဆောင်ရွက်ရန်လိုအပ်ပါသည်။
#PSLF/TNLA
#သတင်းနှင့်ပြန်ကြားရေးဌာန
မှတ်ချက်များ