03 November 2026

ပ်ုန်ရေဲန်ပ္လေါည်ကခံပ်ကယည် ကခေ့ကတားပ္လေခုင် ပလှံင်အေဲမ်ခြီရ် PSLF/TNLA တာမ်တားတီုင်အွံရ်(1) တာမ်ခူန်ချုဒါင်း ဇိုက်ဇာရ် ဟိုက်ရောတ်လှိုပ်ဂုင်ချဒဲႈဆု

အေဲမ်ခြီရ်၊ ကျံရ်အူကိူရ် ဆငည်း(29)

ဆဒါင်ကုင်တအာင်း

ကုင်တအာင်း၊ ပလှံင်အေဲမ်ခြီရ်၊ ခေဲင်ခနားဇံင်ကဲ ပ်ုန်ကယေင်မောကံပ်ကောန်တဘိုက်ဂဲ မိူဝ်ႈနောႈဖိူမ်ကခေ့ကတားနှာမ်မှည်၊ ဘည်လိုမိူဝ်ႈတာင်ကမေဲႈလည်မီုတ်ကာည်း ရေဲန်ဟာဝ်း မောကံပ်အရေးခံင်ယိူည်ႇယောမ်ဟာဝ်း ခနားဇိုဇာတ်ကောန်တဘိုက်ဂဲ ရေဲန်ကခံပ်ကယည်ဘိပ္လေါည်ကခေ့ကတားပ္လေခုင်ကာည်း ပ္လေါည်ဒဲႈဆု တဇံင်စုင်အီလီပ်ကခေ့ကတားဂဲ ကျံရ်အူကိူရ် ဆငည်း(25)ဒိူန် PSLF/TNLA တာမ်တားတီုင်အွံရ်(1) တာမ်ခူန်ချုဒါင်း ဇိုက်ဇာရ် ဟိုက်ရောတ်လှိုပ်ဂုင်ချဒဲႈဆု တစူမ်အီဘိူန်းဆုဂဲအောႏ။

ပ္လေါည်ကခေ့ကတားပ္လေခုင်နီန် ရေဲန်ဟာဝ်း ခည်မိုႈ ကျံရ်အူကိူရ် ဆငည်း(12)ဒိူန်  ခေဲင်လှံင်အေဲမ်ခြီရ် ဇံင်(14)ဇံင် ကကာႈပဲန်အုပ်စု (4)အုပ်စု ရေဲန်ဟာဝ်းပ္လေါည်ကခေ့ကတား လှေင်(14)ဆငည်း၊ အီဘိူန်းဆုအူမိုႈ စူမ်ဇံင်ကောင်တံပ်၊ အီဘိူန်းဆုအာရ်မိုႈ စူမ်ဇံင်ပေါက်တိုက်(တည့်)ကာည်း အီဘိူန်းဆုအိုည်မိုႈ စူမ်ဇံင်မာန်ခံမ်ကဲအောႏ။ အာပ်ချဒဲႈဟာဝ်းဘိုး ဆုတအီကျကညာဂိုး၊ ဆုအီကျနှာဘံန်း၊ ဆုအီကျကဒည်၊ ဆုအီကျနှာအာည်ႇ၊ တအီကျဇိုချီုင်လီပ်ကခေ့ကတားကာည်း ဆုစူမ်အီဆပဲဆငါးဂဲအောႏ။ ဒါႇခူဒီန် အာပ်ချဒဲႈဟာဝ်းဘိုး ဆုပ္လါႇဘေဲႇလှိုပ်ဂုင်ကာည်း ဆုရိူန်း တအီကဇောည်ထာ့်ဒဲႈ ဇိုချီုင်ရေဲန်ပ္လေါည်ကခေ့ကတား ဖုင်ပရဟိတဂဲကာည်း အီတိူရ်ႈမေန်ဒဲႈ စူမ်ဒဴင်ဂဲအောႏ။

ကခံပ်ကယည်ပ္လေါည်ချဒဲႈဆုနီန် PSLF/TNLA တာမ်တားတီုင်အွံရ်(1) တာမ်ခူန်ချုဒါင်း ဇိုက်ဇာရ် ဟိုက်ရောတ်လှိုပ်ဂုင်က္လာင်းကြောႈတံမ်း အာပ်ချဒဲႈဆု တအီဘိူန်းဆုဂဲ။ ဆုပ်ုန်အာပ်ချဒဲႈကဲဒီန်မိုႈ ဆုအူ ရိူန်း(40)ဆဲန်ဘျာ၊ ဆုအာရ် ရိူန်း(30)ဆဲန်ဘျာ ကာည်း ဆုအိုည် ရိူန်း(20)ဆဲန်ဘျာ။

ဆဲႈဒီန် ဆုအီကံတ်ကျကညာဂိုးကာည်း ဆုအီပ္လီပ်ဂီုန်းဂိုး ကနာည်ချှူပ်ခြီရ် အူအီး (3)ဆဲန်ဘျာ၊ ကနာည်စူမ်အီဆပဲဆငါး ရိူန်း(5)ဆဲန်ဘျာ၊ ဆုကနာည်အီကျနှာဘံန်း၊ အီကျကဒည်ကာည်း အီကျနှာအာည်ႇဂဲ ချဒဲႈအူအီး(3)ဆဲန်ဘျာ။ မိုႈဘိုး အာပ်ချဒဲႈဟာဝ်းဘိုး တအီလီပ်ကဇောည်ထာ့်ဒဲႈ  ဖုင်ကာ်မ်မတီဒဴင်ဂဲကာည်း ဖုင်ပရဟိတဂဲ အူဖုင်(10)ဆဲန်ဘျာအောႏ။

ပ္လေါည်ကခေ့ကတားဒီန် ခေဲင်လှံင်အေဲမ်ခြီရ် ဇံင်(14)ဇံင်၊ ပ္လကကာႈပဲန်အုပ်စု(4)အုပ်စု၊ အုပ်စုအူမိုႈ ပေါက်နေ၊ ပေါက်တိုက်(ပေါက်တည့်)၊ နောင်ဆန့်ကာည်း ဇံင်ကောင်တံပ်၊ အုပ်စုအာရ်မိုႈ အံင်မင်္ဂလာ၊ ဝေင်ဆာ၊ ဟိုကံတ်ကာည်း ဇံင်သာယာကိုင်း၊ အုပ်စုအိုည်မိုႈ မိုးခံမ်၊ ဇံင်းက္လာႈ ကာည်း ဇံင်မာန်နား၊ အုပ်စုဖိုန်မိုႈ မာန်စာမ်၊ အံင်ချှံန်သာကာည်း ဇံင်ကောင်နောင်မိုကဲ လီပ်ကခေ့ကတား။

ကခံပ်ကယည်ပ္လေါည်ဘိကခေ့ကတားပ္လေခုင်ကာည်း ချဒဲႈဆုနီန် PSLF/TNLA တာမ်တားတီုင်အွံရ်(1) တာမ်ခူန်ချုဒါင်း ဇိုက်ဇာရ်၊ ဂေါပ်တားချှာင်ဇီုင်းကာန်တောန်နဲ(1) ခူန်အွံရ်ချု အိုမ်တမာဝ်း၊ ဖုင်ဘေဲႇဘာန်းကာည်း ထုင်မှိူမ်ဆျံမ်၊ ဖုင်ဘေဲႇဘာန်းကာည်း ထုင်မှိူမ်ခါင်၊ ဖုင်ဘေဲႇဘာန်းကာည်း ထုင်မှိူမ်လီဆူ၊ ဖုင်ဘေဲႇဘာန်းကာည်း ထုင်မှိူမ်ခိုလိုင်လီရှော၊ ဖုင်ကနိုက်နှာမ်မှည်ဂဲကာည်း ကူန်ရဝ်မာဂါင်ဂဲ ကစုကပိုမ်(2,000)အီး ဟိုက်ရောတ်ဒေဲႈအောႏ။

ဘည်ကယေင်ရေဲန်ဟာဝ်း ပ္လေါည်ကခေ့ကတားနီန်မိုႈ ပဇာရ်ဒဲႈကောန်တဘိုက်ဂဲ  မိူဝ်ႈလံပ်ရဲင်ခေဲင်ခေါခါႇတိုပိုင်းကာည်း ရဲင်ဘ္လောမ်နောႈဖိူမ်၊ ရေဲန်ဒဲႈဟာဝ်း မောကံပ်ဇိုဇာတ်ကောန်တဘိုက်ဂဲ အာဝ်မိူဝ်ႈ ဒါလောင်အရေးခံင်ယိူည်ႇ ကာည်း ဇူႈတကနိုက်နှာမ်မှည်နီန် မောကံပ်ကောန်တဘိုက်ဂဲ မိူဝ်ႈနောႈဆိင်ကဖြောမ်ကရောမ်၊ မိူဝ်ႈတာင်ကမေဲႈလည်ကမီုတ်ခနားဂဲအောႏ။

Website Official

www.taangland.org

Telegram Official Channel

https://t.me/pslftnlanews

Telegram Link – Ta’ang TV

https://t.me/pslftnlaTaangTV

YouTube Official

https://www.youtube.com/@pslftnlanews

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း