တက္ကသိုလ်ကုင်တအာင်း-TLU နံင်လာက်ခါမ်ဟာဝ်း ကနာည်ဆန်ုမ်ပနောဘေဲႇ 2027
03 November 2026
တက္ကသိုလ်ကုင်တအာင်း-TLU နံင်လာက်ခါမ်ဟာဝ်း ကနာည်ဆန်ုမ်ပနောဘေဲႇ 2027
အိုမ်ယ်ုရ်၊ ကျံရ်အူကိူရ် ဆငည်း(29)
ဆဒါင်ကုင်တအာင်း
ကုင်တအာင်း၊ တက္ကသိုလ်ကုင်တအာင်း(Ta’ang Land University - TLU) ပ္လိူရ်ႈလေႈဒါႈ ဇူႈကျံရ်ကိူရ်အူ ဆငည်း(15)ရောတ် ကျံရ်ကိူရ်အာရ် ဆငည်း(31) နံင်လာက်ခါမ်ဟာဝ်း ကောန်ကျောင်ကနာည်ဆန်ုမ်ပနောဘေဲႇ 2027 အောႏ။
ဆန်ုမ်ပနောဘေဲႇနီန် ကောန်ကျောင်အီဘိူန်းအာပ်ဟြာင်းဟိုက် အ်ုန်လိုမိုႈအီအံင်တာန်းဘေဲႇ ဆနီတ်ပြီမ် Grade (10)၊ ဆနီတ်ကမာည်း Grade (12) ကာည်း အီလီပ်ဆံင်ခံတ်အာဏာဆီုက်ဘြာန် ရေဲန် (Civil Disobedience Movement – CDM)။
ကဆီုဝ်အီနံင်အာပ်ဟြာင်းဟိုက်ကျောင် လိုရေဲန်အူန်းချှာဘေဲႇစြာင်းအံင် (ဆာ်အာဝ်မိုႈ) လာက်မှာတ်ပ်ုန်ဟောည်ႇအံင်ကျောင်၊ ချှာဘေဲႇကတ်ဟိုက်ကျောင်၊ တာန်းဘေဲႇပ်ုန်အံင်ဒေဲႈရဘံန်းဆူတ်ကာည်း အချှာက်အီဆီုဝ်ကဆဲင် တႎါင်ပနော၊ ပ်ုန်ဒါႈ မိုႈ ရေဲန်CDM ကာည်း ပ္လါႇဘေဲႇပ်ုန်ထာ့်ခါမ်တိုအီးဒါင်းကဲနီန်။ ဆဲႈဒါႇဒီန် ကဲပ္လိူရ်ႈနှဲအူန်းဒါႈ လိုဟြာင်းဟိုက်ကနံဝ်တိုအခွါင်းလီပ်ကျောင် ခေဲင်ဇိုချီုင်ဘည်ပ္လအူန်း၊ လိုဆွံင်ဒဲႈဟာဝ်းငေါႈခံန်ရိူန်း ပ်ုန်လိုကာည်း ငေါႈခံန်ႎါင်ပနော။
ကောန်ကျောင်ဂဲ အီမိုႈဘာသာဒါင်း (2)လှေ ဘာသာဝိဇ္ဇာကာည်း ဘာသာသိပ္ပံနီန် ဘိူန်းဟြာင်းဟိုက် ခေဲင်ဘာသာဝိဇ္ဇာနီန် အ်ုန်တောပ် မြန်မာ(မျံမ်မာ)၊ အင်္ဂလိပ်၊ ဒဿနိကဗေဒ၊ ဘာသာတအာင်း ခေဲင်ဘာသာသိပ္ပံနီန် အ်ုန်လိုတောပ် ဘာသာသင်္ချာ။
ဆာ်မိုႈ အခိင်ဆန်ုမ်ပနောဘေဲႇ နံင်လှေင်အူဆန်ုမ်၊ နံင်ကကာႈပနောဒဲႈဟာဝ်း ပဲန် (Semester)(2)လှေ။ ႎါင်ပနောနီန် နံင်ဇူႈဆငည်းရႎါည်း ရောတ် ဆငည်းမံက် ဇူႈအခိင်စူပ်အံပ်(5)နြီ ရောတ်စာ်မ်း အခိင်ရမှိူဝ်(10)နြီ နံင်ပနောဒဲႈဟာဝ်း ဆနီတ်တေဲင်အောန်လဴင်(Zoom)၊ နံင်လိုမိူဝ်ႈ အီမေးလ်ရာင်ဒေကာည်း အကောင့် Telegram။ ကဲပ္လိူရ်ႈအူန်းဒါႈ ဘာသာပ်ုန်နံင်ပနောဟာဝ်း မိုႈ(Major) ပ်ုန်လာည်းရာ်ႈအူန်း ကောန်ကျောင်ဂဲကာည်း ဂေါည်တေဲင်ဘာည်းပနောဒဲႈ တာဆြာ/ယာဆြာဂဲ။
ကဆီုဝ်ခေါပ်ပြာႇပ်ုန်ပ္လအူန်းနီန် မောကံပ်မိူဝ်ႈ လံပ်ကတ်ုမ် တက္ကသိုလ်၊ တာဆြာ/ယာဆြာဂဲ၊ ကောန်ကျောင်ဂဲကာည်း အီထာမ်းဇီုင်းကပ္လိူင်ဂဲ လိုထိင်ခြဲ အချှာက်ဆဒါင် ခူဒဲႈအ်ုန်လေႈနှာရိူဝ်ႇ၊ လိုရေဲန်ဒဲႈအ်ုန်ဟောည်ႇ ဇီုင်းကပ္လိူင် အီကဆီုဝ်ကဆဲင် တႎါင်ပနော တောပ်ဘာည်းပ္လအူန်းဇိုချီုင်၊ ပ္လအူန်းဒါႈ အခိင်ဟိုက်ႎါင်ပနောနီန် ဒီဘြေ့အ်ုန် လိုမိုႈ(75%)၊ ဆာ်အာဝ်ဘယ်ဟိုက်ႎါင်ပနော လိုဟြာင်းမှာန်းအခွါင်း။ ဒါႇခူဒီန် ဆာ်နံင်ဇံင်းဒါႇ ပနောပိင်ငျာနီန် လိုဟြာင်းဟိုက် တာဆြာ/ယာဆြာဂဲကာည်း အီထာမ်းဇီုင်းကပ္လိူင် တက္ကသိုလ်ဂဲနံပ်ရအာည်ႇ။
ဆာ်ဟောည်ႇဟိုက်အံင်ဟာဝ်း ခေဲင်ဇိုချီုင်ပနောပိင်ငျာ တောပ်လိူည်ဘည်ပ္လအူန်းနီန် နံင်အာပ်ဒဲႈဟာဝ်း ဘွည်ႇဝိဇ္ဇာ (BA) ကာည်း ဘွည်ႇသိပ္ပံ (BSc) တောပ်လိူည်ဘာည်း ကဆီုဝ်ကဆဲင်အ်ုန်။ ကဆီုဝ်အီဟောည်ႇဟိုက်အံင်ဂဲ ဘိူန်းထာမ်းဇီုင်းကပ္လိူင် ခေဲင်ဇီုင်းကာန် တောပ်လိူည်ပ်ုန်ကျိူက်ပ်ုန်ဆိင်ရေဲန်အယ်။
ကဆီုဝ်အီနံင်အာပ်ဟြာင်းဟိုက်ကျောင်ဂဲ ဆာ်မိူဝ်ႈအချှာက်ပ်ုန်ဆိင်နံပ်အယ်စုင်စုင်နိုက်နိုက် ဘိူန်းအူန်းဆမွံတ်ဟာဝ်း တေဲင် Facebook Page အီမိုႈ TLUကာည်း ဘိူန်းအူန်းဒေဲႈတခေါရ်တိူရ်ႈရာင်ဒေ ပလူမ်တီုင်ဒါင်းတက္ကသိုလ်နီန်အောႏ။
Website Official
www.taangland.org
Telegram Official Channel
https://t.me/pslftnlanews
Telegram Link – Ta’ang TV
https://t.me/pslftnlaTaangTV
YouTube Official
https://www.youtube.com/@pslftnlanews
#PSLF/TNLA
#တီုင်ပ္လေႈလေႈဆဒါင်
Comment Lists