01 September 2026

ကနာည်ထိင်ခြဲပဇာရ် ဘေဲႇတအာင်း ကာည်း ထုင်မှိူမ်ဘေဲႇဘာန်း ရေဲန်ဟောည်ႇဟာဝ်းပါင်မိုန်ဒါင်း  ခေဲင်လှံင်အေဲမ်ခြီရ် 

အေဲမ်ခြီရ်၊ ကျံရ်တီမ်၊ ဆငည်း(1)

ဆဒါင်ကုင်တအာင်း

ကုင်တအာင်း၊ ခေဲင်လှံင်အေဲမ်ခြီရ် ကျံရ်တာရ်၊ ဆငည်း(28) ရောတ် ဆငည်း(29) တံပ်အွံရ်ပ်ုန်လောတ်ကပီုန်တအာင်းPSLF/TNLA ဖုင်ဘေဲႇတအာင်း-TLAဂဲ ဆော်အွံရ် ရေဲန်ဟောည်ႇဟာဝ်းပါင်မိုန်ဒါင်း ကနာည်ထိင်ခြဲပဇာရ် ဘေဲႇတအာင်း ကာည်း ထုင်မှိူမ်ဘေဲႇဘာန်း။

ခေဲင်ပါင်‌ပ္လေါည် ဆငည်းဘေဲႇတအာင်း ကရောပ်နိုက်(54)ဆန်ုမ်နီန် တံပ်အွံရ်ပ်ုန်လောတ်ကပီုန်တအာင်း- PSLF/TNLA တာမ်တားတီုင်အွံရ်(2) တာမ်ခူန်ချုဒါင်း ဇိုက်ဇာရ် က္လာင်းကြောႈတံမ်း ဒါႈ ခြိူဝ်းမျိုးတအာင်း လိုနံပ်ဘေဲႇတအာင်း ကာည်း လိုဆမားကြောႈတအာင်း။ ဘေဲႇတအာင်းနီန် ဆာ်အယ်ပနောအယ်နံပ် အယ်ဆာ်ဆမားကကျိူည်အီပဲန်ကာည်းအီကျ ထာန်မာ်ဘေဲႇတအာင်းနီန် မိူဝ်ႈတာန်းဖိုး ကာည်း ဘည်ဘ္လောမ်ဒဲႇအ်ုန်။ ဂေါႇဘည်ဒီန် ကဆီုဝ်ကောန်တဘိုတ်ယိူဝ်ႇဘာန်းဂဲ  လိုပနောဘေဲႇတအာင်း ကာည်း ထိင်ခြဲဟာဝ်း ထုင်မှိူမ်ဂြူခ်ြုမ်ကူန်မာအယ်ဂဲ။ ဆဲႈဒီန် ကောန်တဘိုတ်ဂဲအီယိူဝ်ႇဘာန်ဂဲ လိုကတိုရ်ႈတည်း ဒဲႈအ်ုန်ခေါႎှီတ် ထိင်ခြဲပဇာရ်ဟာဝ်း ခြိူဝ်းမျိုး ကာည်း ဖာဆာကြောႈကူန်မာ၊ ဘေဲႇအယ်တအာင်း။

ခေဲင်ရေဲန်ပ္လေါည်ဆငည်းဘေဲႇတအာင်း ကရောပ်နိုက်(54)ဆန်ုမ်နီး အီရောတ်ပေါဒေဲႈ ခေဲင်ပ္လေါည်နီး တံပ်အွံရ်ပ်ုန်လောတ်ကပီုန်တအာင်း- PSLF/TNLA တာမ်တားတီုင်အွံရ်(2) တာမ်ခူန်ချုဒါင်း ဇိုက်ဇာရ်၊ တားချှာင်ဇီုင်းကာန်တောန်နဲ ခူန်ချူ ဘုန်းကျော်၊ ဂေါပ်တားချှာင်ဇီုင်းကာန်တောန်နဲ(1) ခူန်အွံရ်ချူ အိုမ်တမာဝ်း၊ စဝ်ဒါင်းဘေဲႇတအာင်း၊ ကညားပိင်ငျာဘေဲႇတအာင်းဂဲ၊ ထုင်မှိူမ်တအာင်း၊ ဖုင်ကော်မတီ၊ ဖုင်ပါတီ၊ ဖုင်ကပါင်နှာရိူဝ်ႇ ကာည်း ဖုင်ဘေဲႇတအာင်း ခူန် / ႎါင်ခူန်၊ ဖုင်ကော်မတီထုင်မှိူမ် ကာည်း ဘေဲႇဘာန်းတအာင်း ကောန်တဘိုက်ကဲ ကာည်း ကူန်ရဝ်မာဂါင်ဂဲ ‌ဂေါည်(200)အီးဟိုက်ရောတ်ဒေဲႈ အောႏ။ 

ခေဲင်ပါင်မိုန်ဒါင်းဒီန် ဖုင်ဘေဲႇတအာင်းဂဲ ဘံန်ဟောည်ႇဒေဲႈ ခေဲင်(5)ဆန်ုမ်ဒီန် ဟြာင်းနှဲဟာဝ်း ဇီုင်းကာန်ထာန်ဘယ်ရေဲန် ကာည်း ထာန်ဘေဲႇတအာင်းအယ် ဘည်ဇည်းကလဲ့ကဒေါမ်တောန်ကဒါႇ။ ဆဲႈဒီန် ကမိုန်က္လာင်းဘို ဇီုင်းကာန်ဟာဝ်းနှာအာည်ႇ။

ဆဲႈဒီန် ကမိုန်ဒဲႈဟာဝ်းခံင်ကျခံင်လ တေဲင်ဇီုင်းကာန်ပ်ုန်ဟောည်ႇရေဲန် ဒီမိူဝ်ႈဘ္လောမ်ဘြေ့၊ ဘ္လောမ်ဒါင်း ႎီရ်ကကျိူည်ငိူပ်မေန်း ကစုဟာဝ်း ဘေဲႇ၊ ဘည်ပနော ကာည်း ဘည်ဒါတိုဘေဲႇ / ပိုင်ကြောႈအောႏ။ မိုႈဘို ကမိုန်ဟာဝ်းဘို ကနာည် ဘေဲႇတအာင်းကတာႈဒါင်းဇာရ် ကာည်း တောပ်ခေတ်ကာပ် ဘည်လိုဒါဒေင်နီးပိင်ငျာ။ ကမိုန်ဟာဝ်းဘို ဘည်ချ‌ပ္လေႈအူန်း UNESCOဒီန် ကနာည်နှာင်းပဲန်ဒါ  ဘေဲႇတအာင်း ကာည်း ခြိူဝ်းမျိုးတအာင်း။

ကဲအီဟိုက်ရောတ်ဒေဲႈ ခေဲင်ပါင်မိုန်ဒါင်းနီန်း ကမိုန်ဟြာင်းနှဲဟာဝ်း ဘည်ယိူဝ်းဆဖော၊ ပ်ုန်နံပ်ပ်ုန်ယိူဝ်း ကာည်း ပ်ုန်ကစုအူန်းဘေဲႇအီဂြိူမ်နီန် ဖုင်ဘေဲႇတအာင်း ကာည်း ထုင်မှိူမ်ဘေဲႇဘာန်းဂဲ ကနာည်ပဇာရ်ဟာဝ်း ဘေဲႇတအာင်းနီန် ဆဖောဟာဝ်းအောႏ။

ခေဲင်ကမိုန်ဒါင်းဘေဲႇတအာင်း ဆဖော ဘယ်ချပ္လေႈ ပ္လံက်တင်ဇူႈ(10)ချ ကနာည်ဘည်ဒါဟာဝ်းဘေဲႇတအာင်းကတာႈဒါင်းဇာရ် ကနာည်ဖုင်ဘေဲႇတအာင်းဂဲ။ ဆဲႈဒီန် ဖုင်ကော်မတီဘေဲႇတအာင်းဂဲ ဘယ်ရေဲန်ဟောည်ႇဇီုင်းကာန်ထာန်ပ္လချအူန်း ဆဖော ဆီမ်းႎီရ်အ်ုန်အီမိုႈကော်မတီအောႏ။

ကောင်ဆံရ်ဇီုင်းပိင်ငျာကုင်တအာင်း- TLECဂဲ ခေဲင်ဘည်ပနောဂဲ လိုဟံပ်ဟာတ်း ဘေဲႇတအာင်း‌ရောတ်ချှံန်ဇာရ် လိုကစုဟာဝ်းအူန်းကတီးကရီး၊ ဖုင်ဘေဲႇတအာင်း ကာည်း ဘေဲႇဘာန်း၊ ခနားဖုင်ထုင်မှီူမ်ဂဲမာ် လိုရေဲန်ကစုတောပ်ဟာဝ်းဇီုင်း ကာည်း ခေဲင်ဖုင်ဘေဲႇတအာင်း လိုပဘိုရဲင်ဘ္လောမ်အီနံပ်ပိင်ငျာ ပ်ုန်ဘ္လံက်ချအူန်း ဟြာင်းနှဲဆဖောဟာဝ်းအောႏ။

Website Official

www.taangland.org

Telegram Official Channel

https://t.me/pslftnlanews

Telegram Link – Ta’ang TV

https://t.me/pslftnlaTaangTV

YouTube Official

https://www.youtube.com/@pslftnlanews

#PSLF/TNLA

#တီုင်‌ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း