ကနာည်နံင်ဘယ်ပဇာရ်ထိင်ခြဲဟာဝ်းကြောႈဖာဆာ ကူန်မာတာယာအယ်တအာင်း ဖုင်အီချှာင်ဇီုင်းအဘိဓာန် ဒစ်ဂျစ်တယ်တအာင်း ထုက်ရိူရ်ႈလေႈ Application အဘိဓာန် ကာည်း website ကဒါႇတအာင်း-ဘြာန်-အိင်ဂလိက်
29 August 2026
ကနာည်နံင်ဘယ်ပဇာရ်ထိင်ခြဲဟာဝ်းကြောႈဖာဆာ ကူန်မာတာယာအယ်တအာင်း ဖုင်အီချှာင်ဇီုင်းအဘိဓာန် ဒစ်ဂျစ်တယ်တအာင်း ထုက်ရိူရ်ႈလေႈ Application အဘိဓာန် ကာည်း website ကဒါႇတအာင်း-ဘြာန်-အိင်ဂလိက်
အိုမ်ယ်ုရ်၊ ကျံရ်တာရ် ဆငည်း(29)
ဆဒါင်ကုင်တအာင်း
ကနာည်နံင်ဘိူန်းတခေါရ်ဒါငှိူည်ကာည်း မောကံပ်ဘယ်ပဇာရ်ထိင်ခြဲဟာဝ်းကြောႈဖာဆာ ကူန်မာတာယာ ခြိူဝ်းမျိုးအယ်တအာင်း ခည်မိုႈကျံရ်တာရ် ဆငည်း(25)ဒိူန် ဖုင်အီချှာင်ဇီုင်းအဘိဓာန်ဒစ်ဂျစ်တယ်တအာင်း ထုက်ရိူရ်ႈလေႈ (Taang Digital Dictionary) Application ကာည်း Website ကဒါႇတအာင်း-ဘြာန်-အိင်ဂလိက်အောႏ။
ပရောဂျက်ဒီန် ဆီုင်ခည်မိုႈ ဆန်ုမ်2022ဒိူန် ဖုင်ဘေဲႇတအာင်း (Taang Literature Association TLA) ဆာ်ႈအွံရ် အီရံပ်ဇီုင်းကပ္လိူင်ကောန်တဘိုက်ဂဲကာည်း ကညာပိင်ငျာအီဆမားနံပ်ဂဲ ကစုကပိုမ် ရီန်းရဲတ်ရေဲန်ဒေဲႈ ဟည်လှေင်(4)ဆန်ုမ်ထာန်နီန်။ ဆန်ုမ်2026၊ ခည်မိုႈကျံရ်တောရ်ဒိူန် ကစုကိက်လေဒေဲႈ အီမိုႈဝေါဟာရတအာင်း ဘည်ကဇေန်နီး စီဘယ်ထုက်ရိူရ်ႈလေႈဒေဲႈ အဘိဓာန်အီလီပ်တြားနီန်။
ဘည်ကဇေန်နီး အဘိဓာန်အက်ပလီကေးရှင်း Androidနီန် ကဆီုဝ်အီဒါႎှုင်ဂဲ ဘိူန်းအူန်းရေဲန်လာည်းဒေါင်းလုဒ် ခေဲင်Google Play Store အာဝ်ဒါလဴင်အင်နက်မာ် ဟောည်ႇဘိူန်းဒါ offline ခေဲင်ပယာႈ(100)။ဆဲႈဒါႇဒီန် ဘည်ကဆီုဝ်အီဆိင်တခေါရ်ဂဲ ကာည်း ကောန်တဘိုက်တအာင်းဂဲ အီဂေါည်တေဲင်ကံမ်ဖာနီန် ကနာည်နံင်ဘိူန်းတခေါရ်တီပ်ဟြီုက်ငှိူည် ခည်မိုႈကျံရ်တာရ် ဆငည်း(23)ဒိူန်မာ် ထုက်ရိူရ်ႈလေႈတာင်ဟိုက်ဘိုး Website (ဝက်ဆိုက်) taangdictionary.org။
Applicationနီန် ဘိူန်းတီပ်ဟြီုက်ဒါငှိူည် ကဒါႇတအာင်း-ဘြာန်-အိင်ဂလိက် (3)ဖာဆာ ခေဲင်ဒီန်အ်ုန်တောပ် ဆနီတ်ပ်ုန်ဘယ်ဆီမ်းအူန်းရာင်ဒေ (Bookmarking) ကနာည်အီဆိင်တခေါရ်နံပ်ဘေဲႇတအာင်း Flashcards၊ ဒေင်အီနံင်ဘယ်ဘိူန်းတခေါရ် ပ်ုန်ဆမွံတ်(Gamified Learning)၊ ပ်ုန်ဟြာင်းဒဲႈရနောတောန်ဆငည်း Streaks ကာည်း ဆနီတ် Badgesကဲနီန်၊ ဘည်ဘယ်ကယိူဝ်ႈကပျောႈ အီပ္လါင်/အီအံပ်၊ ဘည်ဘယ်ဘြဲဆားဒဲႈ ထာန်ဂေါည်တိုဘေဲႇ ကာည်း ပ်ုန်ဒါဝေါဟာရကဲနီန်။
ခေဲင်အဘိဓာန်နီန် ကစုအူန်း ႎံရ်ခြိူဝ်းကတူရ်၊ ရူမာည်း၊ ရူစိင်၊ ရူမာဝ်း၊ ရူချုရျ၊ ငွံန်ရောတ်ကာည်း ထဲဝ်ရာည် ဝေါဟာရ ႎံရ်ခြိူဝ်း (6)နဲကဲနီန် စေတ်ချယ်တောပ်ဘာည်းပ္လအူန်းမူ(10)ချာက် ရံရ်ႈဟံပ်အူန်းအ်ုန်ပဲန် ဘေဲႇလူမ်/ကြောႈလူမ်။ ဘည်ကယေင်ရေဲန်ဟာဝ်း အဘိဓာန်နီန်မိုႈ မောကံပ်ခနားႎံရ်ခြိူဝ်းအူလှေတောပ်အူလှေ၊ တိုအီးလူမ်တီုင်ဌာနဂဲ၊ ရဟာန်းစဝ်ဆာင်ခါဂဲ၊ ကညာပိင်ငျာဘေဲႇတအာင်းဂဲ ကာည်း ကူန်ရဝ်မာဂါင်အယ်ဂဲ ဘယ်ဘိူန်းဒေကဆီုပ်ကဘာကြောႏက္လာင်းငှိူည်။
တောပ်ဘာည်းထုက်ရိူရ်ႈလေႈ ဖုင်အီချှာင်ဇီုင်းအဘိဓာန်ဒစ်ဂျစ်တယ်တအာင်း ဆာ်မိူဝ်ႈပ်ုန်ဆိင်နံပ် အီကဆီုဝ်ကဆဲင် တဝေါဟာရ တောန်ႎံရ်ခြိူဝ်းအီဟံရ်ဂဲ ဘိူန်းအူန်းကဆီုပ်ကဘာဆမွံတ်ဒေဲႈ တဖုင်ဂဲ ကာည်း ကနာည်ဘယ်ပဇာရ်ထိင်ခြဲဟာဝ်း ကြောႈဖာဆာကူန်မာတာယာအယ်တအာင်း ဟည်ဘိူန်းကဆာင်းဒါဟာဝ်း အဘိဓာန်တအာင်းနီန်အောႏ။
Website Official
www.taangland.org
Telegram Official Channel
https://t.me/pslftnlanews
Telegram Link – Ta’ang TV
https://t.me/pslftnlaTaangTV
YouTube Official
https://www.youtube.com/@pslftnlanews
#PSLF/TNLA
#တီုင်ပ္လေႈလေႈဆဒါင်
Comment Lists