25 August 2026

ဖုင်ခေါခါႇကုင်တအာင်း နံင်ကဇောည်ထာ့်ဒဲႈဟာဝ်း ရိူန်းကဇောည် တမာကောန်ဒဲႇကာည်း ကောန်ဒဲႇ(5)ဆန်ုမ်လေႈရခြူမ် ပလှံင်အိုမ်ယ်ုရ်ကာည်း လှံင်ရူကော

အိုမ်ယ်ုရ်၊ ကျံရ်တာရ် ဆငည်း(25)

ဆဒါင်ကုင်တအာင်း

ဖုင်ခေါခါႇကုင်တအာင်း(Taang Health Organization) ပ်ုန်ကယေင်မောကံပ်ဘယ် ပယောမ်နှုန်းဘည်ယံမ်းကောန်ဒဲႇကာည်း မောကံပ်မိူဝ်ႈအကျံင် ဘည်လိုဆနံမ်တိုပိုင်း ကတီးကရီး ကျံရ်တာရ် ဆငည်း(24) ဒိူန် ဂဲရိူရ်ႈလေႈပ္လါႇဒါႈ နံင်ကဇောည်ထာ့်ဒဲႈဟာဝ်း ရိူန်းကဇောည် တမာကောန်ဒဲႇကာည်း ကောန်ဒဲႇအဆာက်(5)ဆန်ုမ် လေႈရခြူမ် ပလှံင်အိုမ်ယ်ုရ်ကာည်း လှံင်ရူကောအောႏ။

ရိူန်းကဇောည်ထာ့်ဒဲႈနီန် နံင်ကဇောည်ဒဲႈဟာဝ်း အိုည်ကျံရ် အူလိူဝ်ႈ ပ်ုန်နံင်ကဇောည်ထာ့်ဒဲႈဟာဝ်း ကဇေန်နီးမိုႈ အီလေႈဒါႇဆေယုင် ခေဲင်ကျံရ်ပူရ်၊ ကျံရ်တာရ်ကာည်း ခေဲင်ကျံရ်တီမ်ကဲနီန်။ ဖုင်ခေါခါႇကုင်တအာင်း ပ္လိူရ်ႈနှဲလေႈဒါႈ နံင်ကဇောည်ထာ့်ဒဲႈဟာဝ်း မာကောန်ဒဲႇကာည်းကောန်ဒဲႇအဆာက်(5)ဆန်ုမ်လေႈရခြူမ် တောပ်ဘာည်းကနှေရ်ပ်ုန်ပ္လအူန်း အီဟိုက်ဒေဲႈဆနံမ်း ရခြူမ်ဌာနပ်ုန်ရေဲန်လံပ်ဒံန်ခြဲကာည်း လံပ်ပဇာရ် ဖုင်ခေါခါႇကုင်တအာင်း။

ဘည်ပ္လကဲဒီန် အ်ုန်မိုႈ ဘည်အီပျေဲႈဒည်းကောန်၊ အခိင်ပျေဲႈကောန်(ဆာ်အာဝ်မိုႈ) ႎါည်ပျေဲႈကောန် ဘည်နှာမ်လေႈဂီုန်း၊ အခိင်ဂေါည်ရတိုဇံန် ဘည်ပဲန်ရောဂါနှာမ်ဟိုက်(သွေးတိုး)၊ ဘည်ဆံန်ထေလူ/ဆံန်ထေဇောႈ၊ ဘည်ပဲန်ပဋိသန္ဓေ ရဂါင်ကောန်နှာရိူဝ်ႇ၊ ဘည်လီပ်ႎါႇရာ ႎါည်ပျေဲႈကောန်၊ ဘည်ပဲန်အိုမ်ရဂါင်ပဒူႈဇေဝ်း၊ ကျံရ်ညှံမ်နိုက် ဘည်ပျေဲႈဇေဝ်းကောန် ကာည်း အီမိူဝ်ႈခါမ်ကီန်းရောဂါ နှာခေဲင်ကဲနီန်။

ဆဲႈဒါႇဒီန် နံင်ကဇောည်ထာ့်ဒဲႈလိူည် အီမိုႈ ဘည်ရောဂါဖိူပ်ဖ်ုပ်အာႈဆဲဝ်ဒါင်းကာည်း ဒေင်တိုႈဖိူမ်ဒည်း၊ ဘည်ပဲန်ကာ်ႇဒါင်း၊ ဘည်ပဲန်ႎဲ့လိူဝ်ႎဲ့ဟာဝ်း၊ ဘည်ပဲန်ကနှဲတ်ကမှည် ကောန်ငါႇဇူႈပျေဲႈ၊ အဟာရ(ပ်ုန်ဟောမ်) ကာည်း ဘည်အီအာဝ်မိူဝ်ႈဗီတာမီန်၊ ဘည်ဆဲဝ်ဖိူဝ်း၊ ဘည်ကာ်ႇရာမ်း၊ ဘည်ကတူႈလံက်ဖေးဆဲဝ် ကာည်း ကောန်ဒဲႇအဆာက်(5)ဆန်ုမ်လေႈရခြူမ် အီကတူႈဆနံမ်းဘ္လာႈကနှဲတ်ကမှည်ကဲနီန်။

ဘည်ကဆီုဝ်အီနံင်ဟြာင်းဟိုက်ရိူန်းကဇောည်ကဲနီန် လိုတိူဝ်ႈလာည်းဒေဲႈ ပံပ်လေႈဆေယုင် တာင်တိုအယ်လိုဒေဲႈထုက်လာည်း ပလှံင်အိုမ်ငျံရ်၊ ႎှုင်/Viber(09-893988585) (ဆာ်အာဝ်မိုႈ) ဘိူန်းအူန်းကဆီုပ်ကဘာဒေဲႈ တTHO Facebook Page Messenger ကဲနီန်ကာည်း ဆာ်မိုႈရိူန်းကဇောည်နီန် ဆိင်ပ္လူႈဆဒိ ဒါႈ ဘိူန်းလိူည်ဒေဲႈထုက်လာည်းအခိင် ရောတ်ကျံရ်တီမ်နီန်ဒိုည်ႇအောႏ။

Website Official

www.taangland.org

Telegram Official Channel

https://t.me/pslftnlanews

Telegram Link – Ta’ang TV

https://t.me/pslftnlaTaangTV

YouTube Official

https://www.youtube.com/@pslftnlanews

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း