ဖုင်တီုင်ဒါင်းလံပ်သာသနာဂဲ ဆာ်အွံရ် ရေဲန်ပါင်ကတူႈကငျားတောႇ ဖာဆာဒါင်းဖိုန်နဲ ပလှံင်အိုမ်ငျံရ် ခေဲင်ကုင်တအာင်း လိူဝ်ႈအာရ်
23 August 2026
ဖုင်တီုင်ဒါင်းလံပ်သာသနာဂဲ ဆာ်အွံရ် ရေဲန်ပါင်ကတူႈကငျားတောႇ ဖာဆာဒါင်းဖိုန်နဲ ပလှံင်အိုမ်ငျံရ် ခေဲင်ကုင်တအာင်း လိူဝ်ႈအာရ်
အိုမ်ယ်ုရ်၊ ကျံရ်တာရ်၊ ဆငည်း(23)
ဆဒါင်ကုင်တအာင်း
ဖုင်တီုင်ဒါင်းလံပ်သာသနာဂဲ ဆာ်အွံရ် ရေဲန်ပါင်ကတူႈကငျားလိူဝ်ႈအာရ် တောႇဖာဆာဒါင်းဖိုန်နဲ ကနာည် အယ်လာည်မိူဝ်ႈ တိူဝ်ႈကနဲႈ ခနားအယ်တောႇအူခနား ပလှံင်အိုမ်ငျံရ် ခေဲင်ကုင်တအာင်း ကျံရ်တာရ်၊ ဆငည်း(19)ဒိူန်အောႏ။
ခေဲင်ပါင်ကတူႈကငျားဒီန် အီရံပ်ဇီုင်းကပ္လိူင်ကဆီုဝ်ဖာဆာ၊ ဗုဒ္ဓဖာဆာ၊ ဟိန္ဒူဖာဆာ၊ ခရစ်ယာန်ဖာဆာ ကာည်း အစ္စလာမ်ဖာဆာ ဖာဆာဒါင်းဖိုန်နဲ၊ တားဘြောင်ချှာင်လှံင်၊ ဖုင်ပလိက်လှံင်ဂဲ ဟိုက်ရောတ်ဒေဲႈအောႏ။
ခေဲင်ပါင်ကတူႈကငျားဒီန် က်ုရ်ရံရ်ဖာဆာဒါင်းဖိုန်နဲဂဲ ကဆီုဝ်ကဆဲင်လောင်ဖာဆာ ဂါင်ႎါ်ႈ ကျောင်စဝ်၊ ကျောင်ခရစ်ယာန်၊ ကျောင်ဟိန္ဒူ ကာည်း ဗလီ ဒီနှာင်းရေဲန် ထာန်ကႎါ်ႈ ကာည်း မိူဝ်ႈအာဝ်မိူဝ်ႈ ကနံဝ်အိုမ်ဘြည်ကတာည်း ဟြာင်းကမိုန်ဟာဝ်းအောႏ။
ဆဲႈဒီန် ဘည်အာဝ်ကနှေး လောင်ဖာဆာဒီန် ဖာဆာအူလှေတောႇအူလှေ လိုလာည်ညျှေဲမ်ခနားအယ်၊ လိုလာည်တိူဝ်ႈကနဲႈတောပ်ထုင်ရိူရ်ႈဘိုဇေင် တောႇဟာဝ်းလိူည် ဘည်ကမိုန်ကာည်း ကစုကပိုမ်ကဖြောမ်ရေဲန်ဟာဝ်း။
ဆဖောပ္လေႈ ဒါႈ ဆာ်အယ်ယိူဝ်း တိုအီးကတူႈဖေးဆဖာဝအန္တရာယ် တိုအီးဖ္လာန်၊ တိုအီးအဆာက်ဒါင်း ကာည်း တိုအီကတူႈဖေးတောန်နဲဂဲ အာဝ်ဘိူန်းကကာႈခြိူဝ်းမျိုး၊ အာဝ်မိူဝ်ႈကကာႈဖာဆာ လိုရေဲန်ဟာဝ်းဇီုင်းကာန်ကဇောည်။
ဘည်နှဲဒေဲႈ လောင်ဖာဆာဒီန် ဆာ်ပဲန်ဒေဲႈ တေဲင်ဘည်တိူဝ်ႈလိူဝ်ႏယိူဝ်းအယ် ခနားတောပ်အူခနား လိုကမိုန်ဟာဝ်း လာည်လံပ်ယေန်ငံင်၊ က်ုရ်ရံရ်ဖာဆာဒါင်းဖိုန်နဲဂဲ ဆဖော ကကာႈလူန်းမိူဝ်ႈကော်မတီအူလှေ။ ဆဲႈဒီန် တောန်ဆန်ုမ် ထာန်ပ္လအူန်းအယ် လိုရေဲန်မိူဝ်ႈပါင်ကတူႈကငျားဆေဆေ။
ဘံန်ဟောည်ႇဒေဲႈ ဆန်ုမ်2025၊ ကျံရ်ဖိုန်၊ ဆငည်း(20) ပလှံင်အေဲမ်ကိုက် လိူဝ်ႏအူဒိူန် ဟောည်ႇရေဲန်ပါင်ကတူႈကငျား။ ပါင်ကတူႈကငျားလောင်ဖာဆာဒီန် ကတူႈကငျားတောႇ ဖာဆာတောန်မျိုး ခနားတိုအီးဂီုန်း၊ ဘည်မိူဝ်ႈလံပ်ယေန်ငံင်၊ ဘည်မိူဝ်ႈလံပ်ကဖြောမ်ကရောမ် ၊ ကနာည်ပ်ုန်ဆဖောအူန်းအယ်ဇံင်းမံန်။
#PSLF/TLG
#တီုင်ပ္လေႈလေႈဆဒါင်
Comment Lists