23 August 2026

ကပါင်ဖီုက်လျှံင်ဇီုင်းပိင်ငျာခြိူဝ်းတအာင်း-TEA ရေဲန်ဟောည်ႇပ္လေါည်ႎိူဝ်ႈ ႎါင်ပနော ဒီပလိုမာပိင်ငျာဆမာနံပ်ပဲန်ဆြာလိူဝ်ႈ(4)

အိုမ်ယ်ုရ်၊ ကျံရ်တာရ် ဆငည်း(23)
ဆဒါင်ကုင်တအာင်း

ကပါင်ဖီုက်လျှံင်ဇီုင်းပိင်ငျာခြိူဝ်းတအာင်း(TEA) ဆာ်ႈအွံရ်ရေဲန်ဟောည်ႇပ္လေါည်ႎိူဝ်ႈ ႎါင်ပနောဒီပလိုမာပိင်ငျာဆမာနံပ်ပဲန်ဆြာ (Diploma in Teacher Education - DTED) လိူဝ်ႈ(4) ခည်မိုႈ ကျံရ်တာရ် ဆငည်း(21) အခိင်ခီညှာ(9:00)နြီဒိူန် ခေဲင်ႎှါင်ႎါႈကျောင်၊ လှံင်အိုမ်ယ်ုရ်၊ ခေဲင်ကုင်တအာင်း။

ပ္လေါည်ႎိူဝ်ႈႎါင်ပနောနီန် PSLF/TNLA တာချှာင်ဇီုင်းကာန်တောန်နဲ ခူန်ချု တားဘုင်ကျော်၊ ခူန်အွံရ်ချု တားဂူႈဇာရ်၊ အီရံပ်ဇီုင်းကပ္လိူင် ကောင်ဆံရ်ဇီုင်းပိင်ငျာကုင်တအာင်း၊ တာဆြာ/ယာဆြာဂဲ ကာည်း ကောန်ကျောင်ဂဲ ကစုကပိုမ်ဂေါည်(200)အီးလှိူဝ်း ဟိုက်ရောတ်ဒေဲႈ။

 
ခေဲင်ပ္လေါည်ႎိူဝ်ႈႎါင်ပနောနီန် PSLF/TNLA ခူန်ချု တားဘုင်ကျော် က္လာင်းကြောႈတံမ်းဒါႈ “ နံင်ပျိူဝ်ႇဟာဝ်း ကျောင်TEAနီန် မောကံပ်ပဲန်ဒေဲႈ ႎှဲတ်ဒရဲရ်ဒီမိုကယက်တစ် လံပ်ပိင်ငျာအင်စတီကျူးရှင်းအူနဲ ဘာည်းပ်ုန်အာန်းအူန်း၊  ယိူဝ်ႇကဏ္ဍတလံပ်ပိင်ငျာနီန် နံင်ရေဲန်ဟာဝ်းမောကံပ်ပဲန်ဒေဲႈ တကြာက်ဒီမိုကယက်တစ် ပ္လါင်ပ္လါ်ႈလောတ်လာပ် ကာည်း ဂေါႇအ်ုန်မိုႈ ပ်ုန်ကကာမ်းအူန်း အီဆီုဝ်ကဆဲင်လံပ်ပိင်ငျာ နံင်ရီန်းရဲတ်ရေဲန်ဟာဝ်း မောကံပ်ဘာည်းဒေဲႈ ပ်ုန်အာန်းအူန်း”။
 

ကျောင်နီန် အီနံင်ဟိုက်ဟာဝ်း ကောန်ကျောင်ဂေါည်(90)အီး ဇိုချီုင်ႎါင်ပနော နံင်လှေင်(2)ဆန်ုမ်။ ခေဲင်ဇိုချီုင်ႎါင်ပနောနီန် ဒါင်းဒါင်းအ်ုန်နံင်ပနောဒဲႈဟာဝ်း ဖာဆာလံပ်ပိင်ငျာ၊ မျီန်မာ၊ အိင်ဂလိက်၊ သချာ၊ လံပ်ကႎှငိူပ်မေန်း၊ သိပ္ပံကာည်း ဘေဲႇလူမ်တအာင်း၊ နံင်ပနောကဂေါပ်ဟာဝ်းဘေဲႇပ်ုန်ပနော အနုပိင်ငျာ(ကီရ်အရာင်၊ ဂီတ)၊ ကာယ(နှာမ်မှည်)၊ ဘေဲႇပ်ုန်ပနောအရာပ်အရာ၊ အချာက်ဆဒါင်ကာည်း နီးပိင်ငျာလံပ်ကဆီုပ်ကဘာ၊ စာရိတ္တ(အချံင်)ကာည်း ပျီသူ့နီတိ၊ ဘည်ပ်ုန်လိုနံပ်ဆမာ ကနာည်ဇိုဇာတ်ကာည်း အိုမ်လှပ္လံက်တံင်ဇူႈဘေဲႇအိင်ဂလိက်(4) နဲ ။

အီဟိုက်ဒေဲႈ ကျောင်နီန်မိုႈ ကောန်တဘိုက်ဂဲ လှံင်အိုမ်ယ်ုရ်၊ လှံင်အေဲမ်ခြီရ်၊ လှံင်ရူကော၊ လှံင်ကိုက်ခည်း၊ လှံင်အေဲမ်ငူည်၊ လှံင်အိုမ်ငျံရ်ကာည်း လှံင်ကုင်ငှေါ အီဂေါည်ခေဲင်ကုင်တအာင်းနီန်။ ဆာ်မိုႈ အီဟောည်ႇဟာဝ်း ချှံန်ဒီပလိုမာနီန် နံင်ဒဲႈဂဲထာမ်းဇီုင်းကပ္လိူင် ပဲန်တာဆြာ/ယာဆြာ ပကျောင်ပနောဘေဲႇ ပ်ုန်ႎိူဝ်ႈအူန်း ကောင်ဆံရ်ဇီုင်းပိင်ငျာကုင်တအာင်း(TLEC)၊ ဆဲႈဒါႇဒီန် နံင်ဘိူန်းဘိုးအခွါင်းအရေး ဆီုပ်ဟိုက်ႎါင်ပနော ချှံန် B.Ed ကာည်း B.A/B.Scကဲနီန်အောႏ။

ႎါင်ပနောနီန် ပ်ုန်ကယေင်ႎိူဝ်ႈဟာဝ်း မောကံပ်ဘယ်ပြိူဝ်ႈလေႈ တာဆြာ/ယာဆြာဂဲ အီမိူဝ်ႈပ်ုန်နံပ်ပ်ုန်ဆမာနိုက်နိုက် အီဘယ်ထာမ်းဇီုင်းကပ္လိူင် ပကျောင်ပနောဘေဲႇ  ပ်ုန်ႎိူဝ်ႈအူန်း ကောင်ဆံရ်ဇီုင်းပိင်ငျာကုင်တအာင်း(TLEC)။
 
ပ္လေါည်ႎိူဝ်ႈႎါင်ပနော ဒီပလိုမာပိင်ငျာဆမာနံပ်ပဲန်ဆြာ လိူဝ်ႈ(3) ဟောည်ႇရေဲန်ဟာဝ်း ခည်မိုႈ ဆန်ုမ်2026 ကျံရ်အူ ဆငည်း(3)ဒိူန် ကဇေန်နီး ကပါင်ဖီုက်လျှံင်ဇီုင်းပိင်ငျာ ခြိူဝ်းတအာင်း(TEA) တာဆြာ/ယာဆြာဂဲ ပနောဒဲႈဟာဝ်းအူန်း ကတီးကရီးအောႏ။

#PSLF/TLG
#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း