ကောင်ဆံရ်ဇီုင်းပိင်ငျာကုင်တအာင်း ရေဲန်ပ္လေါည်ကမိုန် ဇီုင်းကာန်လံပ်ပဇာရ်ပ်ုန်နံပ်ဆမား ဘည်ကကည်တိူရ်ႈ စေတ်မေန်းပ္လေါည်ဆမွံတ်ဘေဲႇ ချှံန်တာန်းဇာရ် Grade-12 စေတ်မေန်းကပီုန်
07 August 2026
ကောင်ဆံရ်ဇီုင်းပိင်ငျာကုင်တအာင်း ရေဲန်ပ္လေါည်ကမိုန် ဇီုင်းကာန်လံပ်ပဇာရ်ပ်ုန်နံပ်ဆမား ဘည်ကကည်တိူရ်ႈ စေတ်မေန်းပ္လေါည်ဆမွံတ်ဘေဲႇ ချှံန်တာန်းဇာရ် Grade-12 စေတ်မေန်းကပီုန်
အိုမ်ယ်ုရ်၊ ကျံရ်တာရ် ဆငည်း(7)
ဆဒါင်ကုင်တအာင်း
ခေဲင်ကျံရ်ပူရ်ဒိူန် ကောင်ဆံရ်ဇီုင်းပိင်ငျာကုင်တအာင်းဂဲ ရေဲန်ဟာဝ်းပ္လေါည်ကမိုန် ဘည်ကကည်တိူရ်ႈ စေတ်မေန်းပ္လေါည်ဆမွံတ်ဘေဲႇ ခေဲင်ဆန်ုမ်ပနောဘေဲႇ 2026-2027 ခေဲင်လှံင်တောန်ဒီ ဘည်ကယေင်ရေဲန်ဟာဝ်းမိုႈ မောကံပ်ဘယ်ပဇာရ်ပ်ုန်နံပ်ဆမား ဘည်ကကည်တိူရ်ႈစေတ်မေန်းကာည်း မောကံပ်ဘယ်ရေဲန်ဟာဝ်း တောပ်ဘာည်း ကနှေရ်ဆာန်နှုန်း ကျောင်အီးဟံရ်ကဲ ဆနီတ်လံပ်ပိင်ငျာ ဘည်ကကည်တိူရ်ႈ စေတ်မေန်းပ္လေါည်ဆမွံတ်ဘေဲႇ ချှံန်တာန်းဇာရ် Grade-12 စေတ်မေန်းကပီုန် ခေဲင်ကုင်တအာင်းနီန်အောႏ။
ပ္လေါည်ကမိုန်ဒီန် ပ်ုန်ႎိူဝ်ႈဟာဝ်းကျောင်ပနောဘေဲႇ ခေဲင်ဆန်ုမ်2026-2027နီန် ခေဲင်ကျောင်ချှံန်ဇာရ်(32)ကျောင် ဟောည်ႇဘယ်ႎိူဝ်ႈဟာဝ်းကျောင်(24)ကျောင် ဆာ်မိုႈ ကျောင်အီကီုတ်အူန်းကဲဒီန် နံင်ရီန်းရဲတ်ဆီုပ်ႎိူဝ်ႈဟာဝ်း ခေဲင်ကျံရ်နံင်ဒေဲႈကဲနီန်အောႏ။
ပ္လေါည်ကမိုန်ဇီုင်းကာန်ဒီန် ကပိုမ်ကမိုန် ဒဲႈတာဆြာ/ယာဆြာဂဲ ရေဲန်ဟာဝ်းအခ်ုအ်ုန် ဘည်လိုပဇာရ်တံင်ဇူႈ လံပ်ပိင်ငျာ(Competency-Based Education)၊ ဘည်ကကည်တိူရ်ႈစေတ်မေန်း ကနာည်ကတာရ်ႈခေဲင်ႎါင်ပနော၊ ဘည်ကကည်တိူရ်ႈ စေတ်မေန်း ဘေဲႇပ္လါန်ရဘံန်းဆူတ်၊ ဒေင်ဘည်ဒါ Assessment Formats၊ ဘည်ပနောဘေဲႇခေဲင်ခါန်း၊ ကျောင်၊ ဘည်ကကည်တိူရ်ႈစေတ်မေန်း ချှံန်လှံင်ကာည်း ချှံန်ကပီုန်၊ ဒေင်ဘည်လိုကိက်ဟံပ် Assessment Records ကာည်း ဒေင်ဘည်လိုဒါဂြီရ်ႈ Assessment Toolsကဲနီန်။
ဆဲႈဒါႇဒီန် ဇူႈဆန်ုမ်ပနောဘေဲႇ2026-2027နီန် ဆဲ့ဒါႇဆနီတ်ဘည်ဒဲႈစနဲ တေဲင်ပ်ုန်ပ္လါန်ပ္လေါည်ဆမွံတ်နီန် ဒါင်းဒါင်းအ်ုန် နှာင်းရေဲန်ဟာဝ်း အိုမ်လှဘည်နံပ်ဆမား ခေဲင်ဇိုချီုင်ပနောဒေဲႈ ကောန်ကျောင်ဂဲ၊ ဘည်နံပ်ဆမားကာည်း ဆနီတ်ဘည်ကကည် တိူရ်ႈစေတ်မေန်း လှဲမ်တောန်ကဒါႇ ထာန်ဆမားပနောဘိူန်းလာည်း ကောန်ကျောင်ကဲနီန်။
ကနာည်မောကံပ်ကနှေရ် တောပ်ဘည်ချှံန်ဇာရ် ဘည်ကကည်တိူရ်ႈစေတ်မေန်း ခေဲင်ကပီုန်အီဟံရ် ရိူရ်ႈလေႈတောပ်ဘာည်းဆာန်နှုန်းကာည်း ဘာည်းဒဲႈစနဲ၊ ႎိူဝ်ႈႎါင်ပနောပဇာရ်ပ်ုန်နံပ်ဆမား ဘည်ကကည်တိူရ်ႈစေတ်မေန်း ကနာည်တာဆြာ/ ယာဆြာဂဲ ကာည်း ဆီုပ်ရေဲန်ဟာဝ်း ဇီုင်းကာန်ဘည်ႎီရ်ကျိူက်တိူရ်ႈ တဆေ ဘည်ကကည်တိူရ်ႈစေတ်မေန်းတောပ်ဘာည်းဆာန်နှုန်းချှံန်ဇာရ်။
တောပ်လိူည်ဘာည်းဒါႈ ကောင်ဆံရ်ဇီုင်းပိင်ငျာကုင်တအာင်း ဘည်ဘယ်ကကည် တိူရ်ႈစေတ်မေန်း ကတီးကရီးတောပ်ဘာည်းဆာန်နှုန်းချှံန်ဇာရ်နီန် အယ်ဘယ်ဒေနံပ်အခိင် ဘည်ဘ္လောမ်ဒဲႇ၊ ဘ္လောမ်ဒါင်း ကောန်ကျောင်အယ်ဂဲ၊ မိုႈဘိုး ဘယ်ဒေကဇောည်ဒဲႈ အီဆီုဝ်ကဆဲင်ဘည်ပနောဘေဲႇ မောကံပ်ရောတ်ကစာ်မ်းဒီ။ ဆဲႈဒီန် ဒါင်းဒါင်းအ်ုန် ဆီုပ်ရေဲန်ဟာဝ်း ဇီုင်းကာန်ဆနီတ်လံပ်ပိင်ငျာ ကုင်တအာင်းနီန် မောကံပ်ဆနီတ် လံပ်ပိင်ငျာခေတ်ကာပ် ချှံန်ဇာရ်ကုင်အီဟံရ်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists