ကုင်တအာင်း၊ ခေဲင်ကျံရ်ပူရ်နီန်း ဖုင်ကလိက်ကုင်တအာင်းဂဲ ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ(3)အီး ကာည်း အီဒါ(16)အီး
04 August 2026
ကုင်တအာင်း၊ ခေဲင်ကျံရ်ပူရ်နီန်း ဖုင်ကလိက်ကုင်တအာင်းဂဲ ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ(3)အီး ကာည်း အီဒါ(16)အီး
အိုမ်ယ်ုရ်၊ ကျံရ်တာရ်၊ ဆငည်း(4)
ဆဒါင်ကုင်တအာင်း
ကုင်တအာင်း၊ ခေဲင်ကျံရ်ပူရ်နီန်း ဖုင်ကလိက်ကုင်တအာင်းဂဲ ဘိူန်းတိုည်း တိုအီးကဇိူရ်ႈကယံင်းခံင်ယိူည်ႇ(3)အီး ကာည်း အီဒါ(16)အီး ပလှံင်ရူကော၊ လှံင်အေဲမ်ခြီရ်၊ လှံင်မိူင်းလိုင် ကာည်း လှံင်အိုမ်ယ်ုရ်။
ခေဲင်လှံင်ရူကော ဘံန်ဟောည်ႇဒေဲႈ ကျံရ်ပူရ်၊ ဆငည်း(1) ဖုင်ပလိက်ကုင်တအာင်းဂဲ ရေဲန်ဇီုင်းကာန်စေတ်မေန်း ဘိူန်းတိုည်း ကောန်အီမာည်း ဒါခံင်ယိူည်ႇ(7)အီး ကာည်း ကောန်အီပ်ုန်(1)အီး၊ ကျံရ်ပူရ်၊ ဆငည်း(7)ဒီန်မာ် ဘိူန်းတိုည်းဆီမ်းဘို ခံင်ယိူည်ႇလူည်ထုတ်ဒဲႇ တကောန် အီမာည်း ဒါခံင်ယိူည်ႇ(1)အီး။
မိုႈဘို ပလှံင်အေဲမ်ခြီရ်၊ အခိင်ဖုင်ပလိက်ကုင်တအာင်းဂဲ ရေဲန်ဇီုင်းတီုက်ယာ်ႈအရေးခံင်ယိူည်ႇ ဘိူန်းတိုည်း တိုအီဒါခံင်ယိူည်ႇ(4)အီး။ ဆဲႈဒီန် ကျံရ်ပူရ်၊ ဆငည်း(1) ပလှံင်မိူင်းလိုင်မာ် ဘိူန်းတိုည်း ကောန်အီပ်ုန်(1)အီး ကရိူရ်ႈကယံင်း ကာည်း တိုအီဒါခံင်ယိူည်ႇ ကောန်အီမာည်း(2)အီး တောပ်ဘို ကအာင်းယာမ(238)ကအာင်း၊ ခံင်ယိူည်ႇလူည်(2.4)ဂရမ်။
ဘံန်ဟောည်ႇဒေဲႈ ကျံရ်ပူရ်၊ ဆငည်း(9) လှံင်အိုမ်ယ်ုရ်၊ ပရဝ်ဘံန်လိုမ် ဘိူန်းဆဒါင် မိူဝ်ႈအီကရိူရ်ႈကယံင်းခံင်ယိူည်ႇ အခိင်ဟာဝ်းစေတ်မေန်း ဘိူန်းတိုည်း ကောန်အီပ်ုန်(1)အီး ကဂေါပ်တောပ် ကအာင်းယာမ(250)ကအာင်း၊ ကျံရ်ပူရ်၊ ဆငည်း(12) ဘိူန်းတိုည်းဘို ကောန်အီမာည်း(1)အီး တောပ်ကအာင်းယာမ(19)ကအာင်း။ ကျံရ်ပူရ်၊ ဆငည်း(9)မာ် ဖုင်ပလိက်ကုင်တအာင်းဂဲ ဘိူန်းတိုည်းဘို တိုအီဒါခံင်ယိူည်ႇ(1)အီး ဒဲႈလာည်ဟာဝ်းအရေးဒါင်းဒါင်းတအ်ုန်အောႏ။
တံပ်အွံရ်ပ်ုန်လောတ်ကပီုန်တအာင်း-PSLF/TNLA တောပ်လိူည်ဘာည်းဥပဒေတီုက်ယာႈအရေးခံင်ယိူည်ႇ ပ်ုန်ဘိူန်းတိုည်းတိုအီးဒါခံင်ယိူည်ႇကဲနီန် ဆာ်မိုႈလိူဝ်ႈအူ တိုန်းဒဲႈဟာဝ်းဂဲႎီရ်ဘြဲဆားအကျံင် ပဂါင်ဆငါးလှေင်(6)ကျံရ် ဆာ်ႎီရ်စေတ်ဆေးယိူဝ်းဘိုးဂဲဒါအူလိူဝ်ႈ တောပ်လိူည်ဘာည်းဥပဒေဆံင်ကိုပ်(ခ) နှာင်းတိူဝ်ႈလာည်းဟာဝ်းအရေးဒဲႈဂဲ ႎီရ်ဘြဲဆားအကျံင် ပဂါင်ဆငါးလှေင် ခေဲင်(2)ဆန်ုမ် ရောတ်(3)ဆန်ုမ်။
ကဆီုဝ်တံပ်အွံရ်ပ်ုန်လောတ်ကပီုန်တအာင်း-PSLF/TNLA ရေဲန်ဇီုင်းကာန်တီုက်ယာႈအရေးခံင်ယိူည်ႇနီန် ဒဲႈအ်ုန်မိုႈဇီုင်းဒါင်းအူလှေ၊ ဆဲႈဒီန် ရေဲန်ဟာဝ်း ဘည်တိုအီးကဇိူရ်ႈကယံင်းခံင်ယိူည်ႇ ကာည်း တိုအီးဒါခံင်ယိူည်ႇကဲနီန် မောကံပ်ဟြာည်ကမာ်ႈ၊ ရေဲန်ဇီုင်းကာန်မောကံပ်ဘယ်ထိင်ဒဲႈ ဘံန်နံင်ဒေဲႈ (အနာဂတ်) ကောန်တဘိုက်ဂဲ ကာည်း ဇီုင်းကာန်ဘ္လီုက်လှူပ်တြားဥပဒေ၊ ဆီုပ်ရေဲန်ဟာဝ်း မောကံပ်ဘယ်ပဇာရ်ဒဲႈ ဇိုဇာတ်တိုအီးအယ် မိူဝ်ႈလံပ်ကတ်ုမ် ဘိူန်းဂေါည်လံပ်ယေင်ငံင်။
#PSLF/TNLA
#တီုင်ပ္လေႈလေႈဆဒါင်
Comment Lists