ဖုင်ကာ်မ်မတီဇီုင်းကာန်တီုက်ယာႈအရေးခံင်ယိူည်ႇ ဆီုပ်ရေဲန်ပါင်ကတူႈကငျားတောပ် ကူန်ရဝ်မာဂါင်ဂဲ အီကဆီုဝ်ကဆဲင်ဇီုင်းကာန်တီုက်ယာႈအရေးခံင်ယိူည်ႇ ပလှံင်ရူကော ကာည်း လှံင်အေဲမ်ငူည်
16 July 2026
ဖုင်ကာ်မ်မတီဇီုင်းကာန်တီုက်ယာႈအရေးခံင်ယိူည်ႇ ဆီုပ်ရေဲန်ပါင်ကတူႈကငျားတောပ် ကူန်ရဝ်မာဂါင်ဂဲ အီကဆီုဝ်ကဆဲင်ဇီုင်းကာန်တီုက်ယာႈအရေးခံင်ယိူည်ႇ ပလှံင်ရူကော ကာည်း လှံင်အေဲမ်ငူည်
အိုမ်ယ်ုရ်၊ ကျံရ်ပူရ်၊ ဆငည်း(16)
ဆဒါင်ကုင်တအာင်း
ကုင်တအာင်း၊ တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ကာ်မ်မတီဇီုင်းကာန်တီုက်ယာႈအရေးခံင်ယိူည်ႇ ဆီုပ်ရေဲန်ပါင်ကတူႈကငျားတောပ် ကူန်ရဝ်မာဂါင်ဂဲ အီကဆီုဝ်ကဆဲင်ဇီုင်းကာန်တီုက်ယာႈအရေးခံင်ယိူည်ႇ ၊ ပဇာရ်ဒဲႈဘည်လိုကူန်ရဝ်မာဂါင်ဂဲ ကဖြောမ်ကရောမ်တောပ်ကာည်း ပဇာရ်ဒဲႈလောင်ပိင်ငျာ ဘည်လိုနံပ်ဖေးအန္တရာယ်အရေးခံင်ယိူည်ႇကဲနီန် ပလှံင်ရူကော ကာည်း လှံင်အေဲမ်ငူည်။
ခေဲင်ပါင်ကတူႈကငျားနီန် ကမိုန်ဟာဝ်းလောင် ဂေါႇအရေးခံင်ယိူည်ႇနီန် ဘည်ဆမားပဲန်ဒေဲႈ ဖေးအန္တရာယ် တခေါခါႇ၊ လံပ်ကႎှံက်အယ်ကာည်း လံပ်ဘြောင်ရိူန်းခြီရ်အယ် ဘည်ပျဆနာလှေနီန် အာဝ်ႎံန်းလိူည်တံင်အရာင်းတိုအီးအယ် အီဂေါည်ခေဲင်ကုင်တအာင်းနီန် နံင်လူလှဲဝ်ႏဟာဝ်း အ်ုန်ဒဲႈဖေးကပျော လံပ်ကတ်ုမ်ခြိူဝ်းမျိုးအယ်၊ ဂေါႇဘည်ဒီန် အီရံပ်ဇီုင်းကပ္လိူင်ဂဲ ဒဲႈဟာဝ်းလောင်ပိင်ငျာ ဘည်လိုကဖြောမ်ကရောမ် ရေဲန်ဟာဝ်းဇီုင်းကာန်တီုက်ယာႈအရေးခံင်ယိူည်ႇနီန် ဒါင်းဒါင်း၊ ဆဲႈဒီန် ကမိုန်ဟာဝ်းဘိုးဒါႈ အယ်လိုတီုက်ယာႈဟာဝ်း ဒေင်လီပ် အရေးခံင်ယိူည်ႇကဲနီန်၊ လိုကဖြောမ်ကရောမ်စေတ်ဆေး ဘိဒေင်လီပ်ဒေဲႈအ်ုန် ကာည်း ဘည်ဥပဒေ အရေးခံင်ယိူည်ႇကဲနီန်အောႏ။
ဘံန်ဟောည်ႇဒေဲႈ ကျံရ်ပူရ်၊ ဆငည်း(1)ရောတ် ဆငည်း(7) ဖုင်ကာ်မ်မတီဇီုင်းကာန်တီုက်ယာႈအရေးခံင်ယိူည်ႇ အိူင်ရူကော တာမ်ခူန်အွံရ်ဒါင်း တားဂေါင်ငါး၊ တားအိူင် ခူန်အွံရ် တားဂူရဲင်၊ တားဘာအိူင် ခူန်အွံရ် တားတောင်ကြီး ကာည်း ခူန်နာန်း ကမေဲႈဒါင်းဂဲ ဆော်အွံရ် ဒဲႈဟာဝ်းဆဒိ တကူန်ရဝ်မာဂါင်ဂဲ ခေဲင်ဇံင် ကာည်း အရာပ်အရာ ခံင်ယိူည်ႇဒီန်ဘည်မိူဝ်ႈဖေး၊ ဂြိုခြီုင်ပ်ုန်ဒါရိူရ်ႈလေႈခံင်ယိူည်ႇနီန်၊ ဆာ်အယ်ကဆာင်း ကာည်း ကရိူရ်ႈကယံင်းနီန်၊ တီႇဆ်ုမ်တံင်အ်ုန်အီမိုႈအရေးခံင်ယိူည်ႇမာ် ဘည်ပွံတ်ဆံင်ခံတ်ဥပဒေအရေးခံင်ယိူည်ႇ တေဲင်ဘည်ရေဲန်အယ်ဒီန် နှာင်းဒဲႈဟာဝ်းအရေး တောပ်ဘည်ဥပဒေတီုက်ယာႈအရေးခံင်ယိူည်ႇဒီန်ယာ့်။
မိုႈဘို ပလှံင်အေဲမ်ငူည် ဘံန်ဟောည်ႇဒေဲႈ ကျံရ်တောရ်၊ ဆငည်း(30) ရောတ် ကျံရ်ပူရ်၊ ဆငည်း(6) အိူင်အေဲမ်ခြီရ်၊ ဖုင်ကာ်မ်မတီဇီုင်းကာန်တီုက်ယာႈအရေးခံင်ယိူည်ႇ ခူန်အွံရ် တားပ္လါင်ကဒူး၊ တားဘာအိူင်အေဲမ်ခြီရ် ခူန်အွံရ် တားမာဝ်းဒါင်း၊ တားလှံင်အေဲမ်ငူည် ခူန်နာန်းနောဆဲင် ကာည်း ခူန်နာန်းဒါင်း မာဝ်းညိူဝ် ဆာ်အွံရ် ဒဲႈဟာဝ်းလောင်ပိင်ငျာ အီကဆီုဝ်ကဆဲင်ဇီုင်းကာန်တီုက်ယာႈအရေးခံင်ယိူည်ႇ ဆီုပ်ရေဲန်ပါင်ကတူႈကငျားတောပ် ကူန်ရဝ်မာဂါင်ဂဲ လှံင်အေဲမ်ငူည်အောႏ။
ကူန်ရဝ်မာဂါင် အီဟိုက်ရောတ်ဒေဲႈဂဲမာ် ကဖြောမ်ကရောမ်ကမိုန်ဒဲႈဟာဝ်းခံင်ကျခံင်လ ကနာည်ဇီုင်းကာန်တီုက်ယာႈအရေးခံင်ယိူည်ႇနီန် မောကံပ်ဟြာည်ကမာ်ႈ ခေဲင်အရာပ်အရာတအာင်း ခေဲင်ပါင်ကတူႈကငျားနီန် ကူန်ရဝ်မာဂါင်ဂဲကစုကပိုမ် (1,045)အီးလှိူဝ်း ဟိုက်ရောတ်ဒေဲႈအောႏ။
တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ကာ်မ်မတီတီုက်ယာႈအရေးခံင်ယိူည်ႇဂဲ ရေဲန်ဟာဝ်းဇီုင်းကာန်တီုက်ယာႈအရေးခံင်ယိူည်နီန် ဒဲႈအ်ုန်မိုႈဇီုင်းဒါင်းအူလှေ၊ ရေဲန်ဇီုင်းကာန် ဒဲႈဟာဝ်းလောင်ပိင်ငျာ တကူဝ်ရဝ်မာဂါင်ဂဲ ဘည်မိူဝ်ႈဖေးအန္တရာယ်အရေးခံင်ယိူည်ႇ၊ ကဘ္လာင်းဆာင်လာင်း ဘည်မိုႈဥပဒေခံင်ယိူည်ႇ ကာည်း ဘည်ကူန်ရဝ်မာဂါင်ဂဲ လိုကဖြောမ်ကရောမ်တောပ် လိုပဇာရ်ဆီုပ်ရေဲန်ဟာဝ်းဇီုင်းကာန်တီုက်ယာအရေးခံင်ယိူည်ႇနီန် ခေဲင်လှံင်ကာည်း ခေဲင်ရဝ် အီကီုတ်ကဲဒိူန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists