ပရဝ်အိုမ်စောန် ကာည်း ရဝ်အိုမ်တက် ရေဲန်ပ္လေါည်ႎိူဝ်ႈႎါင်ပနော ကနာည်ပဇာရ် ပ်ုန်နံပ်ဆမားလှညီမ်မှိူမ်ကာည်း တြားဆမားကံမ်ကျံင်တို တကောန်တဘိုက်အီယိူဝ်ႇဘံန်းဂဲ
15 July 2026
ပရဝ်အိုမ်စောန် ကာည်း ရဝ်အိုမ်တက် ရေဲန်ပ္လေါည်ႎိူဝ်ႈႎါင်ပနော ကနာည်ပဇာရ် ပ်ုန်နံပ်ဆမားလှညီမ်မှိူမ်ကာည်း တြားဆမားကံမ်ကျံင်တို တကောန်တဘိုက်အီယိူဝ်ႇဘံန်းဂဲ
အိုမ်ယ်ုရ်၊ ကျံရ်ပူရ် ဆငည်း(15)
ဆဒါင်ကုင်တအာင်း
ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ပရဝ်အိုမ်စောန် ကာည်း ရဝ်အိုမ်တက် ပ်ုန်ကယေင်ႎိူဝ်ႈ ႎါင်ပနောမောကံပ်ဘယ်ပဇာရ်ဒဲႈ ပ်ုန်နံပ်ဆမားလံပ်ဘာသာ၊ လှညီမ်မှိူမ် ကာည်း တြားဆမားကံမ်ကျံင်တို ကောန်တဘိုက်အီယိူဝ်ႇဘံန်းဂဲ ႎိူဝ်ႈပနောဟာဝ်း ဗုဒ္ဓဘာသာ ပ္လံက်တံင်ဇူႈ၊ လှညီမ်မှိူမ် ကဒါႇတအာင်း လှေင်(5)ဆငည်း။
ႎါင်ပနောနီန် ဇူႈႎိူဝ်ႈပနောဟာဝ်း ပရဝ်အိုမ်စောန် ကျံရ်တောရ် ဆငည်း(29) ရောတ် ကျံရ်ပူရ် ဆငည်း(4) ကောန်ကျောင် Grade-5 ရောတ် Grade-11 ကစုကပိုမ်(95)အီး ကာည်း ပရဝ်အိုမ်တက် ဇူႈႎိူဝ်ႈပနောဟာဝ်း ကျံရ်ပူရ် ဆငည်း(6) ရောတ် ကျံရ်ပူရ် ဆငည်း(11) ကောန်ကျောင် Grade-5 ရောတ် Grade-9 ကစုကပိုမ် (53)အီး ဟိုက်ဒေဲႈပနော။
ခေဲင်ႎါင်ပနောနီန် ပနောဒဲႈဟာဝ်း လှညီမ်မှိူမ်ဗုဒ္ဓဘာသာပ္လံက်တံင်ဇူႈ၊ လံပ်ဘာသာကာည်း ဘည်လိုဆမားနံမ်ပိင်ငျာ ထုင်မှိူမ်၊ ဘည်ဂြူပ်ဖြား၊ မင်္ဂလာဂုဏ်တော်ဖြား(38)ဖြာ၊ ဘည်တိုန်းမေတ္တာ၊ ဘည်ကဆာင်းကုသိုလ်၊ ဘည်ကခြောန်ဗုဒ္ဓဝူန် ကာည်း ဘည်လိုနံပ်ပိင်ငျာ ဝိပဿနာဘာဝနာ ပ္လံက်တံင်ဇူႈ ကဒါႇတအာင်း။
ဆာ်မိုႈ ႎါင်ပနောနီန် ကကာႈပနောဟာဝ်း ချှံန်တာန်းဒဲႇ၊ ချှံန်တာန်းကဒည် ကာည်း ချှံန်တာန်းဇာရ် ဇူႈ အခိင်ခီညှာ(9:00)နြီ ရောတ်စာ်မ်း အခိင်စူန်အံပ်(4:00)နြီ ပနောဒဲႈဟာဝ်းတောန်ဆငည်း။ ႎါင်ပနောနီန် အီဆာ်ႈအွံရ်ပနောဒဲႈမိုႈ စဝ်ဆြာ ဘဒ္ဒန္တသုန္ဒရ၊ ဘဒ္ဒန္တပညာနန္ဒ၊ ဘဒ္ဒန္တအာစိဏ္ဏ၊ တောပ်ဘိုး စဝ်ဆြာကဲအီဟံရ် ကာည်း တာဆြာ/ယာဆြာဂဲ ပနောဒဲႈဟာဝ်း တကောန်ကျောင်ဂဲအောႏ။
စဝ်ဆြာဘဒ္ဒန္တပညာနန္ဒ ဟောက္လာင်းဒါႈ ပ်ုန်ကယေင်ႎိူဝ်ႈႎါင်ပနောနီန်မိုႈ ဘည်ကဆီုဝ်ကောန်ကျောင်ဂဲ မောကံပ်မိူဝ်ႈဒေဲႈလှညီမ်မှိူမ် ဘည်ဂေါည်ဘည်ဟာဝ်း၊ နောႈဖိူမ် ကာည်း တြားကံမ်ကျံင်တိုပေန်၊ လံပ်ဘာသာ၊ ဘည်လိုဆမားနံပ်ပိင်ငျာ လှညီမ်မှိူမ်ပ္လံက်တံင်ဇူႈ ၊ ဘည်လိုဆမားကြောႈက္လာင်း ခေဲင်ခနားတိုအီးဂီုန်း ကာည်း ဘည်လိုထိင်ခြဲ အူန်းတိုအယ်မိူဝ်ႈတာန်းဖိုး။ ႎါည်ဒီန် အာပ်ချဒဲႈဟာဝ်း ပ္လါႇဘေဲႇအံင်လာက်မှာတ်၊ ပ္လါႇဘေဲႇဆုလှိုပ်ဂုင်ကာည်း ဆုပ်ုန်ယျာႈနောႈ တကောန်ကျောင်ဂဲ အီလှမ်ဘေဲႇ ခေဲင်ဇိုချီုင်ႎါင်ပနောနီန်။
မိုႈဘိုး ဘံန်ဟောည်ႇဒေဲႈ ခေဲင်ကျံရ်တောရ်ဒိူန်မာ် ႎိူဝ်ႈပနောဒဲႈဟာဝ်း ဗုဒ္ဓဘာသာပ္လံက်တံင်ဇူႈ၊ လှညီမ်မှိူမ် ကာည်း တြားကံမ်ကျံင်တို ကောန်ကျောင်ဂဲ ပရဝ်ရဝ်ခ်ု ကာည်း ရဝ်အာရာမ် လှံင်အိုမ်ယ်ုရ်၊ အီဟိုက်မိုႈ ကောန်ကျောင် Grade-5 ရောတ် Grade-12 ကစုကပိုမ်(300)အီးလှိူဝ်း ဟိုက်ဒေဲႈပနောအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists