ဖုင်ကာ်မ်မတီဇီုင်းကာန်ႎီရ်ပျိူဝ်ႇယိူဝ်ႇ အာပ်ဒဲႈပ္လါႇဘေဲႇလှိုပ်ဂုင် တကညာအီကဇောည်ထာ့်ဒဲႈရိူန်း တတိုအီးကတူႈဖေးဂဲ ဘည်ပဲန်ယာမ်ႏဇ်ုမ်ပဒူႈ ပရဝ်ကောင်တံပ် လှံင်အေဲမ်ခြီရ်
04 July 2026
ဖုင်ကာ်မ်မတီဇီုင်းကာန်ႎီရ်ပျိူဝ်ႇယိူဝ်ႇ အာပ်ဒဲႈပ္လါႇဘေဲႇလှိုပ်ဂုင် တကညာအီကဇောည်ထာ့်ဒဲႈရိူန်း တတိုအီးကတူႈဖေးဂဲ ဘည်ပဲန်ယာမ်ႏဇ်ုမ်ပဒူႈ ပရဝ်ကောင်တံပ် လှံင်အေဲမ်ခြီရ်
အေဲမ်ခြီရ်၊ ကျံရ်တောရ် ဆငည်း(4)
ဆဒါင်ကုင်တအာင်း
ဖုင်ကာ်မ်မတီဇီုင်းကာန်ႎီရ်ပျိူဝ်ႇယိူဝ်ႇဂဲ ပ္လိူရ်ႈလေဒါႈ ကျံရ်ပူရ် ဆငည်း(2)ဒိူန် အာပ်ဒဲႈပ္လါႇဘေဲႇလှိုပ်ဂုင် တကညာအီလှူကဇောည်ထာ့်ဒဲႈရိူန်းတောန်ကဝ် ကာည်း ဖုင်ကပါင်းတောန်ဒီ အီလည်ကဇောည်လည်ကဇိူရ်ႈနောႈ တကူန်ရဝ်မာဂါင်ဂဲအီကတူႈဖေး ဂေါႇဘည်ပဲန်ယာမ်ႏဇ်ုမ်ပဒူႈ ပရဝ်ကောင်တံပ် လှံင်အေဲမ်ခြီရ်၊ အိူင်အေဲမ်ခြီရ်၊ ကုင်တအာင်း၊ ဘံန်ဟောည်ႇဒေဲႈ ကျံရ်ဖံန် ဆငည်း(31)ဒိူန်အောႏ။
ႎါည်ပဲန်ယာမ်ဇ်ုမ်ႏပဒူႈ အခိင်ကူန်ရဝ်မာဂါင်ဂဲ ကတူႈဖေး ကနဲတ်ကမှည်ကနာည်လိုပ်ုန်ကဇောည် ကူန်ရဝ်မာဂါင်ဂဲ အီဂေါည်ခေဲင်ကုင်ကပိုမ် ကာည်း အီဂေါည်ကုင်အီဟံရ်၊ ကညာစေတနာအီလှူဂဲ၊ ဖုင်ကပါင်းဖုင်ဘဝ်ကီုက်ဒါင်းဂဲ၊ ကုမ္ပဏီဂဲ၊ ဖုင်လံပ်ကႎှံက်ဂဲ ကာည်း ဖုင်ကပါင်းပရဟိတဂဲ တောပ်ဘိုး ကညာအီကဇောည်လှူဒဲႈတောန်အီး/တောန်ကဝ် ရောတ်ဒေဲႈကဇောည်လှူထာ့်ဒဲႈခီုတ်အခိင် ဘည်ပ်ုန်လိုကနဲတ်ကမှည် ရိူန်း၊ ဆနံမ်၊ ဂြိုခြီုင်ပ်ုန်ဟောမ်ပ်ုန်ဟာပ် ကာည်း ဂြိုခြီုင်ပ်ုန်လိုဒါခေဲင်ဂါင်ကဲနီန် ။
ဖုင်ကာ်မ်မတီဂဲ ပ္လိူရ်ႈလေႈဒါႈ ဘည်ကဇောည်လှူထာ့်ဒဲႈကဲနီန် ဆဲႈဒါႇ ဘယ်ကဇောည်ပဘိုးပနိုက်ဒဲႈ ပ်ုန်လိုကနဲတ်ကမှည် ရဟောမ်ရမာအီကတူႈဖေးဂဲ အ်ုန်ပဲန်ကဇောည်ထာ့်ဒဲႈဘိုး ကနာည်ဇီုင်းကာန် ႎီရ်ပျိူဝ်ႇယိူဝ်ႇအယ်နီန်အောႏ။
ဆဲႈဒီန် ဂေါႇမိုႈကညာအီကဇောည်လှူဒဲႈဂဲ ကဖြောမ်ကရောမ်တောပ်ခီုတ်အခိင် ကနာည်အီကတူႈဖေး၊ လံက်ကတူႈချူမ်ဟာဝ်းမာ် ဘည်ပဲန်ဒဲႈရဲင်ဘ္လောမ် ခေဲင်နောႈဖိူမ်ဂဲ ပ်ုန်အာန်းရီန်းဘယ်ခ္လေါႈဘိူန် ဘည်ပဲန်လောင်ကီန်းဒည်းကဲနီန် ကာည်း ညူမ်အူန်း နံင်ပဲန်ဒေဲႈ ရဲင်ဘ္လောမ်ခေဲင်နောႈဖိူမ်အယ်ပါ်ဒိုႇဒိုည်ႇ။
ဖုင်ကာ်မ်မတီဇီုင်းကာန်ႎီရ်ပျိူဝ်ႇယိူဝ်ႇ ရဝ်ကောင်တံပ် တာင်ကေးစူးဒါင်း ရနောတိူဝ်ႈအူန်း တအီမိူဝ်ႈစေတနာ ကဇောည်လှူထာ့်ဒဲႈ ကာည်း ကနာည်ကဖြောမ်ကရောမ်တောပ်ဒဲႈ မှာန်းဆူဒဲႈ တကညာအီဇောည်လှူထာ့်ဒဲႈဂဲပါ်ဒိုႇဒိုည်ႇ ဘိူန်းဂေါည်တိုချံမ်ဆာ၊ နောႈချံမ်ဆာ၊ လောတ်ဖေးရာန်တောန်နဲအောႏ။
ဂေါႇဘည်ဒီန် ကနာည်ဇီုင်းကာန်ႎီရ်ပျိူဝ်ႇယိူဝ်ႇ ရဝ်ကောင်တံပ်နီန် အီမိူဝ်ႈစေတနာ ကညာအီကဇောည်လှူထာ့်ဒဲႈဂဲ တောန်ဒီ/တောန်ကဒါႇ ပ်ုန်ဖုင်ကာ်မ်မတီဇီုင်းကာန်ႎီရ်ပျိူဝ်ႇယိူဝ်ႇ လှံင်ရဝ်ကောင်တံပ်ဂဲ ဘိူန်းလံက်ခါမ်အူန်းရိူန်း ရောတ်ကဇေန်နီးမိုႈ ကစုကပိုမ် ရိူန်းဘြာန်(2,413,913,350) ဘျာ ကာည်း ရိူန်းခယ်(253,432)ယွမ်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists