02 July 2026

ကပါင်ဖီုက်လျှံင်ဇီုင်းပိင်ငျာခြိူဝ်းတအာင်း(TEA) တောႇဟိုက်ႎါင်ပနော B.Ed လိူဝ်ႈ(4) ကနာည်ဘယ်ပြိူဝ်ႈလေႈ အီထာမ်းဇီုင်းကပ္လိူင်လံပ်ပိင်ငျာနိုက်နိုက်

အိုမ်ယ်ုရ်၊ ကျံရ်ပူရ် ဆငည်း (2)
ဆဒါင်ကုင်တအာင်း

ကပါင်ဖီုက်လျှံင်ဇီုင်းပိင်ငျာခြိူဝ်းတအာင်း (Ta'ang Education Academy - TEA)ဂဲ ပ္လိူရ်ႈလေႈဒါႈ ဇူႈတောႇဟိုက်ႎါင်ပနော ကောန်အီမာည်း/ကောန်အီပ်ုန်(100)အီး ဟိုက်ႎါင်ပနော B.Ed.လိူဝ်ႈ(4) ကနာည်ဆန်ုမ်ပနောဘေဲႇ2026-2027နီန် ပ်ုန်ကယေင်ႎိူဝ်ႈဟာဝ်း ႎါပနောနီန်မိုႈ ကနာည်ဘယ်ပျိူဝ်ႇယိူဝ်ႇ တာဆြာ/ယာဆြာ အီနံပ်ဆမား ဆနီတ်လံပ်ပိင်ငျာႎှဲတ်ရဲရ် ကာည်း မောကံပ်ဘယ်ပြိူဝ်ႈလေႈ အီထာမ်းဇီုင်းကပ္လိူင် လံပ်ပိင်ငျာနိုက်နိုက် ခေဲင်ကုင်တအာင်းအောႏ။

ႎါင်ပနော B.Ed. နီန် မိုႈႎါင်ပနောဘွည်ႇလံပ်ပိင်ငျာ နံင်လိုဟိုက်ဟာဝ်း လှေင်(4)ဆန်ုမ်၊ နံင်ႎိူဝ်ႈပနောဟာဝ်း တောပ်ဘည်အဆာင်း ခေဲင်ဆန်ုမ်ပနောအူ၊ ခေဲင်ဆန်ုမ်ပနောအာရ်၊ ခေဲင်ဆန်ုမ်ပနောအိုည်၊ ခေဲင်ဆန်ုမ်ပနောဖိုန်။ ဆာ်အယ်ဟောည်ႇဟိုက်ဟာဝ်းႎါင်ပနောနီန် (2)ဆန်ုမ် နံင်ဘိူန်း Diploma in Education၊ ဆာ်အယ်ဟောည်ႇဟိုက်ႎါင်ပနောခေဲင် (4)ဆန်ုမ် နံင်အာပ်ဒဲႈဟာဝ်းဘွည်ႇ Bachelor of Education (B.Ed.)နီန်အောႏ။

ဘည်ကဆီုဝ်အီဟိုက်ႎါင်ပနောဂဲ တောန်ဆန်ုမ်ပနောဘေဲႇ ကျောင်ပိင်ငျာပ္လံက်တံင်ဇူႈ အီဂေါည်ရခြူမ် ကောင်ဆံရ်ဇီုင်းပိင်ငျာကုင်တအာင်း(TLEC) ဂဲကတူႈလေႈရေဲန်ပနောအခ်ု (Teaching Practice) ကပိုမ်ပနောဒဲႈဟာဝ်း ဇီုင်းကာန်ဘည်ပနောအခ်ု ကာည်း သိအိုရီကဲနီန်။ 

ဘည်ပ္လပ္လေႈအူန်း အီဘိူန်းပနိုက်ဟြာင်းဟိုက်ပ္လါႇဘေဲႇနီန်မိုႈ ကောန်ကျောင်အီအံင် ဆနီတ်ပြီမ်(G-10)တာန်း ကာည်း အီအံင်ဆနီတ်ကမာည်း (G-12) အီဘိူန်းအဆာင်းချှံန် A၊ B၊ C ကဲနီန် ဘိူန်းဟြာင်းဟိုက်ႎါင်ပနောနီန်။ ဆဲႈဒီန် ဂဲပ္လိူရ်ႈနှဲအူန်းခေဲင်ပ္လါႇဘေဲႇဒါႈ အီဘိူန်းကနှေရ်တောပ် ဘည်ပ္လပ္လေႈအူန်းနီန် ကံမ်ခြိူဝ်းမျိုးလှေမိုႈ ဘိူန်းဟြာင်းဟိုက်ႎါင်ပနောနီန်။ ႎါင်ပနော B.Ed.လိူဝ်ႈ(4)နီန် နံင်ဇူႈႎိူဝ်ႈဟာဝ်း ဆန်ုမ်2026 ခေဲင်ကျံရ်တာရ် နံင်လာက်ခါမ်ဟြာင်းဟိုက်ပ္လါႇဘေဲႇရဘံန်ဆူတ်ဆူတ် ကျံရ်ပူရ် ဆငည်း(15)နီန်။

ႎါင်ပနောကျောင်TEAနီန် ဘည်ပနောဟာဝ်း ဘာသာလံပ်ပိင်ငျာမိုႈ ဘေဲႇမြန်မာ၊ အဂလိက်၊  သင်္ချာ၊ သမိုင်း၊ ပထဝီဝင်၊ ရူပဗေဒ၊ ဓာတုဗေဒ၊ ဇီဝဗေဒ ကာည်း ဘောဂဗေဒကဲနီန်။ ဆဲႈဒီန် ကဲဟံပ်ပနောဟာဝ်းဘိုး အနုပိင်ငျာ၊ ကာယပိင်ငျာ၊ ပနောတောပ်ဘည်အရာပ်အရာ၊ အချာက်ဆဒါင် ကာည်း နီပိင်ငျာ (ICT)၊ ဘည်လိုနံပ်ဆမားဇိုဇာတ်၊ စာရိတ္တ ကာည်း ဘည်ပျေတူ့နီတိကဲနီန်။ ပ်ုန်ဟံပ်ပဘိုး ပနောဟာဝ်းမိုႈ ဘေဲႇလူမ်တအာင်း၊ English (Four Corners) ကာည်း ကဆီုဝ်ကဆဲင် ဘည်ပ္လချှာင်ဂါင်ဒီတိူရ်ႈဘေဲႇကဲနီန်အောႏ။ 

ဆဲႈဒါႇဒီန် ဂဲပ္လိူရ်ႈနှဲအူန်းဒါႈ ကျောင်TEA နီန် ဘိူန်းလောတ်လာပ် အာဝ်မိူဝ်ႈကကာႈယံင်နှာမ် အူန်းမိူဝ်ႈတာန်းဖိုး ဆနီတ်လံပ်ပိင်ငျာ ပနောဒဲႈဟာဝ်း တောပ်ဘာည်းတံင်ဇူႈ ဆနီတ်လံပ်ပိင်ငျာႎှဲတ်ဒရဲရ်။ ကဆီုဝ်အီဟောည်ႇလေႈဟာဝ်းကျောင်ကဲဒီန်မာ် နံင်ဒဲႈဂဲထာမ်းဟာဝ်းဇီုင်းကပ္လိူင် ပကျောင်ပနောဘေဲႇပ္လံက်တံင်ဇူႈ အီမိုႈရခြူမ် ကောင်ဆံရ်ဇီုင်းပိင်ငျာကုင်တအာင်း(TLEC) ဆဲႈဒီန် ဆာ်မိုႈအီလှဲမ်ဘေဲႇနိုက်ဂဲဒိူန်မာ် နံင်ရေဲန်ဒဲႈဂဲဘိူန်းအခွါင်းအရေး ဆီုပ်ပနောဟာဝ်း ကနာည်လံပ်ပိင်ငျာ ချှံန်တက္ကသိုလ် ကာည်း ဘဝ်ကီုက်လံပ်ပိင်ငျာကောလိက်ကဲနီန်။

ကျောင်အကယ်ဒမီလံပ်ပိင်ငျာတအာင်း(TEA)နီန် ပ်ုန်ႎိူဝ်ႈအီဘိူန်ဒေဲႈ လိူဝ်ႈ(1)၊ လိူဝ်ႈ(2) ကာည်း လိူဝ်ႈ(3)ကဲဒိူန် ဟောည်ႇဘယ်ပြိူဝ်ႈလေႈ တာဆြာ/ယာဆြာ ကစုကပိုမ်(275)အီး။ ကဇေန်နီး အီလေႈဟာဝ်းႎါင်ပနော တာဆြာ/ယာဆြာကဲဒီန် ထာမ်းအူန်းဇီုင်းကပ္လိူင် ပကျောင်ပနောပ္လံက်တံင်ဇူႈ အီဂေါည်ရခြူမ် ကောင်ဆံရ်ဇီုင်းပိင်ငျာကုင်တအာင်း(TLEC) ဂဲကပိုမ်ရေဲန်ဟာဝ်းတောပ် ဘည်မိုႈတံင်အရာင်းရဲင်ဘ္လောမ်တိုအီး ကနာည်လံပ်ပိင်ငျာ ကုင်တအာင်း မောကံပ်ကတာရ်ႈဒါင်းဇာရ်။

ကဆီုဝ်အီနံင်ဟြာင်းဟိုက်ႎါင်ပနော ကျောင်အကယ်ဒမီနီန် နံင်လိုပနိုက်ဟြာင်းဟိုက် ပ္လါႇဘေဲႇရဘံန်းဆူတ် အာည်ႇရောတ်စာ်မ်း ကျံရ်ပူရ် ဆငည်း(15) ဒီဘိူန်းဟြာင်းဟိုက်ပ္လါႇဘေဲႇ ဆဲႈဒါႈပလူမ်လံပ်ပိင်ငျာလှံင်ကဲနီန် ဘိူန်းအူန်းပနိုက်ဟြာင်းဟိုက်ပ္လါႇဘေဲႇ တောပ်လိူည် ဘာည်းဒဲႈအူန်း Google Fromနီန်အောႏ။

ဒီဘိူန်းထုက်လာည်း/ ဒီဘိူန်းတိုန်းပ္လါႇဘေဲႇ

- လူမ်လံပ်ပိင်ငျာ TLEC တောပ်ဘည်ဂေါည်လှံင်
- https://forms.gle/FKpfj95VfDemrq7UA (ဘိူန်းဒါ Google Form )
- [email protected]
- Ta'ang Education Academy - Facebook Page Chat Box

#PSLF/TNLA
#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း