ပရဝ်ရဝ်ခ်ု ရေဲန်ပ္လေါည်ႎိူဝ်ႈႎါင်ပနော ကနာည်ပဇာရ်ပ်ုန်နံပ်ဆမားလှညီမ်မှိူမ်ကာည်း တြားဆမားကံမ်ကျံင်တို ကောန်ဒဲႇယိူဝ်ႇဘံန်းဂဲ
22 June 2026
ပရဝ်ရဝ်ခ်ု ရေဲန်ပ္လေါည်ႎိူဝ်ႈႎါင်ပနော ကနာည်ပဇာရ်ပ်ုန်နံပ်ဆမားလှညီမ်မှိူမ်ကာည်း တြားဆမားကံမ်ကျံင်တို ကောန်ဒဲႇယိူဝ်ႇဘံန်းဂဲ
အိုမ်ယ်ုရ်၊ ကျံရ်တောရ် ဆငည်း(22)
ဆဒါင်ကုင်တအာင်း
ကုင်တအာင်း၊ အိူင်အိုမ်ယ်ုရ်၊ လှံင်အိုမ်ယ်ုရ်၊ ပရဝ်ရဝ်ခ်ု စဝ်ဒါင်း ဘဒ္ဒန္တပညာနန္ဒ ဆာ်ႈအွံရ် ရေဲန်ပ္လေါည်ႎိူဝ်ႈႎါင်ပနောလှညီမ်မှိူမ် ဗုဒ္ဓဘာသာ ပ္လံက်တံင်ဇူႈ ကဒါႇတအာင်း လှေင်(5)ဆငည်း ကနာည်ပဇာရ်ပ်ုန်နံပ်ဆမားလှညီမ်မှိူမ်ကာည်း တြားဆမားကံမ်ကျံင်တို ကောန်ဒဲႇယိူဝ်ႇဘံန်းဂဲအောႏ။
ႎါင်ပနောနီန် ကောန်ကျောင် Grade-5 ရောတ် Grade-12 ကစုကပိုမ်(150)အီး ဟိုက်ရောတ်ဒေဲႈ ပနော။ ပ်ုန်ကယေင်ႎိူဝ်ႈဟာဝ်းႎါင်ပနောနီန်မိုႈ ဘည်ကဆီုဝ်ကောန်ဒဲႇတအာင်းယိူဝ်ႇဘံန်းဂဲ မောကံပ်ဆမားနံပ် ပိင်ငျာပ္လံက်တံင်ဇူႈ လှညီမ်မှိူမ် ကာည်း လံပ်ဘာသာကဲနီန်။
ခေဲင်ႎါင်ပနောနီန် ပနောဒဲႈဟာဝ်း လှညီမ်မှိူမ်ဗုဒ္ဓဘာသာပ္လံက်တံင်ဇူႈ၊ ဂုဏ်တော်ဖြား(38)ဖြာ၊ မေတ္တာသုတ်၊ ဘည်တာင်ဆောမ်၊ ဘည်ကာပ်ဆောမ်၊ ဘည်တိုန်းမေတ္တာ၊ ဘည်ကဆာင်းကုသိုလ်၊ ဘည်ကခြောန်ဗုဒ္ဓဝူန် ကာည်း ဘည်လိုနံပ်ပိင်ငျာပ္လံက်တံင်ဇူႈဝိပဿနာဘာဝနာကဲနီန် ကဒါႇတအာင်း။
ႎါင်ပနောနီန် ဇူႈႎိူဝ်ႈဟာဝ်း ခည်မိုႈ ကျံရ်တောရ် ဆငည်း(11)ဆငည်း(15)ဒိူန် ႎိူဝ်ႈပနောဟာဝ်းလှေင်(5)ဆငည်း။ ကကာႈပနောဟာဝ်း ချှံန်တာန်းဒဲႇ၊ ချှံန်တာန်းကဒည် ကာည်း ချှံန်တာန်းဇာရ် ဇူႈ အခိင်ခီညှာ(9:00)နြီ ရောတ်စာ်မ်း အခိင်စူန်အံပ်(4:00)နြီ ပနောဒဲႈဟာဝ်းတောန်ဆငည်း။ ႎါင်ပနောနီန် စဝ်ဆြာ ဘဒ္ဒန္တသုန္ဒရ၊ ဘဒ္ဒန္တပညာနန္ဒ၊ ဘဒ္ဒန္တအာစိဏ္ဏ၊ တောပ်ဘိုး စဝ်ဆြာကဲအီဟံရ် ကာည်း တာဆြာ/ယာဆြာဂဲ ပနောဒဲႈဟာဝ်း ဘည်လိုဆမားနံပ်ပိင်ငျာလံပ်ဘာသာ၊ ဘည်လိုနံပ်လှညီမ်မှိူမ် ကာည်း တြားကံမ်ကျံင်တိုပေန်ကဲနီန် တကောန်ကျောင်ဂဲ။
စဝ်ဆြာဘဒ္ဒန္တပညာနန္ဒ ဟောက္လာင်းဒါႈ ပ်ုန်ကယေင်ႎိူဝ်ႈႎါင်ပနောနီန်မိုႈ ဘည်ကဆီုဝ်ကောန်ကျောင်ဂဲ မောကံပ်မိူဝ်ႈဒေဲႈလှညီမ်မှိူမ် ဘည်ဂေါည်ဘည်ဟာဝ်း၊ နောႈဖိူမ် ကာည်း တြားကံမ်ကျံင်တိုပေန်၊ လံပ်ဘာသာ၊ ဘည်လိုနံပ်ပိင်ငျာပ္လံက်တံင်ဇူႈ လှညီမ်မှိူမ်ကတာ်န်းဒေဲႈ၊ ဘည်လိုဆမားကြောႈက္လာင်း ခေဲင်ခနားတိုအီးဂီုန်း ကာည်း ဘည်လိုထိင်ခြဲ အူန်းတာန်းဖိုး ဘေဲႇဘာန်းကူန်တာမာယာအယ်။ ႎါည်ဒီန် လှိုပ်ဂုင်ချဒဲႈဟာဝ်းဆု တကောန်ကျောင်ဂဲ အီလှမ်ဘေဲႇ ခေဲင်ဇိုချီုင်ႎါင်ပနောနီန်။
ဘည်ပနောဒဲႈဟာဝ်း လံပ်ဘာသာ၊ လှညီမ်မှိူမ် ကာည်း တြားကံမ်ကျံင်တို တကောန်ဒဲႇအီယိူဝ်ႇဘံန်းဂဲ ကဲနီန်မိုႈ မောကံပ်ဘယ်ပြိူဝ်ႈလေႈ ကောန်ဒဲႇ အီဘယ်ရေဲန်ဒဲႈအကျိုး ဇိုဇာတ်တိုအီး ကာည်း ဘယ်ထိင်ခြဲတိူရ်ႈမေန်းထုင်ရိုဘိုဇေန် လှညီမ်မှိူမ်ကဲနီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists