ဖုင်ဘေဲႇတအာင်း-TLA ရေဲန်ဟောည်ႇပ္လေါည်ပ္လိုတ်ႎါင်ပနော ဖီုက်လျှံင်ပဇာရ်ဒဲႈ ဘည်ပနောဘေဲႇတအာင်း တတာဆြာ/ယာဆြာ
19 June 2026
ဖုင်ဘေဲႇတအာင်း-TLA ရေဲန်ဟောည်ႇပ္လေါည်ပ္လိုတ်ႎါင်ပနော ဖီုက်လျှံင်ပဇာရ်ဒဲႈ ဘည်ပနောဘေဲႇတအာင်း တတာဆြာ/ယာဆြာ
အိုမ်ယ်ုရ်၊ ကျံရ်တောရ် ဆငည်း(19)
ဆဒါင်ကုင်တအာင်း
ဖုင်ဘေဲႇတအာင်း-TLA ဆာ်ႈအွံရ်ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ဖီုက်လျှံင်ပဇာရ်ဒဲႈ ဘည်ပနောဘေဲႇတအာင်း တတာဆြာ/ယာဆြာဂဲ မောကံပ်ဘယ်ပနောဒဲႈဘေဲႇတအာင်း ကာည်း မောကံပ်ဘယ်ပဇာရ်ဒဲႈ အိုမ်လှဘေဲႇတအာင်း တကောန်ကျောင်ဂဲ ပလှံင်အိုမ်ယ်ုရ်၊ လှံင်မိူင်လိုင်၊ လှံင်ရူကော၊ လှံင်အိုမ်ငျံရ် ကာည်း လှံင်အေဲမ်ခြီရ် ခေဲင်ကုင်တအာင်း။
ႎါင်ပနောနီန် ဇူႈႎိူဝ်ႈဟာဝ်း ဘံန်ဟောည်ႇဒေဲႈ ကျံရ်တောရ် ဆငည်း(2)ဒိူန် တတာဆြာ/ယာဆြာဂဲ အီဂေါည်ရခြူမ်ကောင်ဆံရ်ဇီုင်းပိင်ငျာကုင်တအာင်း-TLEC ပလှံင်အေဲမ်ခြီရ် ယာဆြာအီဟိုက်ဂေါည် (43)အီး ကာည်း တာဆြာအီဟိုက်ဂေါည်(13)အီး ကစုကပိုမ်ဂေါည်(56)အီး ဟိုက်ဒေဲႈပနောဟာဝ်း။ ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ခည်မိုႈကျံရ်တောရ် ဆငည်း(12)ဒိူန်။
မိုႈဘိုး ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ဖီုက်လျှံင်ပဇာရ်ဒဲႈ ဘည်ပနောဘေဲႇတအာင်း ပလှံင်ရူကော တာဆြာ/ယာဆြာဂဲ(28)အီး၊ ပလှံင်အိုမ်ယ်ုရ် တာဆြာ/ယာဆြာဂဲ(33)အီး ကာည်း လှံင်မိူင်လိုင် တာဆြာ/ယာဆြာ(20)အီး ခည်မိုႈ ကျံရ်တောရ် ဆငည်း(11)ဒိူန်။
ဆဲႈဒါႇဒီန် ပလှံင်အိုမ်ငျံရ်မာ် ႎိူဝ်ႈပနောဟောည်ႇဟာဝ်း ႎါင်ပနောဘေဲႇတအာင်းနီန် အီရံပ်ဇီုင်းကပ္လိူင်ဂဲ(13)အီးဟိုက်ဒေဲႈပနောဟာဝ်း။ ပ်ုန်ႎိူဝ်ႈဟာဝ်းႎါင်ပနောဘေဲႇတအာင်းနီန် အီဂေါည်ခေဲင်လှံင် တောန်ဒီတောန်ကဒါႇ ကစုကပိုမ်(150)အီး ဟိုက်ဒေဲႈပနောဟောည်ႇဟာဝ်း။
ခေဲင်ဇိုချီုင်ႎိူဝ်ႈႎါင်ပနောနီန် ပနောဒဲႈဟာဝ်း ဘည်ဒီရ်ႈဘေဲႇတအာင်း၊ ဘည်ကိက်ဘေဲႇတအာင်း၊ ဘည်ဆနီတ်လိုပနော ကာည်း ဘည်အိုမ်လှကြောႈဖာဆာကဲနီန် ကတီးကရီး၊ ဘည်ကဆီုဝ်တာဆြာ/ယာဆြာ အီဟိုက်ဟောည်ႇႎါင်ပနောဘေဲႇတအာင်းနီန် မောကံပ်ဘယ် ဝီရ်ပနောဒဲႈဟာဝ်း တကောန်ကျောင်ဂဲ ကာည်း အီရံပ်ဇီုင်းကပ္လိူင်တီုင်ဌာနကဲနီန်အောႏ။
ပ္လေါည်ပ္လိုတ်ႎါင်ပနောနီန် ဖုင်ဘေဲႇတအာင်း-TLA အာပ်ချဒဲႈဟာဝ်းဆု တတာဆြာ/ယာဆြာဂဲ အီလှမ်ဘေဲႇ ကာည်း အံင်လာက်မှာတ်(Certificates) တတာဆြာ/ယာဆြာဂဲ အီဟိုက်ဟောည်ႇဟာဝ်း ခေဲင်ဇိုချီုင်ဟိုက်ႎါင်ပနောနီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists