ရေဲန်ပ္လေါည်ပ္လိုတ်ႎါင်ပနော ပဇာရ်ဘည်လိုကဇောည်ပျံတ်ယံတ်ငံရ် ကာည်း ဖေးဆဖာဝတောန်နဲ လိူဝ်ႈ(1) ပလှံင်မိူင်လိုင်
18 June 2026
ရေဲန်ပ္လေါည်ပ္လိုတ်ႎါင်ပနော ပဇာရ်ဘည်လိုကဇောည်ပျံတ်ယံတ်ငံရ် ကာည်း ဖေးဆဖာဝတောန်နဲ လိူဝ်ႈ(1) ပလှံင်မိူင်လိုင်
မိူင်လိုင်၊ ကျံရ်တောရ် ဆငည်း(18)
ဆဒါင်ကုင်တအာင်း
ကုင်တအာင်း၊ အိူင်အိုမ်ယ်ုရ်၊ ပလှံင်မိူင်လိုင် ဘည်ကယေင်ႎိူဝ်ႈဟာဝ်း ႎါင်ပနောနီန်မိုႈ ဇိုချီုင်ကတူႈကငျား အန္တရာယ်ဖေးငံရ် ကာည်း ဘည်မိုႈဘည်ဘာည်း ဆဖာဝဖေးတောန်နဲ မောကံပ်ဘယ်ကဇောည်ဒဲႈတောပ်ဘာည်းအခိင် ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ပဇာရ်ဘည်လိုကဇောည်ပျံတ်ယံတ်ငံရ် လိူဝ်ႈ(1) ခည်မိုႈကျံရ်တောရ် ဆငည်း(16)ဒိူန်အောႏ။
ပ္လေါည်ပ္လိုတ်ႎါင်ပနောနီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA အီဆာ်ႈအွံရ် ဖုင်ပျံတ်ယံတ်ငံရ် တာမ်ခူန်အွံရ်ဒါင်း တားတံင်ရိူန်း၊ တားအရာပ်လှံင်မိူင်လိုင် ခူန်နာန်းနောဂါင်၊ တာဆြာႎါင်ပနောဂဲ၊ အီရံပ်ဇီုင်းကပ္လိူင် တီုင်ဌာနဂဲ၊ ကူန်ရဝ်မာဂါင်ဂဲ ကာည်း အီဟိုက်ႎါင်ပနောဂဲ ကစုကပိုမ်ဂေါည်(40)အီးလှိူဝ်း ဟိုက်ရောတ်ဒေဲႈ။
ႎါင်ပနောနီန် ႎိူဝ်ႈပနောဟာဝ်းလှေင်(17)ဆငည်း ဖုင်ပျံတ်ယံတ်ငံရ် အီဟိုက်ႎါင်ပနောဂေါည်(15)အီး။ ခေဲင်ႎါင်ပနောနီန် ပနောဒဲႈဟာဝ်း ဘည်လိုဒါအခ်ု ဇိုချီုင်ရေဲန်ဇီုင်းကာန် ဘည်လိုကဇောည်ဒံန်ခြဲ ပျံတ်ယံတ်ငံရ် ကာည်း ဘည်လိုကဇောည်ကဲနီန် ကတီးကရီး။
ဇိုချီုင်ႎါင်ပနောနီန် ဖီုက်လျှံင်ပနောရေဲန်နှဲဒဲႈဟာဝ်းအခ်ု ဘည်ဒါကဘဲဝ်ဆနံမ်ပျံတ်ငံရ် ၊ ဘည်ဒါအဆာင်းဇာရ် တော်အိုမ်ပျံတ်ငံရ်၊ ဘည်ဒါဗျူဟာ ပျံတ်ယံတ်ငံရ်၊ ဇီုင်းကာန်တီပ်ဟြီုက် ဘည်လိုကဇောည် ကာည်း ဒေင်ပိင်ငျာ ဘည်လိုဆနံမ်ဒဲႈကဲနီန်။
ပ္လေါည်ပ္လိုတ်ႎါင်ပနောနီန် PSLF/TNLA အီဆာ်ႈအွံရ် ဖုင်ပျံတ်ယံတ်ငံရ် တာမ်ခူန်အွံရ်ဒါင်း တားတံင်ရိူန်း က္လာင်းဆာင်လာင်းဟာဝ်း ဘည်မိုႈဘည်ဘာည်း ႎိူဝ်ႈပနောနီန် ဘည်ကဆီုဝ်အီဟိုက်ႎါင်ပနောဂဲ ပိင်ငျာပ်ုန်ပနောဘိူန်းဟာဝ်း လိုဝီရ်ဘယ်ဒါအခ်ု ဘည်လိုကဖြောမ်ကရောမ်ရေဲန်တောပ် လံပ်ဒံန်ခြဲ ဇိုချီုင်ပဲန်အန္တရာယ်ဖေးငံရ် ကာည်း ဇီုင်းကာန်ဘည်လိုကဇောည်ဒဲႈကဲနီန် ကတီးကရီး။
ႎါည်ဒီန် အာပ်ချဒဲႈဟာဝ်းဆု တအီလှဲမ် ဘည်မိူဝ်ႈဆနီတ်တောပ်ခေါပ်ပြာႇ၊ ဘည်မိူဝ်ႈနောႈဆိင်ရေဲန်၊ ဘည်မိူဝ်ႈအိုမ်လှ လံပ်ဖီုက်လျှံင် ကာည်း ဘည်ကဖြောမ်ကရောမ် ရေဲန်တောပ်ဇိုချီုင်ႎါင်ပနောနီန်။
ဘည်ႎိူဝ်ႈဟာဝ်းႎါင်ပနော ဇီုင်းကာန်ကဇောည်ပျံတ်ငံရ်နီန်မိုႈ မောကံပ်ဘယ်ဇီုင်းကာန် ဘည်လိုကဇောည်ဒံန်ခြဲဒဲႈ အဆာက်၊ ဖေးတိုပိုင်း၊ ရဝ်ဂါင် ကာည်း ဂြိုခြီုင်တောန်နဲ တကူန်ရဝ်မာဂါင်ဂဲ ဇိုချီုင်ကတူႈအန္တရာယ်ဖေးငံရ် ကာည်း ဖေးဆဖာဝတောန်မျိုး တောပ်ဘာည်းအခိင်။ ဆိင်ပ္လူႈဆဒိ ဘည်ကဆီုဝ်ကူန်ရဝ်မာဂါင်ဂဲ ဆာ်မိူဝ်ႈကတူႈကငျား ဇိုချီုင်ကနဲတ်ကမှည် အန္တရာယ်ဖေးငံရ် ကာည်း ဆဖာဝတောန်မျိုးကဲနီန် လိုဟြာင်းဟိုက်ဆဒါင် တအီရံပ်ဇီုင်းကပ္လိူင်ဂဲချာ်န်းချာ်န်းအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists