ကောင်ဆံရ်ဇီုင်းပိင်ငျာကုင်တအာင်း-TLECဂဲ နံင်ႎိူဝ်ႈပနောဟာဝ်း ကျောင်ပနောဘေဲႇ (400)ကျောင်လှိူဝ်း ခေဲင်ကုင်တအာင်း
17 June 2026
ကောင်ဆံရ်ဇီုင်းပိင်ငျာကုင်တအာင်း-TLECဂဲ နံင်ႎိူဝ်ႈပနောဟာဝ်း ကျောင်ပနောဘေဲႇ (400)ကျောင်လှိူဝ်း ခေဲင်ကုင်တအာင်း
အိုမ်ယ်ုရ်၊ ကျံရ်တောရ် ဆငည်း(17)
ဆဒါင်ကုင်တအာင်း
ခေဲင်ဆန်ုမ်ပနောဘေဲႇ 2026-2027နီန် ကောင်ဆံရ်ဇီုင်းပိင်ငျာကုင်တအာင်း(Ta’ang Land Education Council - TLEC) ဂဲ နံင်ႎိူဝ်ႈပနောဟာဝ်း ကျောင်ပနောဘေဲႇ ကစုကပိုမ်(400)ကျောင်လှိူဝ်း ခေဲင်ကုင်တအာင်းအောႏ။
ကောင်ဆံရ်ဇီုင်းပိင်ငျာကုင်တအာင်း-TLECဂဲ ဇူႈႎိူဝ်ႈဟာဝ်းကျောင်ပနောဘေဲႇ ခည်မိုႈ ကျံရ်တောရ် ဆငည်း(8)ဒိူန် ဂဲဆာ်ႈဟိုရ်ပ္လူႈဆဒိဒါႈ ဘည်ကဆီုဝ်ကူန်မာကောန်ဒဲႇဂဲ အီညှံမ်အာပ်ကောန်ဒဲႇ ဟိုက်ကျောင်ဂဲဒိူန် ဘိူန်းအူန်းရောတ်ဒေဲႈအာပ်ဟာဝ်း။ ကျောင်ပနောဘေဲႇ ပ်ုန်ႎိူဝ်ႈဟာဝ်းခေဲင် (400)ကျောင်လှိူဝ်းနီန် ကောန်ကျောင်အီဟိုက်ဂေါည်(5)မူန်လှိူဝ်း။
ဆဲႈဒါႇဒီန် ဂဲပ်ုန်ယေင် မောကံပ်ကောန်ကျောင်ဂဲ ဒါဂြူဟိုက်ကျောင်ငှိူည်၊ မောကံပ်ကညားကနှေရ် ဘည်မိုႈဘည်ဘာည်း အရာပ်အရာ ကာည်း မောကံပ်ဟာဝ်းဝီရ်ရည်းငှိူည် ဂဲဝီရ်ဘြဲဆားပ္လဟာဝ်း ဘည်ဒါဂြူဟိုက်ကျောင် ခေဲင်ဆန်ုမ်ပနောဘေဲႇနီန်အောႏ။
ကနာည်ကောန်ကျောင်ဂဲ နံင်ဘိူန်းဒါဂြူကမာည်းဟိုက်ကျောင် ရီန်းရဲတ်နံင်ဘိူန်းကဆာင်းဒဲႈ ဘံန်နံင်ဒေဲႈ ကျံရ်တာရ် ခေဲင်နှာအူ၊ အာည်ႇဘိူန်းကဆာင်းဒဲႈဟာဝ်း ဂြူဟိုက်ကျောင်ကမာည်းနီန် ဘိူန်းအူန်းဒါဂြူလှေပြီမ် ဟိုက်ကျောင်၊ ဘံန်ဟောည်ႇကဆာင်းဟာဝ်းမာ် ဆာ်မိူဝ်ႈဒီညှံမ်ရောတ် ကာည်း ဒီအာဝ်ဘိူန်းရောတ်ကဲဒိူန် ဘည်ကဆီုဝ်ကောန်ကျောင်ဂဲ ဘိူန်းအူန်းဒါဟာဝ်းလိူည် ဂြူလှေပြီမ် ဟိုက်ကျောင်အောႏ။
ဘည်ကဆီုဝ်ကောင်ဆံရ်ဇီုင်းကုင်တအာင်းဂဲ ပ်ုန်ကကာမ်းရီန်းရဲတ်ရေဲန်ဟာဝ်း ဘည်မိုႈတံင်ရျံရ်ႈ ဆနီတ်လံပ်ပိင်ငျာတီုင်ဒါင်း ရေဲန်မောကံပ်ပဲန် ဆနီတ်လံပ်ပိင်ငျာႎှဲတ်ဒရဲရ်၊ ဒါဘည်မိုႈတံင်ရျံရ်ႈ ကြောႈဖာဆကူန်မာအယ် ဝီရ်ကိက်ဒါ ဘည်ပနောရာင်ဒေ ကာည်း ကောန်ဒဲႇအဆာက် (18)ဆန်ုမ်လေႈရခြူမ် မောကံပ်ဘိူန်းအခွါင်းအရေး ပနောဘေဲႇပါ်ဒိုႇဒိုည်ႇ။
ဆဲႈဒါႇဒီန် ကောင်ဆံရ်ဇီုင်းပိင်ငျာကုင်တအာင်း-TLECဂဲ ဒါင်းဒါင်းအ်ုန် ရီန်းရဲတ်ရေဲန်ဟာဝ်း မောကံပ်ကောန်ကျောင်ဂဲ ဆမားဘယ်ဒေတဂေန်း၊ မောကံပ်ဘယ်ရေဲန်လေႈ ကာည်း ဘည်ဟျံင်တိုပိုင်းအိုမ်လှ ကတာရ်ႈဒါင်းဇာရ်ဒေဲႈ၊ မောကံပ်ဘယ်ပြိူဝ်ႈလေႈ အီဆမား ဘည်လော်င်ပိင်ငျာ ကာည်း မောကံပ်ကောန်ကျောင်ဂဲ ဘိူန်းဆီုပ်ပနောဆနီတ်လံပ်ပိင်ငျာလှေနီန် နိုက်နိုက် ဇူႈတံင်ရျံရ်ႈလံပ်ပိင်ငျာ ရောတ်စာ်မ်းလံပ်ပိင်ငျာချှံန်ဇာရ်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists