29 May 2026

ကောင်ဆံရ်ခေါခါႇကုငတအာင်း-THC ကာည်း THO ကပိုမ် ထိုးဒဲႈဆနံမ်းဒံန်ခြဲ တကောန်ဒဲႇ ကာည်း အီပ်ုန်တိုဇံန် ပလှံင်အိုမ်ယ်ုရ်
 
အိုမ်ယ်ုရ်၊ ကျံရ်ဖံန် ဆငည်း(29)
ဆဒါင်ကုင်တအာင်း

ဖုင်ကပါင်းခေါခါႇတအာင်း-( Ta’ang Health Organization -THO) ကာည်း ကောင်ဆံရ်ခေါခါႇကုင်တအာင်း-(Ta’ang Land Health Council -THC) ကပိုမ် ထိုးဒဲႈဆနံမ်းဒံန်ခြဲ တကောန်ဒဲႇ ကာည်း မာကောန်ဒဲႇတိုဇံန် ပလှံင်အိုမ်ယ်ုရ် ၊ ခေဲင်ကုင်တအာင်း။

ကခံပ်ကယည်ထိုးဒဲႈဆနံမ်းဒံန်ခြဲနီန် နံင် ဇူႈထိုးဒဲႈဟာဝ်း ကျံရ်ဖံန် ဆငည်း(25) ရောတ်စာ်မ်း ဆငည်း(29) ခေဲင်ဇိုချီုင်အူနှာ ပယုင်ဆနံမ်ဒါင်းလှံင်အိုမ်ယ်ုရ် ကုင်တအာင်း၊ ကောင်ဆံရ်ခေါခါႇကုင်တအာင်း-THC ကာည်း THO ဆာ်ႈအွံရ်ထိုးဒဲႈဟာဝ်း ကောန်ဒဲႇအဆာက်(10)ဆန်ုမ်လေႈရခြူမ် ကာည်း မာကောန်ဒဲႇတိုဇံန် တတိုအီးရဝ်ဂဲ၊ အီဂေါည်ခေဲင်လှံင်အိုမ်ယ်ုရ်။

ဆနံမ်းပ်ုန်ထိုးဒဲႈဟာဝ်းမိုႈ BCG Vaccine(ဆနံမ်းဒံန်ခြဲရောဂါတီဘီ)၊ IPV Vaccine(ဆနံမ်းဒံန်ခြဲရောဂါဆနာႇယံမ်း ပိုလီယို)၊ Pentavalent Vaccine (ဆနံမ်းဒံန်ခြဲဖံန်မျိုးကစာပ် ဆနံမ်းဆိုင်ဆိုနာ၊ ဆနံမ်းကအိုက်၊ ဆနံမ်းဘီရ်တိုပိုင်း၊ ဆနံမ်းယံင်တာ်န်းဂါ်ႈပိုင်းနောႈ(Bပိုး))၊ ဆနံမ်းရောဂါ ဆဲဝ်ခေဲင်ဟောႇ ၊ MMR Vaccine(ဆနံမ်းဒံန်ခြဲ ရောဂါကလာအာႈ)၊ JE Vaccine( ဆနံမ်းဒံန်ခြဲ ရောဂါဟောႇတာ်န်း) ကာည်း ကနာည်မာကောန်ဒဲႇတိုဇံန် Td Vaccine(ဆနံမ်းဒံန်ခြဲ ဘီရ်တိုပိုင်းကာည်း ဆိုင်ဆိုနာ)ကဲနီန်အောႏ။

ကခံပ်ကယည်ထိုးဒဲႈဆနံမ်းဒံန်ခြဲနီန် ပ်ုန်ကယေင်မိုႈ နှာင်းဘယ်ဒံန်ခြဲ ဘည်ကတံက်ရောဂါ တကောန်ဒဲႇဂဲ၊ နှာင်းကောန်ဒဲႇဂဲ ကတာရ်ႈဒါင်းဇာရ်ဒေဲႈမှယ်နီန် ကာည်း မောဟောႇဂဲ ကံပ်ကတာရ်ႈဒါင်းဇာရ်ဒေဲႈအောႏ။

ဂေါႇဘည်ဒီန် ဆိင်ဆာ်ႈဟိုရ်ပ္လူႈဆဒိ ဘည်ကဆီုဝ်ကူန်ရဝ်မာဂါင်ဂဲ ဆာ်မိူဝ်ႈကောန်ဒဲႇ အီညှံမ်ထိုးဆနံမ်းဒံန်ခြဲ ကောန်ဒဲႇအဆာက်(10)ဆန်ုမ်လေႈရခြူမ် ဘိူန်းအူန်းဒေဲႈထိုး မောကံပ်ခီုတ်အခိင် ပတီုင်ဌာနခေါခါႇတအာင်း။

မိုႈဘိုး ခေဲင်ကုင်တအာင်း၊ လှံင်ရူကော၊ လှံင်အေဲမ်ခြီရ်၊ လှံင်မိူင်လိုင် ကာည်း လှံင်ကုင်ငှေါမာ် THO ကာည်း THC ကပိုမ် ထိုးဒဲႈဟာဝ်းအူန်း ဆနံမ်းဒံန်ခြဲ တကောန်ဒဲႇဂဲ။

ဘံန်ဟောည်ႇဒေဲႈ ခေဲင်ကျံရ်အာရ်ဒိူန်မာ် ကောင်ဆံရ်ခေါခါႇကုင်တအာင်း-THCဂဲ ထိုးဒဲႈဆနံမ်းဒံန်ခြဲ အ်ုန်တောပ် BCG Vaccine၊ IPV Vaccine၊ Pentavalent Vaccine၊ MMR Vaccine ကာည်း Td Vaccine ဂဲထိုးဒဲႈဟာဝ်း တကောန်ဒဲႇ အဆာက်(5)ဆန်ုမ်လေႈရခြူမ်(199)အီး ကာည်း မာကောန်ဒဲႇတိုဇံန်(6)အီး ခေဲင်ဇိုချီုင်ဘြည်(3)ဆငည်း ပလှံင်ကုင်ငှေါ။

တီုင်ခေါခါႇတအာင်းဂဲ ပ္လိူရ်ႈနှဲဒဲႈအယ်နံပ်ဒါႈ ဘည်ထိုးဒဲႈဆနံမ်းဒံန်ခြဲ တကောန်ဒဲႇတောပ်ဘာည်းအခိင်နီန် အခါန်းကဏ္ဍဒါင်းဒါင်းအ်ုန်မိုႈ နှာင်းဘယ်ဒံန်ခြဲ ဘည်ကတံက်ရောဂါ၊ နှာင်းခေါခါႇကောန်ဒဲႇဂဲ ကာည်း ကနာည်ဟောႇဂဲ ကတာရ်ႈဒါင်းဇာရ်အောႏ။

#PSLF/TNLA
#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း