နံင်ထိုးဒဲႈဆနံမ်းဒံန်ခြဲ တကောန်ဒဲႇ အဆာက်(5)ဆန်ုမ်လေႈရခြူမ် ပလှံင်အိုမ်ငျံရ်
22 May 2026
နံင်ထိုးဒဲႈဆနံမ်းဒံန်ခြဲ တကောန်ဒဲႇ အဆာက်(5)ဆန်ုမ်လေႈရခြူမ် ပလှံင်အိုမ်ငျံရ်
အိုမ်ငျံရ်၊ ကျံရ်ဖံန် ဆငည်း(22)
ဆဒါင်ကုင်တအာင်း
ဖုင်ကပါင်းခေါခါႇတအာင်း-THO ကာည်း ကောင်ဆံရ်ခေါခါႇကုင်တအာင်း-THCဂဲ ကပိုမ် နံင်ထိုးဒဲႈဆနံမ်းဒံန်ခြဲတကောန်ဒဲႇ အဆာက်(5)ဆန်ုမ်လေႈရခြူမ် ပလှံင်အိုမ်ငျံရ်၊ အိူင်ရူကော၊ ခေဲင်ကုင်တအာင်း။
ဖုင်ကပါင်းခေါခါႇတအာင်း-THOဂဲ ပ္လိူရ်ႈနှဲဒါႈ ဆငည်းနံင်ထိုးဒဲႈဟာဝ်းဆနံမ်းဒံန်ခြဲ တကောန်ဒဲႇဂဲမိုႈ ကျံရ်ဖံန် ဆငည်း(22) ရောတ်စာ်မ်း ဆငည်း(26) နံင်ထိုးဒဲႈဟာဝ်း ပယုင်ဆနံမ်ဆဒါင်း လှံင်အိုမ်ငျံရ်။
ဘည်နံင်ထိုးဒဲႈဆနံမ်းဒံန်ခြဲ တကောန်ဒဲႇဂဲမိုႈ နံင်ထိုးဒဲႈဟာဝ်းတောပ်လိူည်ဘာည်းခမို ကာည်း ဇံင် ကျံရ်ဖံန် ဆငည်း(22)နီန် နံင်ထိုးဒဲႈဟာဝ်း အီမိုႈ ခမိုမျိုးအူး၊ အံင်သီရိ၊ ဘော်တူင်း၊ မိူင်ဆီန်၊ ဆာည်ခါဝ် ကာည်း ခမိုနံမ်တောင်းကဲနီန်။
ဆဲႈဒါႇဒီန် ကျံရ်ဖံန် ဆငည်း(23) နံင်ဆီုပ်ထိုးဒဲႈဟာဝ်းဒံန်ခြဲ တကောန်ဒဲႇဂဲ အီမိုႈ အံင်ယတနာ၊ ဆျှိုည်ဘုံသာ၊ ဘော်တူင်း၊ မိူင်ဆီန် ကာည်း ဆာည်ခါဝ်၊၊ ကျံရ်ဖံန် ဆငည်း(24) ကာည်း ဆငည်း(25) နံင်ထိုဒဲဟာဝ်း ခေဲင်ဇံင်(8)၊ အံင်ချှံမ်သာ၊ က္လာႈမျိုးမ၊ ပါင်လိုင်၊ မာန်စာမ်၊ မိူင်ယင်၊ နားဆာည်း၊ အံင်မင်္ဂလာ ကာည်း ဆျှိုည်မျီင်းသာကဲနီန်။
တီုင်ခေါခါႇဂဲ ပ္လိူရ်ႈနှဲအူန်းဒါႈ ကျံရ်ဖံန် ဆငည်း(26) ရဘံန်းဆူတ်ဆူတ်နီန် ဘည်ကဆီုဝ်ကူန်ရဝ်မာဂါင်ဂဲ ဆာ်မိူဝ်ႈအီညှံမ်ဒေဲႈထိုး ခေဲင်ဆငည်းဘည်ပ္လပ္လေႈ ဘိူန်းအူန်းဒေဲႈထိုး။ ဘည်ကဆီုဝ်ကူန်ရဝ်မာဂါင်ဂဲ အီနံင်ရောတ်ဒေဲႈထိုးဆနံမ်းဒံန်ခြဲမာ် လိုတိူဝ်ႈဒေဒိူည်တောပ် စြာင်းဆငည်းပျေဲႈကောန်ဒဲႇ (ဆာ်အာဝ်မိုႈ) လာက်မှာတ်ပျေဲႈ ကာည်း ကဲတ်ပျားပ်ုန်ထိုးဆနံမ်းဒံန်ခြဲ တကောန်ဒဲႇ။
ဘံန်ဟောည်ႇဒေဲႈ ခေဲင်ကျံရ်အာရ်ဒိူန်မာ် ကောင်ဆံရ်ခေါခါႇကုင်တအာင်း-THCဂဲ ထိုးဒဲႈဆနံမ်းဒံန်ခြဲ တကောန်ဒဲႇအဆာက်(5)ဆန်ုမ်လေႈရခြူမ်(199)အီး ကာည်း တအီးပ်ုန်တိုဇံန်(6)အီး ပလှံင်ကုင်ငှေါ။ ဆနံမ်းပ်ုန်ထိုးဒဲႈဟာဝ်းမိုႈ BCG Vaccine(ဆနံမ်းဒံန်ခြဲရောဂါတီဘီ)၊ IPV Vaccineဆနံမ်းဒံန်ခြဲရောဂါဆနာႇယံမ်း ပိုလီယို)၊ Pentavalent Vaccine(ဆနံမ်းဒံန်ခြဲဖံန်မျိုးကစာပ်- ဆနံမ်းဆိုင်ဆိုနာ၊ ဆနံမ်းကအိုက်၊ ဆနံမ်းဘီရ်တိုပိုင်း၊ ဆနံမ်းယံင်တာ်န်းဂါ်ႈပိုင်းနောႈ(Bပိုး)၊ ဆနံမ်းရောဂါ ဆဲဝ်ခေဲင်ဟောႇ ၊ MMR Vaccine ကာည်း ကနာည်မာကောန်ဒဲႇတိုဇံန် Td Vaccine(ဆနံမ်းဒံန်ခြဲ ဘီရ်တိုပိုင်းကာည်း ဆိုင်ဆိုနာ)ကဲနီန်အောႏ။
ဘည်ထိုးဒဲႈဆနံမ်းဒံန်ခြဲ တကောန်ဒဲႇတောပ်ဘာည်းအခိင်နီန်မိုႈ မောကံပ်ဘယ်ဒံန်ခြဲ ဘည်ကတံက်ရောဂါ တကောန်ဒဲႇဂဲ၊ တီုင်ခေါခါႇတအာင်းဂဲ ဆပ္လူႈဒဲႈအူန်းဆဒိ ဒါႈ အခါန်းကဏ္ဍနီန် ဒါင်းဒါင်းအ်ုန်မိုႈ ကနာည်ဟောႇကောန်ဒဲႇဂဲနံင်ကတာရ်ႈဒါင်း ကာည်း ကနာည်လံပ်ခေါခါႇကောန်ဒဲႇဂဲအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists