ပလှံင်ရူကော ကာည်း လှံင်အေဲမ်ခြီရ် ပဲန်ကား ကာည်း ဆဲင်ကယ်ကဒူႈ ကောန်အီမာည်း အာရ်အီး ကာည်း ကောန်အီပ်ုန် အူအီး ကတူႈဖေးဘာတ်ဒါင်း
04 May 2026
ပလှံင်ရူကော ကာည်း လှံင်အေဲမ်ခြီရ် ပဲန်ကား ကာည်း ဆဲင်ကယ်ကဒူႈ ကောန်အီမာည်း အာရ်အီး ကာည်း ကောန်အီပ်ုန် အူအီး ကတူႈဖေးဘာတ်ဒါင်း
အိုမ်ယ်ုရ်၊ ကျံရ်ဖံန်၊ ဆငည်း(4)
ဆဒါင်ကုင်တအာင်း
ကုင်တအာင်း၊ ပလှံင်ရူကော ပဲန်ကား ကာည်း ဆဲင်ကယ်ကဒူႈ ကောန်အီမာည်း အာရ်အီး ကာည်း ကောန်အီပ်ုန် အူအီး ကတူႈဖေးဘာတ်ဒါင်း။
ခေဲင်လှံင်ရူကော ကျံရ်ဖိုန်၊ ဆငည်း(30)ဒိူန် အခိင်ရဆံန်(11:30)နြီ ကားတာင်ကူမ် ဇူႈပရဝ်ဟိုမှိုင်းလေႈ ကဒါႇ လှံင်ရူကော ဘ်ုန်ရောတ်တဒေင်ကကာႈအူဒီန် ဇူႈကဒါႇလူမ်ပလိက် မောင်းဒေဲႈကညားဆဲင်ကယ်ဒီန် စီပဲန်ကဒူႈဟာဝ်းကဆီုဝ်ဒီန်အောႏ။
ဂေါႇပဲန် ကား ကာည်း ဆဲင်ကယ်ကဒူႈ ကညားအီမောင်းဒေဲႈဆဲင်ကယ်ဒိူန် ဘိူန်းအဆာက်18)ဆန်ုမ်၊ မာည်းကျော်မိုး ဘိူန်းဟာဝ်းဖေးဘာတ် ပကဒါႈ မာည်းအိုက်လူ ဘိူန်းအဆာက်(18)ဆန်ုမ် အ်ုန်တောပ်ဒေဲႈ မာည်းကျော်မိုးမာ် ကတူႈဖေးဘာတ်ဒါင်း။
မိုႈဘို ပလှံင်အေဲမ်ခြီရ်၊ ခေဲင်ကျံရ်ဖိုန်၊ ဆငည်း(29)၊ အခိင်ခီညှာ(6:00)နြီ ပဇံင်ဟိုနောင် လေႈဒေဲႈဒါဒီပျော်တခိူည် ကားအူကြောင် ကာည်း ဆဲင်ကယ်ကပံန်ကုင်ယံင်းက္လာႈ ကောန်အီပ်ုန်အူအီးဒီန် ကတူႈဒူႈဟာဝ်း။
ဂေါႇပဲန်ကားကဒူႈဘည်ဒီန် ယာကျာမိန်း ဘိူန်းအဆာက်(51)ဆန်ုမ် လှဲႇဒိူန်ယံင်းက္လာႈခေဲင်ကုင် ကတူႈဖေးဘာတ် ပကိင်၊ ငါည်း ကာည်း တည်းအ်ုန်အောႈ။
ဘံန်ဟောည်ႇဒေဲႈ ကျံရ်ဖိုန်၊ ဆငည်း(23) အခိင်ရဆံန်၊ လှံင်အိုမ်ခြီရ် ပရဝ်ကွံန်လိုင် ကောန်ဒဲႇအူအီး ဇူႈတဂါင် ဘလေႈဒေဲႈ က္လေင်ယာန် ကာည်း စာက်ထည်းနား(ဂီုင်) ငျားကဒူႈ ကောန်ဒဲႇယံမ်းဟာဝ်း။
ခေဲင်အရာပ်အရာကဲနီန် ဂေါည်မိူဝ်ႈပဲန်ကားကပ္လါႇ ကာည်း ကားကဒူႈ ဘည်ကဆီုဝ်ကူန်ရဝ်မာဂါင်ဂဲ လိုအူန်းမိူဝ်ႈဆဒိ ဘည်ဒါဒေင် ကာည်း ကဆီုဝ်တိုအီးကောႈကားဂဲမာ် လိုတောပ်ခေါပ်ပြာႇဘည်လို ကောႈ ကား ကာည်း ခေါပ်ပြာႇဒေင် ကတီးကရီး၊ လိုစေတ်ဆေးထိင်ကောႈကား တောပ်ဘည်အခိင်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists