PSLF/TNLA တီုင်ကောန်အီပ်ုန်ဟြေဲႈဒါင်းဟိုက်ဇာရ် ခေဲင်ကျံရ်ဖိုန်နီန် ဘယ်ဒေလေႈဒေင် ရေဲန်ဇီုင်းကာန်ဒဲႈလော်င်ပိင်ငျာ ခေဲင်ရဝ်(37)ရဝ်
01 May 2026
PSLF/TNLA တီုင်ကောန်အီပ်ုန်ဟြေဲႈဒါင်းဟိုက်ဇာရ် ခေဲင်ကျံရ်ဖိုန်နီန် ဘယ်ဒေလေႈဒေင် ရေဲန်ဇီုင်းကာန်ဒဲႈလော်င်ပိင်ငျာ ခေဲင်ရဝ်(37)ရဝ်
အိုမ်ယ်ုရ်၊ ကျံရ်ဖံန် ဆငည်း(1)
ဆဒါင်ကုင်တအာင်း
တံပ်အွံရ်ပ်ုန်လောတ်ကပီုန်တအာင်း-PSLF/TNLA အီမိုႈတီုင်ဌာနအူလှေ တီုင်ကောန်အီပ်ုန် ဟြေဲႈဒါင်းဟိုက်ဇာရ် ခေဲင်ကျံရ်ဖိုန်နီန် ဘယ်လေႈဒေင် ဒဲႈလော်င်ပိင်ငျာ ရေဲန်ဇီုင်းကာန်ဒဲႈလော်င်ပိင်ငျာ တကူန်ရဝ်မာဂါင်ဂဲ ခေဲင်ရဝ်(37)ရဝ်အောႏ။
ပ်ုန်လေႈဒေင်ဒဲႈလော်င်ပိင်ငျာကဲဒီန်မိုႈ လှံင်အေဲမ်ငူည် ရဝ်(22)ရဝ်၊ လှံင်ရူကော ရဝ်(4)ရဝ်၊ လှံင်ဆဘော ရဝ်(1)ရဝ်၊ လှံင်အိုမ်ငျံရ် ရဝ်(8)ရဝ် ကာည်း လှံင်မာဝ်ႎံင်း ရဝ်(2)ရဝ်။
ခေဲင်လှံင်(5)လှေကဲနီန် ကစုကပိုမ် ကူန်ရဝ်မာဂါင်ဂဲ(1626)အီး ဟိုက်ဒေဲႈ၊ က္လာင်းဒဲႈဟာဝ်း လော်င်ပိင်ငျာ လံပ်ပိင်ငျာ ကာည်း ကောန်အီပ်ုန်၊ ဘည်မိူဝ်ႈအီခ္လံဝ်းဟောမ်ရိူန်း တေဲင် Online ကာည်း ဘည်ခံတ်ဇေဝ်းကဲနီန်။
ဘည်ကဆီုဝ်PSLF/TNLA တီုင်ကောန်အီပ်ုန်ဟြေဲႈဒါင်းဟိုက်ဇာရ်ဂဲ ဒါင်းဒါင်းအ်ုန် ကဲရေဲန်ဟာဝ်းဇီုင်းကာန် ဒံန်ခြဲဒဲႈဘည်ပ္လေဲဝ်အခါင်းအရေး တေဲင်ကောန်အီပ်ုန်ဂဲ၊ ရေဲန်ဇီုင်းကာန် ကနာည်ပယောမ်ဟာဝ်း ဘည်ပ္လေဲဝ်လူည်ႇအခွါင်းအရေး တေဲင်ကောန်အီပ်ုန်ဂဲ၊ ရေဲန်ဇီုင်းကာန် ပဇာရ်ဒဲႈပ်ုန်လိုနံပ်ဆမာ ကောန်အီပ်ုန်ဂဲ၊ ရေဲန်ဇီုင်းကာန် လံပ်တခေါရ် ဒဲႈလော်င်ပိင်ငျာ တကူန်ရဝ်မာဂါင်ဂဲ၊ ဒဲႈလော်င်ပိင်ငျာ ဘည်ဟျံင်ႎဲ့ကာည်း ဘည်လိုချှာင်ဒါ ရိူန်းလီပ်ရိူန်းလေႈ မောကံပ်ကတာရ်ႈဒါင်းဇာရ်။
ဆဲႈဒါႇဒီန် ဘံန်ဟောည်ႇဒေဲႈ ခေဲင်ကျံရ်အိုည်ဒိူန်မာ် ဘယ်လေႈဒေင်ဒဲႈလော်င်ပိင်ငျာ ပလှံင်အေဲမ်ခြီရ် ရဝ်(2)ရဝ်၊ လှံင်အေဲမ်ငူည် ရဝ်(4)ရဝ်၊ လှံင်ကုင်ငှေါ ရဝ်(3)ရဝ်၊ လှံင်ဆဘော ရဝ်(4)ရဝ်၊ လှံင်အိုမ်ယ်ုရ် ရဝ်(6)ရဝ်၊ လှံင်ရူကော ရဝ်(12)ရဝ်၊ လှံင်အိုမ်ငျံရ် ရဝ်(2)ရဝ် ကာည်း လှံင်မာဝ်ႎံင်း ရဝ်(1)ရဝ် ကစုကပိုမ် ကူန်ရဝ်မာဂါင်ဂဲ (1,189)အီး ဟိုက်ရောတ်ဒေဲႈအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists