ရေဲန်ပ္လေါည်ကတူႈကငျားလှိုပ်ဂုင်ဒဲႈ ခူန်၊ ႎါင်ခူန် ကောန်ဆီုက်/ကောန်နာန်း PSLF/TNLA အီကတူႈဘာတ် ကာည်း အီလှူဟာဝ်း တိုပိုင်းယံင်နှာမ် တည်းဇိူင်အင်္ဂါ ခေဲင်ပ္လေါည်ကတီုက်ကပဴင်
07 April 2026
ရေဲန်ပ္လေါည်ကတူႈကငျားလှိုပ်ဂုင်ဒဲႈ ခူန်၊ ႎါင်ခူန် ကောန်ဆီုက်/ကောန်နာန်း PSLF/TNLA အီကတူႈဘာတ် ကာည်း အီလှူဟာဝ်း တိုပိုင်းယံင်နှာမ် တည်းဇိူင်အင်္ဂါ ခေဲင်ပ္လေါည်ကတီုက်ကပဴင်
လှံင်ရူကော၊ ကျံရ်ဖိုန် ဆငည်း(7)
ဆဒါင်ကုင်တအာင်း
ကုင်တအာင်း၊ အိူင်ရူကော၊ ပလှံင်ရူကော ကျံရ်အိုည် ဆငည်း(30)ဒိူန် ရေဲန်ပ္လေါည်ကတူႈကငျားလှိုပ်ဂုင်ဒဲႈ ခူန်၊ ႎါင်ခူန် ကောန်ဆီုက်/ကောန်နာန်း PSLF/TNLA အီကတူႈဘာတ် ကာည်း အီလှူဟာဝ်း တိုပိုင်းယံင်နှာမ် တည်းဇိူင်အင်္ဂါ ခေဲင်ပ္လေါည်ကတီုက်ကပဴင်။
ဘည်ကယေင် PSLF/TNLA ရေဲန်ဟာဝ်း ပ္လေါည်လှိုပ်ဂုင်နီန်မိုႈ မောကံပ်ဘိူန်းကုင်တအာင်း၊ လံပ်ကဖြေင်ကဒိူဝ်ႈ ကာည်း တိူဝ်ႈကနေဲႈ လှိုပ်ဂုင်ဒဲႈ ဘည်ရီန်းရဲတ်ရေဲန်ဟာဝ်း ခူန်၊ ႎါင်ခူန် အီကတူႈခါမ်ကီန်းဒည်း မောကံပ်ဘိူန်းႎှဲတ်ဒရဲရ်ဒီမိုကရေဆီ ကာည်း ကဇောည်ဒဲႈရဲင်ဒဲႈဘ္လောမ် ဘည်နောႈဖိူမ်ကဲနီန်။
ကခံပ်ကယည်ပ္လေါည်န်နီန် အီမိုႈတာမ်တားတီုင်အွံရ်(အူ) PSLF/TNLA တာမ်ခူန်ချုဒါင်း တားဇိုက်ဇာရ်၊ တားချှာင်ဇီုင်းကာန်တောန်နဲ ခူန်ချု တားဘုင်ကျော် ကာည်း တားတီုင်အွံရ်ဆီုက် ခူန်ချု တားဟိူဝ်ပ္လါင် ဟိုက်ရောတ်ဒေဲႈ တံမ်းကြောႈလှိုပ်ဂုင်ဒဲႈအောႏ။
အီမိုႈ တံပ်အွံရ်ပ်ုန်လောတ်ကပီုန်တအာင်း-PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်ကျော် က္လာင်းကြောႈတံမ်းဒါႈ တာင်ကေးစူးဒါင်း တတီုင်အွံရ်ဂဲ ရေဲန်ဒဲႈပ္လေါည်ကတူႈကငျား တခူန်၊ ႎါင်ခူန်၊ ကောန်ဆီုက်/ကောန်နာန်းဂဲ အီကတူႈချှူမ်ဟာဝ်း တိုပိုင်း၊ တည်း၊ ဇိူင် အင်္ဂါတောန်နဲ ခေဲင်ပ္လေါည်ကတီုက်ကပဴင်နီန် ကာည်း ဇီုင်းကာန်ပျိူဝ်ႇယိူဝ်ႇကုင်တအာင်းနီန် မိူဝ်ႈကတူႈခါမ်ကီန်းဒည်းတောန်နဲ ကာည်း ကတူႈချှူမ်ဟာဝ်းဂီုန်းတောန်နဲ။ ဆဲႈဒါႇဒီန် ကဆီုဝ်အီကတူႈဘာတ်ကဲ အာဝ်လိုအူန်းနောႈဇောႈ လိုအူန်းနောႈဒါင်းဒါင်း လိုဆီုပ်တခေါရ်ပနောဟာဝ်း လံပ်ပိင်ငျာ ကာည်း လော်င်နီပိင်ငျာကဲနီန် လိုဟံပ်နောႈဖိူမ်အယ် ရီန်းရဲတ်ရေဲန်ဟာဝ်း မောကံပ်ဆမာ ဇီုင်းကာန်လူမ်ကဲနီန်။
တားတီုင်အွံရ်ဆီုက် ခူန်ချု တားဟိူဝ်ပ္လါင်မာ် က္လာင်းဟာဝ်းကြောႈတံမ်းဒါႈ ကောန်ဆီုက်/ကောန်နာန်းဂဲ အီကတူႈချှူမ်ဟာဝ်း တည်းဇိူင် ကာည်း တိုပိုင်းယံင်နှာမ်အဆာက် ခေဲင်ပ္လေါည်ကတီုက်ကပဴင်ကဲနီန် မိုႈအာဇာနီတအာင်း ကဲကတူႈခါမ်ကီန်းဒည်းဘည်နီန်မိုႈ ကနာည်ခြိူဝ်းမျိုးအယ် တအာင်းပါ်ဒိုဒိုႇည်ႇ။ ဂေါႇဘည်ဒီန် အယ်မိူဝ်ႈဇီုင်းကပ္လိူင် လိုဆီုပ်တိူရ်ႈငိူပ်မေန်ဒဲႈ ဟာဝ်းဂဲနှာအာည်ႇ။
ခေဲင်ကခံပ်ကယည်နီန် တိူဝ်ႈကနေဲႈလှိုပ်ဂုင်အာပ်ဒဲႈဟာဝ်း အီမိုႈပ်ုန်ကအာ်မ်း တခူန်၊ ႎါင်ခူန်၊ ကောန်ဆီုက်/ကောန်နာန်းဂဲ အီကတူႈချှူမ်တည်း၊ ဇိူင်အင်္ဂါ ခေဲင်ဇိုချီုင်ပ္လေါည်ကတီုက်ကပဴင် ခေဲင်ဆန်ုမ်2023 ကျံရ်အူကိူရ် ဆငည်း(27)ဒိူန် ပ်ုန်ရေဲန်ဟာဝ်းတောပ် ဖုင်ဘဝ်ကီုက်ဒါင်း လံပ်တီုက်နာန်း (Operation) 1027 ဒေါန်(1) ကာည်း (2) ဆဲႈဒါႇဒီန် မိုႈဘိုး အီလီပ်ပ္လေါည်ကတီုက်ကပဴင် ခီတ်ကာပ်အာည်ႇနီန်ဒိူန်။ ဘည်တားတီုင်အွံရ်၊ ခူန်၊ ႎါင်ခူန် ကာည်း ကောန်ဆီုက်/ကောန်နာန်းဂဲ ကတူႈခါမ်ချှူမ်ဟာဝ်း တိုပိုင်းယံင်နှာမ် အဆာက် ကာည်း တည်းဇိူင်အင်္ဂါကဲနီန် ကဆီုဝ် PSLF/TNLA အာဝ်ဘီရ်အာဝ်ပျောႈမ တိူဝ်ႈကနေဲႈလှိုပ်ဂုင်အူန်းဆေဆေ ၊ ပ်ုန်ကတူႈချှူမ်ဟာဝ်းကဲနီန် နှာင်းရနောအူန်းပဲန်ဆမဴင် ခြိူဝ်းမျိုးတအာင်းအောႏ။
ခေဲင်ပ္လေါည်နီန် တားတီုင်အွံရ်PSLF/TNLAဂဲ၊ အီရံပ်ဇီုင်းကပ္လိူင်တီုင်ဌာနဂဲ၊ အီကတူႈဘာတ် ကောန်ဆီုက်/ကောန်နာန်းဂဲ ကာည်း ရဟောမ်ရမာဂဲ ကစုကပိုမ်ဂေါည်(700)အီးလေႈ အီဟိုက်ရောတ်ဒေဲႈ တိူဝ်ႈကနေဲႈလှိုပ်ဂုင်ဒဲႈဟာဝ်း ဘည်ရီန်းရဲတ်မိူဝ်ႈနောႈသတ္တိ ကာည်း ဘည်ကတူႈခါမ်ကီန်းဒည်းဒေဲႈဂဲ ခေဲင်ပ္လေါည်ကတီုက်ကပဴင်နီန်။
ဆဲႈဒါႇဒီန် ခေဲင်ပ္လေါည်ကခံပ်ကယည်နီန် အီမိုႈတားတီုင်အွံရ်PSLF/TNLA က္လာင်းကြောႈဒဲႈဘ္လောမ် ကာည်း ချဒဲႈဟာဝ်းဂြိုကပါဝ်း တခူန်၊ ႎါင်ခူန်၊ ကောန်ဆီုက်/ကောန်နာန်းဂဲ (349)အီး အီကတူႈချှူမ်ဟာဝ်း တည်းဇိူင်အင်္ဂါ ခေဲင်ပ္လေါည်ကတီုက်ကပဴင်။
ကဆီုဝ် PSLF/TNLA ပ်ုန်ကကာ်မ်း ဆီုပ်တောပ်ဟာဝ်းဒေင် မောကံပ်ဘိူန်းကုင်တအာင်း၊ လံပ်ကဖြေင်ကဒိူဝ်ႈခြိူဝ်း ကာည်း ႎှဲတ်ဒရဲရ်ဒီမိုကဆီ မောကံပ်ရောတ်ကဇေန်နီး ပ်ုန်ဘိူန်းဒေဲႈဘည်မိုႈဘည်ဘာည်းကဇေန်နီး ဂေါႇမိုႈ ခူန်၊ ႎါင်ခူန်၊ ကောန်ဆီုက်/ကောန်နာန်းဂဲ ကတူႈခါမ်ချှူမ်ဟာဝ်း တိုပိုင်း ယံင်နှာမ် အဆာက် ကာည်း လော်င်ကီန်းဒည်းတောန်နဲ စီဘိူန်းဒေဲႈဘည်နီန် အာဝ်ဘိူန်းဘီရ်ပျောႈဂဲ။ တိူဝ်ႈဒါတံင်ရျံရ်ႈ ပ်ုန်ကတူႈချှူမ်ဟာဝ်းကဲနီန် လိုဆီုပ်ရီန်းရဲတ်ရေဲန်ဟာဝ်း မောကံပ်ဘိူန်း ပ်ုန်ကကာ်မ်းအူန်း ခြိူဝ်းမျိုးတအာင်းအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists