ကုင်တအာင်း၊ အိူင်ကိုက်ခည်း၊ အိူင်အိုမ်ယ်ုရ်ကာည်း လှံင်အေဲမ်ငူည် ခေဲင်ကျံရ်အာရ်နီး ပဲန်ငံရ်က္လိုႇ(3)လိူဝ်ႈ၊ ထာန်ကဆူမ်းဟာဝ်းရိူန်း ကစုကပိုမ်မိုႈ (800)ဆဲန်လှိူဝ်း။
26 February 2026
ကုင်တအာင်း ခေဲင်ကျံရ်အာရ်နီး ပဲန်ငံရ်က္လိုႇ(3)လိူဝ်ႈ၊ ထာန်ကဆူမ်းဟာဝ်းရိူန်း မိုႈ (800)ဆဲန်လှိူဝ်း
အိုမ်ယ်ုရ်၊ ကျံရ်အာရ် ဆငည်း(26)
ဆဒါင်ကုင်တအာင်း
ကုင်တအာင်း၊ အိူင်ကိုက်ခည်း၊ အိူင်အိုမ်ယ်ုရ်ကာည်း လှံင်အေဲမ်ငူည် ခေဲင်ကျံရ်အာရ်နီး ပဲန်ငံရ်က္လိုႇ(3)လိူဝ်ႈ၊ ထာန်ကဆူမ်းဟာဝ်းရိူန်း ကစုကပိုမ်မိုႈ (800)ဆဲန်လှိူဝ်း။
ပလှံင်အိုမ်ယ်ုရ် ၊ ရဝ်နံမ်လီန်း ကျံရ်အာရ် ဆငည်း(12) အခိင်ခီညှာ(10:30)နြီဒိူန် ဂါင်တာအလူန်း ဆွံရ်အူန်းဘ္လောမ်ႎှုင် တဘက်ထရီ ဂေါႇႎှုင်တာမှည်ဘ္လောမ် ပဲန်ပဒူႈ ဇူႈပဲန်ဟာဝ်းငံရ်က္လိုႇ။ ဂေါႇပဲန်ငံရ်က္လိုႇဘည်ဒီန် ဂြိုခြီုင်ဂေါည်ခေဲင်ဂါင်ဂဲပါ်ဒိုႇဒိုည်ႇ ငံရ်က္လိုႇကဆူမ်းဟာဝ်းဒိုည်ႇ ကစုကပိုမ်ထာန်ကဆူမ်းဟာဝ်းမိုႈ ရိူန်း(600)ဆဲန်လိူဝ်ႈ။
မိုႈဘိုး လှံင်ကိုက်ခည်း၊ ရဝ်မာန်နော်င် ကျံရ်အာရ် ဆငည်း(19) အခိင်ရဆံန်(1:30)နြီဒိူန် အခိင်ကဲတိုက်ညှိူဝ် ဂေါႇခူရ်ပူတ်ဒါင်း စီဇူႈပဲန်ငံရ်က္လိုႇဟာဝ်း ကားအူကြောင်ဇံင်းအူန်း တပြောဂါင်တာအမူန်း ကာည်း ကောင်ဟေ။ ကစုကပိုမ် ထာန်ကဆူမ်းဟာဝ်းမိုႈ (150)ဆဲန်လှိူဝ်း။
ဆဲႈဒါႇဒီန် ပလှံင်အေဲမ်ငူည်၊ ရဝ်မာန်ပူး ကျံရ်အာရ် ဆငည်း(21) အခိင်ရမှိူဝ်(12:40)နြီထာန်နီန် ပဂါင်ယာအီညော်ကဲ ဇူႈတငံရ်အီကီုတ် ခေဲင်ႎှါင်းတံင်ပေါမ် ပဲန်ငံရ်က္လိုႇဟာဝ်းဂါင်ဂဲကာည်း က္လိုႇဟာဝ်းတောဘိုး အီဂေါည်တပြောဂါင်ကဲ တာနာည်ညူန့်။ ဂေါႇပဲန်ငံရ်က္လိုႇဘည်ဒီန် ဂြိုခြီုင်အီဂေါည်ဂါင်ကဲ ပါ်အာရ်ဂါင် ငံရ်က္လိုႇကဆူမ်းဟာဝ်းဒိုည်ႇ ကစုကပိုမ်မိုႈ ရိူန်း(122)ဆဲန်လှိူဝ်း။ ဒီပဲန်ငံရ်က္လိုႇဟာဝ်းဒီန် တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပျံတ်ယံတ်ငံရ်ဂဲ ကာည်း ကူန်ရဝ်မာဂါင်ဂဲ ကဇောည်ဒေပျံတ်ဟာဝ်းငံရ်။
ကနာည်လောတ်ဒါႇအန္တရာယ်ဖေးငံရ်နီန် ကူန်ရဝ်မာဂါင်ဂဲ တောန်ကဝ် တောန်အီး လိုအူန်းမိူဝ်ႈဆဒိ၊ လိုဖြောမ်ကရာမ်ရေဲန်တောပ်ကာည်း ဆာ်ပဲန်ဒေဲႈငံရ်က္လိုႇ လိုတိုန်းဆဒါင် တဖုင်ပျံတ်ယံတ်ငံရ်ဂဲ ချာ်န်းချာ်န်း ကရောမ်ရေဲန်ဟာဝ်းတောပ်။
ဇိုချီုကဇေန်နီး ဂေါႇမိုႈဟည်ရောတ်ဒေဲႈ ချီုင်ခေါႈချီုင်မှည် ဘည်ကဆီုဝ်ကူန်ရဝ်မာဂါင်ဂဲ လိုအူန်းမိူဝ်ႈဆဒိ လိုရေဲန်မိူဝ်ႈ ကနာည်နံင်ဒံန်ခြဲအန္တရာယ်ဖေးငံရ်။ ဒါင်းဒါင်းအ်ုန် လိုအူန်းအိုမ်ပျြံင်၊ အိုမ်ပျြံင်စာက်၊ ပ္လါႇစဲ၊ ဂြူဒါ၊ ဟေ၊ ဟြံင်၊ ဓနိ၊ ပ္လံင် မျိုးအီက္လိုႇငှိူည်ကဲနီန် ကတီးကရီး။
ဆဲႈဒါႇဒီန် ဆာ်အယ်ဟောည်ႇဒါငံရ် လိုပျာ်ႇဟာဝ်းကတီးကရီး၊ လိုစေတ်ဆေး ဘက်ထရီ/ ငံရ်ဆိုလာပျား၊ ဆာ်ဒါငံရ်ရာင် လိုဘိဟာဝ်း ခ္လိုက်ငံရ် ကာည်း ဂေါႇအယ်ခူဒဲႈပဲန်ငံရ်က္လိုႇ လိုအူန်းဆဒိဖေးငံရ်တာဆေအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists