ရေဲန်ဟောည်ႇပ္လေါည်ပ္လိုတ်ႎါင်ပနောကာည်း အာပ်ဒဲႈဘွည်ႇ ဥပဒေဒီပလိုမာ(TLA) လိူဝ်ႈ(2) ပ်ုန်ႎိူဝ်ႈ ဖုင်ကဇောည်ဥပဒေတအာင်း(TLAF)
26 February 2026
ရေဲန်ဟောည်ႇပ္လေါည်ပ္လိုတ်ႎါင်ပနောကာည်း အာပ်ဒဲႈဘွည်ႇ ဥပဒေဒီပလိုမာ(TLA) လိူဝ်ႈ(2) ပ်ုန်ႎိူဝ်ႈ ဖုင်ကဇောည်ဥပဒေတအာင်း(TLAF)
အိုမ်ငျံရ်၊ ကျံရ်အာရ် ဆငည်း(26)
ဆဒါင်ကုင်တအာင်း
ဆန်ုမ်2026၊ ကျံရ်အာရ် ဆငည်း(22)ဒိူန် ရေဲန်ဟောည်ႇဟာဝ်း ရေဲန်ပ္လေါည်ႎါင်ပနော ကာည်း အာပ်ဒဲႈဘွည်ႇဥပဒေဒီပလိုမာ လိူဝ်ႈ(2) ပ်ုန်ႎိူဝ်ႈဟာဝ်း ဖုင်ကဇောည်ဥပဒေတအာင်း (Ta’ang Legal Aid Foundation) လှံင်အိုမ်ငျံရ်၊ အိူင်ရူကော၊ ခေဲင်ကုင်တအာင်း။
ပ္လေါည်အာပ်ဒဲႈဘွည်ႇဒီပလိုမာနီန် ကျောင်အကယ်ဒမီဥပဒေတအာင်း(Ta’ang Law Academy) လိူဝ်ႈ(2) ဆဲႈဒါႇကောန်တဘိုက်အီဂေါည် ခေဲင်အရာပ်အရာတအာင်း အ်ုန်တောပ်ဘိုး ကောန်ကျောင်အီဂေါည်ကုင်ကယန်း(4)အီး ကစုကပိုမ်ဂေါည်(50)အီး ဟိုက်ရောတ်ပနောအံင်ဟာဝ်း။
ပ္လေါည်ပ္လိုတ်ႎါင်ပနောနီန် ခူန်ချု တားဘုင်ကျော် ဟိုက်ရောတ်ဒေဲႈ က္လာင်းကြောႈတံမ်းဒါႈ “ကုင်ကံမ်ဖာ ကတာရ်ႈဒါင်းဇာရ်ဆံမ် ထာန်မှောမာ် အယ်လိုမိူဝ်ႈထုင်မှိမ်မှယ်နီန်၊ ကနာည်ဒီန် မိုႈလိူည်ဇီုင်းကာန် ဥပဒေနီန် နံင်ဘယ်ရံပ်လာည်းဇီုင်းဒီန်၊ မောကံပ်ဘယ် ပျိူဝ်ႇယိူဝ်ႇဇီုင်းကာန် လံပ်ကႎှံက် ယေန်ငံင် လိုမိူဝ်ႈကညာပိင်ငျာဆျှီန်ဂဲ အီဆမာဥပဒေ၊ ဆာ်မိူဝ်ႈ အီပ္လေဲဝ်အခွါင်းဥပဒေ လိုလာည်းဇီုင်း တောပ်ဘည်ဥပဒေ၊ ဖုင်လံပ်ကႎှံက် မောကံပ်ယေန်ငံင်အခည်း ကာည်း လိုရေဲန်ပဲန် ခနားႎါႎည်ခြိူဝ်းအယ်” ။
ဆဲႈဒါႇဒီန် က္လာင်းတံမ်းဘိုးဒါႈ မောကံပ်ဘယ်ဖုင်ပြိူဝ်ႈ ဆနီတ်အစိုးယ ကူန်ရဝ်မာဂါင်ကာည်း မောကံပ်ဘယ် ရေဲန်ဇီုင်းကာန်လံပ်ဘြောင်ချှာင် တေဲင်ပ္လံက်တံင်ဇူႈ လံပ်ဘ္လီုက်လှူပ်တြားဥပဒေ ဘည်ကဆီုဝ်အီလေႈႎါင်ပနောကျောင် ဥပဒေဒီပလိုမာဂဲ လိုကဖြောမ်ကရောမ်ရေဲန်တောပ် ဇီုင်းကာန်ပျိူဝ်ႇယိူဝ်ႇကုင်တအာင်း၊ လိုခေါရ်လော်င်ပိင်ငျာ ဥပဒေကာည်း လိုထာမ်းဇီုင်းကပ္လိူင် မောကံပ်တြား အကျံင်အယ်ပေန်။
ႎါင်ပနောနီန် ဖိက်ပါင်းတာဆြာ/ယာဆြာအီဆမာနံပ်ဂဲ ပနောဒဲႈဟာဝ်း ဘာသာအီကဆီုဝ်ကဆဲင် ဥပဒေ ခေဲင်ကုင်ကာည်း ဥပဒေကုင်အီဟံရ်၊ လံပ်အရေးတီုင်ကုင်၊ သာဘာအီဆီုဝ်ကဆဲင် အခွါင်းအရေးတိုအီး၊ သာဘာအဆီုဝ်ကဆဲင် လံပ်ဖီုက်လျှံင်ပဇာရ်ပုဂ္ဂိုလ်၊ ဘေဲႇလူမ်တအာင်း၊ ကာ်မ်ပျူတာကာည်း ဘေဲႇအိင်ဂလိတ်ကဲနီန်။
ကျောင်ဥပဒေနီန် ဇူႈႎိူဝ်ႈဟာဝ်း ဆန်ုမ်2024၊ ကျံရ်အိုည်ဒိူန် ကောန်ႎါင်ပနောအီမာည်း(24)အီး၊ ကောန်အီပ်ုန်(26)အီး ကစုကပိုမ်ဂေါည်(50)အီး ပနောဟာဝ်းလှေင် ခေဲင်ဘြည် (2)ဆန်ုမ်။ ပ္လေါည်ပ္လိုတ်ႎါင်ပနောနီန် အာပ်ချဒဲႈဘွည်ႇဒီပလိုမာ တကောန်ဂဲ ကာည်း အာပ်ချဒဲႈဟာဝ်း လှိပ်ဂုင်ဆု တကောန်ကျောင် အီလှဲမ်ဘေဲႇတောန်ကဒါႇ၊ ႎါည်ဒီန် ကောန်ကျောင် အီဟိုက်ကျောင်ဥပဒေဂဲ ကာနှဲဟာဝ်း ပ်ုန်ဖိက်ပါင်း အီဟိုက်ရောတ်ဒေဲႈ ဖုင်ဘေဲႇဘာန်းကုင်တီုင်ကုင်ဂဲကာည်း ကူန်ရဝ်မာဂါင်ဂဲတိူရ်ႈ။
ပ္လေါည်ပ္လိုတ်ကျောင်နီန် PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်ကျော်၊ ကောင်ဆံရ်ကုင်တအာင်း-TLC တာမ်အီအွံရ်(1) ယားဒီဒီမိုခံမ်၊ PSLF/TNLA တားတီုင်ဘြောင်ချှာင် ခူန်အွံရ်ချု တားဂူႈဇာရ်၊ ပါမောက္ခ ဒေါက်တာဟောည်၊ တာဆြာ/ယာဆြာ ႎါင်ပနောဂဲ၊ အီရံပ်ထာမ်းဇီုင်းကပ္လိူင် တီုင်ဌာနဂဲ၊ အီဇီုင်းဖုင်ကဒါႇကူန်ရဝ်မာဂါင်ဂဲ ကာည်း အီရံပ်ဇီုင်းဖုင်ဘေဲႇဘာန်း ခြိူဝ်းမျိုးဆျှံမ်၊ ဂေါရခါး၊ တအာင်း၊ မိုင်ဝူန်းဂဲ ကာည်း ကူန်မာကောန်ကျောင်ဂဲ ကစုကပိုမ်ဂေါည်(500)အီး ဟိုက်ရောတ်ဒေဲႈအောႏ။
ကောန်ကျောင်အီဟိုက်အံင်ဟာဝ်းကျောင်နီန် နှာင်းဒဲႈဂဲ ရံပ်ထာမ်းဟာဝ်းဇီုင်းကပ္လိူင် ပလူမ်တီုင်ဘ္လံက်ချှာင်တြား ကနာည်ဇီုင်းကာန်ဘ္လီုက်လှူပ်တြား ခေဲင်ကုင်တအာင်း။
ကျောင်အကယ်ဒမီဥပဒေတအာင်းနီန် ဖုင်ကဇောည်ဥပဒေတအာင်း(Ta’ang Law Academy Foundation-TLAF )ဂဲ ဆာ်ႈအွံရ် ႎိူဝ်ႈဟာဝ်း လိူဝ်ႈ(1) ခည်မိုႈ ဆန်ုမ်2022ဒိူန် ဘယ်ပြိူဝ်ႈလေႈ ကောန်ကျောင်ဂေါည်(34)အီး။
ကောန်ကျောင်အီဟိုက်ဟောည်ႇဟာဝ်း လိူဝ်ႈ(1)ကဲဒိူန် ကဇေန်နီး ကဲရံပ်ထာမ်းဇီုင်းကပ္လိူင် ပဲန်ကဝ်ကဇောည်ဥပဒေ ပလူမ်တြားဘ္လံက်ချှာင်တြား ကဒါႇကူန်ရဝ်မာဂါင်ဂဲ ကာည်း ပလူမ်ဘ္လံက်ချှာင်တြား ကဒါႇဆီုက် ရခြူမ် PSLF/TNLA ကနာည်ဇီုင်းကာန်လံပ်ဘ္လီုက်တြားဥပဒေ ခေဲင်ကုင်တအာင်းအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists