ဆာ်ႈဟိုရ်ပ္လူႈဆဒိ ဂေါႇမိုႈဟည်ရောတ်ဒေဲႈ ဇိုချီုင်ခေါႈချီုင်မှည် ဘည်ကဆီုဝ်ကူန်ရဝ်မာဂါင်ဂဲ လိုရေဲန်မိူဝ်ႈအူန်း ဘည်လိုဒံန်ခြဲငံရ်
26 February 2026
ဆာ်ႈဟိုရ်ပ္လူႈဆဒိ ဂေါႇမိုႈဟည်ရောတ်ဒေဲႈ ဇိုချီုင်ခေါႈချီုင်မှည် ဘည်ကဆီုဝ်ကူန်ရဝ်မာဂါင်ဂဲ လိုရေဲန်မိူဝ်ႈအူန်း ဘည်လိုဒံန်ခြဲငံရ်
အိုမ်ယ်ုရ်၊ ကျံရ်အာရ် ဆငည်း(26)
ဆဒါင်ကုင်တအာင်း
ဖေးအန္တရာယ်ငံရ်နီန် အ်ုန်ဆမာဒဲႈအဆာက်ကာည်း ဂြိုခြီုင်ရဝ်ဂါင် ချှူမ်လူလှဲဝ်ႏဟာဝ်း။ အီတောပ်ခေဲင် ဖေးအန္တရာယ်ဖံန်ပါး အီမိုႈဖေးအန္တရာယ်ငံန်နီန် အ်ုန်ဆမာဒဲႈဇိုဇာတ် ကာည်း တဒင်္ဂဂြိုခြီုင်ခေဲင်ဂါင်အယ် လူလှဲဝ်ႏပဲန်ဖေးအန္တရာယ်ဒါင်း။ အယ်ဆံင်ဘယ်ဝီရ်တီပ်ဟြီုက် ဂြိုခြီုင်ပ်ုန်တိူဝ်ႈဘြားဟာဝ်း တိုအီဘြားကဲမံင်ခ္လံက်ဒိူန်မာ် ဆာ်အယ်ကတူႈငံရ်က္လိုႇ ဂြိုခြီုင်ခေဲင်ဂါင်အယ် နံင်ကတူႈချှူမ်ဟာဝ်းဒိုည်ႇ။
တိုအီးအယ်ခည်ဂီုန်း နံပ်အူန်းဖေးငံရ်နီန်မာ် ဂေါႇမိုႈ အယ်ဆမာလှူပ်လှပ်ကာည်း အာဝ်ဆမာဆဒိ စီဂေါည်ဂေါည်ကတူႈဖေးငံရ်က္လိုႇ။ ဘည်ကဇေန်နီး ဂေါႇမိုႈ ဟည်ရောတ်စာ်မ်းဒေဲႈ ဇိုချီုင်ခေါႈချီုင်မှည် အယ်လိုအူန်းမိူဝ်ႈဆဒိဖေးငံရ် လိုရေဲန်မိူဝ်ႈအူန်း ဘည်လိုဒံန်ခြဲငံရ်နီန်။
ဆန်ုမ်2025 ခေဲင်အူဆန်ုမ်နီန် အီမိုႈခေဲင်အရာပ်အရာတအာင်း အိူင်အိုမ်ယ်ုရ်၊ အိူင်မာဝ်းႎံင်း၊ အိူင်မိုဂူႈ၊ အိူင်ကိုက်ခည်း၊ အိူင်အေဲမ်ခြီရ်ကာည်း လှံင်မိူင်ယော်ကဲနီန် ကစုကပိုမ် ပဲန်ဟာဝ်းငံရ်က္လိုႇ(71)လိူဝ်ႈ။ ခေဲင်ပဲန်ငံရ်က္လိုႇကဲဒီန် ခည်ဂီုန်းအ်ုန်မိုႈ ဂါင်ကူန်ရဝ်မာဂါင်ဂဲကာည်း ႎှါင်းကျောင် ကစုကပိုမ် ထာန်ချှူမ်ဟာဝ်း ငေါႈခံန်အ်ုန်မိုႈ(12,950)ဆဲန်လှိဝ်း။ ဂေါႇဖေးငံရ်နီန် အာဝ်ႎံန်းလိူည် ဂြိုခြီုင်ခေဲင်ဂါင်အယ် ဇိုဇာတ်အဆာက်အယ်မာ် ဆမာကတူႈချှူမ်လူလှဲဝ်ႏဟာဝ်း။
အခိင်ပဲန်ငံရ်က္လိုႇ တံပ်အွံရ်ပ်ုန်လောတ်ကပီုန်တအာင်း-PSLF/TNLA ဖုင်ပျံတ်ယံတ်ငံရ်ကဲ ကာည်း ကူန်ရဝ်မာဂါင်ဂဲ ကဖြောမ်ကရောမ် ဟာဝ်းကဇောည်ဒေပျာ်ႇငံရ်ဒီပဲန်ငံရ်က္လိုဒီန်။ ဂေါႇမိုႈ ဘယ်ဒေကဇောည်ပျာ်ႇငံရ်အခိင်မှီဘည်ဒီန် စီဘယ်ထိင်ခြဲငံရ် ငံရ်စီအာဝ်က္လိုႇတောတပြောဂါင်အီဟံရ်။
ဘည်ယိူဝ်းပဲန်ဟာဝ်းငံရ်က္လိုႇကဲဒီန် မိုႈဒိုည်ႇႎံရ်ငံရ်ဝါယာပဲန်ဆျှောတ်၊ ဘက်ထရီပဒူႈ၊ ဆိုလာပျားက္လိုႇ၊ အာဝ်ပျာ်ႇဒိုည်ႇငံရ်အီကီုတ်ကာည်း ဂေါည်လှူပ်လှပ် အာဝ်မိူဝ်ႈဆဒိငံရ်ကဲနီန်။ ဂေါႇဘည်ဒီန် ဘည်ကဆီုဝ်ကူန်ရဝ်မာဂါင်ဂဲ လိုရေဲန်ဟာဝ်းတောပ် ဘည်လိုဒံန်ခြဲ လိုအူန်းမိူဝ်ႈဆဒိဒါင်းဒါင်း ၊ ပ်ုန်ဒါခေဲင်ဂါင် အီမိုႈ က္လိုက်ဘက်ထရီ၊ ငံရ်ဆိုလာပျား၊ လိုစေတ်ဆေးလဴင်ငံရ်ရာင် ပ်ုန်ဒါ၊ လိုပျာ်ႇဒိုည်ႇဟာဝ်း ငံရ်ပ်ုန်အီကီုတ်ကာည်း အခိင်အယ်ဟောည်ႇဒါငံရ် လိုဘိဟာဝ်းငံရ် ကတီးကရီး။
ဘည်ကဆီုဝ်ကူန်ရဝ်မာဂါင်ဂဲ လိုအူန်းမိူဝ်ႈဆဒိငံရ် တောန်ကဝ်တောန်အီး လိုဖြောမ်ကရောမ်ရေဲန်ဟာဝ်းတောပ် ဘည်လိုဒံန်ခြဲငံရ်ကာည်း ဆာ်မိူဝ်ႈဒေဲႈ ပဲန်ငံရ်က္လိုႇမာ် လိုပ္လူႈဆဒိ လိုဟြာင်းက္လာင်း တဖုင်ပျံတ်ယံတ်ငံရ်ကဲချာ်န်းချာ်န်း။
ငံရ်ဒါႈအီး အာဝ်မိူဝ်ႈပ်ုန်နံပ်မာ် တိုအီးအယ် မိူဝ်ႈအူန်းပ်ုန်နံပ်။ ဂေါႇမိုႈဘည်ဒီန် အယ်တိုအီးတောန်ကဝ် ဆာ်မိုႈအီဆီုဝ်ကဆဲင်တောပ်ငံရ်ကဲနီန် ရေဲန်ဆေမာ် ခူရေဲန်လှူပ်လှပ် အူန်းမိူဝ်ႈဆဒိငံရ်။ ဆိင်ပ္လူႈဒဲႈဆဒိ ဘည်ဇိုချီုင်ကဇေန်နီး ဟည်ရောတ်စာ်မ်းဒေဲႈ ဇိုချီုင်ခေါႈချီုင်မှည် လိုရေဲန်မိူဝ်ႈအူန်း ဘည်လိုဒံန်ခြဲငံရ်၊ လိုရေဲန်ဒံန်ခြဲအူန်း အာဝ်က္လိုႇငံရ်ကာည်း လိုမိူဝ်ႈဆဒိ လိုဖြောမ်ကရောမ်ဒံန်ခြဲဟာဝ်း ဖေးအန္တရာယ်ငံရ်နီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists