ပ္လါႇဘေဲႇတောဟိုက်ကျောင် လိူဝ်ႈ(1) ပ်ုန်နှာင်းႎိူဝ်ႈဟာဝ်း ကျောင်“Tealand Medical School” ကနာည်ဘွည်ႇပိင်ငျာဆနံမ်း (M.B.,B.S)
16 February 2026
ပ္လါႇဘေဲႇတောဟိုက်ကျောင် လိူဝ်ႈ(1) ပ်ုန်နှာင်းႎိူဝ်ႈဟာဝ်း ကျောင်“Tealand Medical School” ကနာည်ဘွည်ႇပိင်ငျာဆနံမ်း (M.B.,B.S)
ကုင်တအာင်း၊ ကျံရ်အာရ် ဆငည်း(16)
ဆဒါင်ကုင်တအာင်း
ပ္လါႇဘေဲႇနီန်မိုႈ ဇူႈ ခေဲင်ကျံရ်အာရ်နီန် နှာင်းတောဟာဝ်းအီဟိုက်ကျောင် ပ်ုန်နှာင်းႎိူဝ်ႈကျောင်“Tealand Medical School” ကနာည်ဘွည်ႇပိင်ငျာဆနံမ်း [Bachelor of Medicine, Bachelor of Surgery (M.B.,B.S)] အီဂေါည်ရခြူမ်ဖုင်ခေါခါႇကောင်ဆံရ်ကုင်တအာင်း။
ဆာ်မိုႈ လိူဝ်ႈ(1)နီန် နှာင်းလံက်ခါမ်ဟာဝ်း ကောန်ကျောင်(30)အီး ထာန်လှေင်ဇိုချီုင်ပနောဘေဲႇမိုႈ (6)ဆန်ုမ်ကာည်း ဇိုချီုင်ရေဲန်ဇီုင်းကာန်မိုႈ (1)ဆန်ုမ် ကစုကပိုမ် မိုႈ(7)ဆန်ုမ်။
ကျောင်ဘွည်ႇပိင်ငျာဆနံမ်းနီန် နှာင်းဇူႈႎိူဝ်ႈဟာဝ်း ဆန်ုမ်2026၊ ကျံရ်ဖိုန် ဆငည်း(4) ပ္လါႇဘေဲႇတောဟိုက်ကျောင်နီန် နှာင်းဇူႈလံက်ခါမ်ဟာဝ်း ကျံရ်အာရ် ဆငည်း(10) ဆငည်းဆူတ်အ်ုန်မိုႈ ကျံရ်အိုည် ဆငည်း(10) လိုဟြာင်းဟိုက်အူန်းဒိုႇ။ ဘည်ကဆီုဝ်ဟြာင်းဟိုက်ကျောင်ဂဲဒီန် လိုမိုႈ အီအော်င်ကျောင်တက္ကသိုလ်ဘာသာသိပ္ပံ (ဆာ်အာဝ်မိုႈ) လိုမိုႈ အီအော်င်ကျောင် TLEC (12)တာန်း အီနံင်ဟိုက်ကျောင်နီန် လိုမိုႈ အီနိုက်အဆာင်းဘည်ပ္လချအူန်း တောပ်လိူည် ဘာသာကဲနီန်။
ဆဲႈဒါႇဒီန် ကနာည်ဘိူန်းဟိုက်ကျောင်နီန် လိုဒေဲႈပ္လါန်ဘေဲႇတာင်တိုအယ် ဆာ်ဟောည်ႇဟိုက်ကျောင် တက္ကသိုလ်နီန်မာ် လိုမိုႈ အီဘယ်ထာမ်းဇီုင်းကပ္လိူင် ခေဲင်ကုင်တအာင်း (ဆာ်အာဝ်မိုႈ) လိုထာမ်းဇီုင်းကပ္လိူင် ခေဲင်အရာပ်အရာလံပ်တီုက်ႎှီန်း ဒီဘြေ့အ်ုန်(3)ဆန်ုမ်။
Tealand Medical Schoolနီန်မိုႈ တက္ကသိုလ်ဆနံမ်း(မာန်လေး) ကောင်ဆံရ်ယာယီတက္ကသိုလ် (Interim University Council – IUC), University of Medicine (Mandalay)ကာည်း လံပ်ခေါခါႇ ကာည်း တီုင်ဌာနတံင်ရျံရ်ႈရဲင်ဘ္လောမ်တိုအီးကတာရ်ႈဒါင်းဟိုက်ဇာရ်ဂဲ အီဂေါည်ရခြူမ် Ta’angland Health Council (THC) မိုႈ ကညာပိင်ငျာဆျှီန် အီဆမားလံပ်ခေါခါႇဂဲ ကပိုမ်ႎိူဝ်ႈအူန်း ဖုင်လံပ်ပိင်ငျာအူလှေ။
ဘည်လိုဟြာင်းပ္လါႇဘေဲႇနီန် ဘိူန်းအူန်းမှာန်းဟြာင်း ပယုင်ဆနံမ်း လှံင်အိုမ်ယ်ုရ်၊ ယုင်ဆနံမ်းလှံင်အေဲမ်ခြီရ်၊ ယုင်ဆနံမ်းလှံင်အိုမ်ငျံရ်၊ ယုင်ဆနံမ်းလှံင်ရူကော၊ ယုင်ဆနံမ်းလှံင်ကိုက်ခည်း၊ ယုင်ဆနံမ်းလှံင်မိူင်လိုင်၊ ယုင်ဆနံမ်းလှံင်ကုင်ငှေါကာည်း ယုင်ဆနံမ်းလှံင်အေဲမ်ငူည်ကဲနီန်၊ ဒါႇခူဒီန် ဘိူန်းအူန်းမှာန်းဟြာင်း တေဲင် Facebook Page Messenger ကာည်း Application Form/Google Link အီမိုႈ ‘Tealand Medical School’ နီန်အောႏ။
မောကံပ်အော်င်ဘယ်ပျိူဝ်ႇယိူဝ်ႇဇီုင်းကာန် ကုင်တအာင်းနီန် လို အခါန်းကဏ္ဍရဲင်ဘ္လောမ် ကောန်တဘိုက်ဂဲ ဒါင်းဒါင်း။ ဘည်ကဇေန်နီး မောကဏ္ဍလံပ်ခေါခါႇနီန် ကံပ်ကတာရ်ႈဒါင်းဟိုက်ဇာရ် ဒါင်းဒါင်းအ်ုန် လိုမိူဝ်ႈအီထာမ်းဇီုင်းကပ္လိူင် လံပ်ခေါခါႇကာည်း ကညာပိင်ငျာဆျှီန်ဂဲ အီနံင်ဘယ်ဒဲႈ ထိင်ခြဲလံပ်ခေါခါႇနီန်လှဲမ်နိုက်တောန်ကဒါႇ။
ဂေါႇဘည်ဒီန် ဘည်ကဆီုဝ်ကောန်တဘိုက်ဂဲ အီဟံပ်ရဲင်ရေဲန်တောပ် ဇီုင်းကာန်ဝီရ်ပျိူဝ်ႇယိူဝ်ႇ ခေဲင်ကုင်တအာင်းနီန် ဆိင်ဒဲႈအယ်ပနောပိင်ငျာ မောကံပ်ဆမား အီဆီုဝ်ကဆဲင်တောပ်အယ် ဖဘိုးဟံပ်ရဲင်ဘ္လောမ် ကဇောည် ရေဲန်တောပ် မောကံပ်ဇီုင်းကာန် ကတာရ်ႈဒါင်းဟိုက်ဇာရ်ဟာဝ်းအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists