ကောန်ကျောင်အီပ္လါန်ဘေဲႇဒါကြောႈ တဖုင်ခေါခါႇ ကောင်ဆံရ်ကုင်တအာင်း(THC)၊ အီငိူပ်မေန်းခေါခါႇကာည်း ကျောင်ကောလေတ်သိပ္ပံခေါခါႇ(CNHS)၊ ADN Program လိူဝ်ႈ(2)နီန် ကောန်ကျောင်အီအံင်ဂေါည်(38)အီး
11 February 2026
ကောန်ကျောင်အီပ္လါန်ဘေဲႇဒါကြောႈ တဖုင်ခေါခါႇ ကောင်ဆံရ်ကုင်တအာင်း(THC)၊ အီငိူပ်မေန်းခေါခါႇကာည်း ကျောင်ကောလေတ်သိပ္ပံခေါခါႇ(CNHS)၊ ADN Program လိူဝ်ႈ(2)နီန် ကောန်ကျောင်အီအံင်ဂေါည်(38)အီး
အိုမ်ယ်ုရ်၊ ကျံရ်အာရ် ဆငည်း(11)
ဆဒါင်ကုင်တအာင်း
ကောန်ကျောင်အီပ္လါန်ဘေဲႇဒါကြောႈ တဖုင်ခေါခါႇ ကောင်ဆံရ်ကုင်တအာင်း(THC)၊ အီငိူပ်မေန်းခေါခါႇကာည်း ကျောင်ကောလေတ်သိပ္ပံခေါခါႇ(CNHS)၊ ADN Program လိူဝ်ႈ(2)နီန် ကောန်ကျောင်အီအံင် ကောန်အီပ်ုန်(33)အီးကာည်း ကောန်အီမာည်း(5)အီး ကစုကပိုမ်ဂေါည်(38)အီး။
ကောန်ကျောင်အီပ္လါန်အံင်ဟာဝ်းဒါကြောႈကဲနီန် ဂဲနံင်ဘိူန်းဟိုက်ဟာဝ်းကျောင်အီငိူပ်မေန်းခေါခါႇကာည်း ကျောင်ကောလေတ်သိပ္ပံခေါခါႇ ကုင်တအာင်း ADN Program လိူဝ်ႈ (2) ပ်ုန်နံင်ဇူႈႎိူဝ်ႈဟာဝ်း ကျံရ်အာရ် ဆငည်း(23)။
ကောန်ကျောင်အီပ္လါန်အံင်ဟာဝ်းကဲနီန်မိုႈ လှံင်အိုမ်ယ်ုရ်(16)အီး၊ လှံင်ရူကော(6)အီး၊ လှံင်အေဲမ်ခြီရ်(7)အီး၊ လှံင်ကိုက်ခည်း(2)အီး၊ လှံင်ဆဘော(1)အီး၊ လှံင်မူစဲ(2)အီး၊ လှံင်အီန်တော(1)အီးကာည်း လှံင်ပီန်တယ(3)အီး။
ဆာ်မိုႈ ကောန်ကျောင်ကဲနီန် ဘံန်ဟောည်ႇဒေဲႈ ကျံရ်အူ ဆငည်း(5)ဒိူန် ဂဲလီပ်ပ္လါန်ဟာဝ်း ဘေဲႇအိင်ဂလိတ်ကာည်းဇီဝဗေဒ အာရ်နဲ ကောန်ကျောင်အီအံင်ဂေါည်(45)အီး၊ ႎါည်ဒီန် အဆာင်းရဘံန်ဆူတ်နီန်ဂဲစီပ္လါန်ဟာဝ်းဘိုးဒါကြောႈ အီအံင်စီဂေါည်လိူည်(38)အီး။
ဘည်ကဆီုဝ် ဖုင်ခေါခါႇကောင်ဆံရ်ကုင်တအာင်း(THC)ဂဲ ပ်ုန်ကယေင် ဘယ်ဒေပဇာရ်အီလှဲမ်နိုက်တိူရ်ႈငိူပ်မေန်းဒဲႈ ခေါခါႇကူန်ရဝ်မာဂါင်ဂဲ ခေဲင်ကုင်တအာင်းနီန် ကျောင်ငိူပ်မေန်းခေါခါႇကာည်းကျောင်ကောလေတ်သိပ္ပံခေါခါႇ နီန် ဘံန်ဟောည်ႇဒေဲႈ ဆန်ုမ်2025 ကျံရ်ဇန်နႎရီဒိူန်ဟောည်ႇဇူႈႎိူဝ်ႈဟာဝ်း လိူဝ်ႈ(1) ဘည်ကဇေန်နီး နံင်ဆီုပ်ရီန်းရဲတ်ႎိူဝ်ႈဟာဝ်းဘိုးလိူဝ်ႈ(2)နီန်အောႏ။
ဂေါႇဘည်ဒီန် ကဏ္ဍလံပ်ခေါခါႇနီန် မောကံပ်ကတာရ်ႈဒါင်းဟိုက်ဇာရ်ခေဲင်အရာပ်အရာအယ်နီန် နှာင်းဆီုပ်ရီန်းရဲတ်ရေဲန်ဟာဝ်း ဘယ်ဒေပြိူဝ်ႈလေႈ အီရံပ်ထာမ်းဇီုင်းကပ္လိူင်ခေါခါႇအီလှဲမ်နိုက်တောန်ကဒါႇဂဲအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists