ခေဲင်ဆန်ုမ်ပနောဘေဲႇ2025-2026နီန်ကောင်ဆံရ်ဇီုင်းပိင်ငျာကုင်တအာင်း-TLEC ဂဲဘယ်ႎိူဝ်ႈပနောဟာဝ်း ကျောင် (511)ကျောင်
10 February 2026
ခေဲင်ဆန်ုမ်ပနောဘေဲႇ2025-2026နီန်ကောင်ဆံရ်ဇီုင်းပိင်ငျာကုင်တအာင်း-TLEC ဂဲဘယ်ႎိူဝ်ႈပနောဟာဝ်း ကျောင် (511)ကျောင်
ကုင်တအာင်း၊ကျံရ်အာရ် ဆငည်း(10)
ဆဒါင်ကုင်တအာင်း
အခွါင်းအရေးပနောပိင်ငျာနီန်မိုႈ အခွါင်းရေးပ္လံက်တံင်ဇူႈ ကနာည်တိုအီးအယ်အူနဲ ခေဲင်ဆန်ုမ်2025-2026နီန် ကောင်ဆံရ်ဇီုင်းပိင်ငျာကုင်တအာင်း-TLEC ဂဲကစုကပိုမ် ဘယ်ႎိူဝ်ႈပနောဟာဝ်း ကျောင်(511)ကျောင်ခေဲင်ကုင်တအာင်းအောႏ။
လှံင်ပ်ုန်ႎိူဝ်ႈပနောဟာဝ်းမိုႈ လှံင်အိုမ်ယ်ုရ်၊ လှံင်ရူကော၊ လှံင်အိုမ်ငျံရ်၊ လှံင်အေဲမ်ခြီရ်၊ လှံင်မူစဲ(105)လှာ့် လှံင်ကိုက်ခည်း၊ လှံင်မိူင်ယော်၊ လှံင်ဆဘောကာည်းလှံင်မာဝ်းႎံင်းကဲနီန် ႎိူဝ်ႈပနောဟာဝ်းအဆာင်း တာန်းဒဲ၊ တာန်းကဒည်၊ တာန်းဇာရ်ကစုကပိုမ်ထာန်ဘယ်ႎိူဝ်ႈဟာဝ်း ကျောင်ဂေါည်(511)ကျောင် ၊ အီပနောဒဲႈတာဆြာ/ယာဆာဂေါည်(2,875)အီးကာည်း ကောန်ကျောင်အီဟိုက်ဂေါည်(53,653)အီး ။
ဂေါႇမိုႈဘည်ဘာည်းပဲန်ဒေဲႈ ခူရ်က္လာည်းလံပ်ဆီုက်နာန်းကာည်း အရေးတီုင်ကုင်နီန်ဘံန်ဆီုက်ဘြာန်ဂဲ ဝီရ်ဘိူန်းဘြောင်ထိင်ခြဲဟာဝ်း လှံင်ဆဘော၊ လှံင်မာဝ်းႎံင်း၊မိုဂူႈကာည်း မှိမ်မီုတ်ကဲနီန် ကျောင်ပ်ုန်ကတူႈဘိဟာဝ်း ဂေါည်(174) ကျောင်ထာန်နီန်။
ခေဲင်ဆန်ုမ်ပနောဘေဲႇ 2025-2026နီန် ဂေါႇမိုႈ ဘည်ကီန်းဒည်းလံပ်ကတ်ုမ်၊ လံပ်ဘြောင်ရိူန်းခြီရ်ကာည်းလံပ်ကႎှံက်ကဲနီန် ဆဲႈဒါႇ အီပနောဒဲႈဘေဲႇတာဆြာ/ယာဆြာဂဲ အီဟိုက်ကောန်ကျောင်ဂဲမာ်ဘ်ုပ်ခ္လါည်းဟာဝ်းတောပ် ဘည်ပဲန်ခူရ်က္လာည်းနီန်။ တောပ်ဘာည်းစြာင်း ပ်ုန်စေတ်ဘိူန်းတာဆြာ/ယာဆြာဂဲ ( 1,098) အီး လေႈဟာဝ်းဒါႇကျောင်အီဟိုက်ကောန်ကျောင်ဂဲ ကစုကပိုမ် (16,891)အီးမာ်အာဝ်ဘယ်ယာ့်ဟိုက်ကျောင်အောႏ။
စူန်မိုႈဆန်ုမ်ပနောဘေဲႇ 2024-2025ဒိူန် အီမိုႈခေဲင်လှံင်အိုမ်ယ်ု၊ရူကော၊ အိုမ်ငျံရ်၊ အေဲမ်ခြီရ်၊ ကုင်ငှေါ၊ ကိုက်ခည်း၊ မာဝ်းႎံင်း၊ လာဆေဝ်၊ မှိမ်မီုတ်ကာည်းမိုဂူႈကဲနီန် ဘယ်ႎိူဝ်ႈဟာဝ်း ကျောင်(603)ကျောင် တာဆြာ/ယာဆြာအီပနောဂေါည်(3,404)အီးကာည်း ကောန်ကျောင်အီဟိုက်ပနော လာည်းပိင်ငျာ ဂေါည်(69,064)အီး။
ဘည်ကဆီုဝ်ကောင်ဆံရ်ဇီုင်းပိင်ငျာကုင်တအာင်းဂဲ ကနာည်နံင်ဘယ်ပြိူဝ်ႈလေ ကညာအီမိူဝ်ႈပိင်ငျာဘံန်နံင်ဒေဲႈနီန်ဘယ်ပျိူဝ်ႇယိူဝ်ႇဒေဲႈ ကျောင်တက္ကသိုလ် Ta’ang EducationAssociation (TEA)နီန်။ ဆာ်မိုႈ ႎါင်ပနောကျောင်(TEA)နီန်မာ် ဟည်ဘယ်ႎိူဝ်ႈပနောဟာဝ်း ရောတ် လိူဝ်ႈ(3)ကာည်းဘယ်ႎိူဝ်ႈပနောဟာဝ်း အဆာင်းဒီပလိုမာ လိူဝ်ႈ(2)အောႏ။
ကဏ္ဍလံပ်ပိင်ငျာကုင်တအာင်းနီန် ကနာည်နံင်ကဟိုက်ကဟာဝ်းမှယ်ဒေဲႈအာည်ႇနီန် ဇူႈပေါTLEC မောကံပ်ပဲန်ဒေဲႈ Ta’ang Land University(TLU)ကဆီုပ်ကဘာရေဲန်ဟာဝ်းတောပ် World Online University(WOU)ဂဲ၊ ဆာ်မိူဝ်ႈ ကောန်ကျောင်အီဆိင်ဟိုက် ဆနီတ်တက္ကသိုလ်တေဲင်အောန်လဴင်ကဲနီန်မာ် နံင်ဒဲႈဂဲဆီုပ်ပနောဟာဝ်း။
ပ်ုန်ကယေင်ကျောင်TLECနီန်မိုႈ ဒါင်းဒါင်းအ်ုန်ရေဲန်ဟာဝ်း တံင်ဇူႈတေဲင်ဆနီတ်လံပ်ပိင်ငျာနီန် မောကံပ်ဘယ်ပျိူဝ်ႇယိူဝ်ႇႎှဲတ်ဒရဲရ်ဆနီတ်လံပ်ပိင်ငျာ၊ ရေဲန်ဟာဝ်းမောကံပ်ပဲန် ဆနီတ်လံပ်ပိင်ငျာပဲန်ကဇောည် ကနာည်ဟျံင်ႎဲ့၊မောကံပ်ဘယ်ပြိူဝ်ႈလေႈ ကောန်ဒဲႇဂဲ အီဘယ်တဂေန်းရေဲန်ဟာဝ်းနှာအာည်ႇ ကာည်း ခေဲင်အရာပ်အရာတအာင်းနီန်ကောန်ဒဲႇအဆာက်(18)ဆန်ုမ်လေႈရခြူမ်ဒိုႇဒိုည်ႇ မောကံပ်ဘိူန်း ပနောလာည်းပိင်ငျာ၊နှာင်းရေဲန်ဒဲႈဟာဝ်း ကနာည်ကောန်ကျောင်ဂဲ မောကံပ်ဘိူန်းပနောလာည်းပိင်ငျာ ခီတ်ကာပ်ကျောင်အဆာင်းဇာရ်ကုင်အီဟံရ်၊ကောန်ဒဲႇဂဲ အီအာဝ်ဘိူန်းအခွါင်းပနောပိင်ငျာဒိူန် မောကံပ်ဘိူန်းပနောပိင်ငျာဘာည်းကောန်အီဟံရ်ကာည်းကောန်ဒဲႇပါန်အဆာက်ဒါင်းဂဲဒိူန်မာ် မောကံပ်ဘိူန်းအခွါင်းပနောပိင်ငျာနီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists