ရေဲန်ဟောည်ႇဟာဝ်းပ္လေါည်အာပ်ဒဲႈဘွည်ႇဒီပလိုမာ တကောန်ကျောင် အီပနောပဲန်ဆြာ လိူဝ်ႈ(1)
24 November 2025
ရေဲန်ဟောည်ႇဟာဝ်းပ္လေါည်အာပ်ဒဲႈဘွည်ႇဒီပလိုမာ တကောန်ကျောင် အီပနောပဲန်ဆြာ လိူဝ်ႈ(1)
အိုမ်ယ်ုရ်၊ ကျံရ်ကိူရ်အူ ဆငည်း(24)
ဆဒါင်ကုင်တအာင်း
ဆန်ုမ်2025၊ ကျံရ်ကိူရ်အူ ဆငည်း(20)ဒိူန် ကပါင်ဖီုက်လျှံင်ဇီုင်းပိင်ငျာခြိူဝ်းတအာင်း (Ta'ang Education Academy-TEA) ရေဲန်ဟောည်ႇဟာဝ်း ပ္လေါည်အာပ်ဒဲႈဘွည်ႇဒီပလိုမာ တကောန်ကျောင် အီပနောပဲန်ဆြာ လိူဝ်ႈ(1) ပလှံင်အိုမ်ယ်ုရ်၊ အိူင်အိုမ်ယ်ုရ်၊ ခေဲင်ကုင်တအာင်းအောႏ။
ပ္လေါည်အာပ်ဒဲႈဘွည်ႇဒီန် PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်ကျော် က္လာင်းဒါႈ “ဂေါႇဇီုင်းကာန်ယိူဝ်ႇတီုက်ႎှီုန်း လှေင်ဟာဝ်း(70)ဆန်ုမ်လေႈ ကတူႇထီပ်တက်ုတ် လံပ်ပိင်ငျာနီး ဘံန်ဆီုက်ဘြာန်ဂဲ ဆီမ်းအာဏာမာ် လံပ်ပိင်ငျာနီး လူလှဲဝ်ႈဟာဝ်းဒိုႇ တာဆြာ/ယာဆြာ အီလှဲမ်တောန်ကဒါႇကဲမာ် ရေဲန် CDM လီပ်ကပိုမ်ဒေဲႈဒိုႇခေဲင် ဖုင်ယိူဝ်ႇတီုက်ႎှီုန်းဂဲ”။
ကက္လာင်းဒါႈဘိုး“ဂေါႇဘည်ဒီန် လိုဒဲႈဘ္လောမ်ဒါင်းဒါင်း ကနာည်နံင်လံပ်ပိင်ငျာနီး မောကံပ်လောတ်လာပ်ဒါႇမှယ် ကဇေန်နီး။ဘည်နံပ်အော လံပ်ပိင်ငျာဒါႈအီး အာဝ်ဒါႈအီမိူဝ်ႈအာဏာဂဲ၊ အီဒါဂြူယူနီဖောင်းဂဲ၊ အီဘားလာက်နာက်ဂဲကာည်း အီဘိူန်းရေဲန် သမ္မတဂဲ အာဝ်ဘိူန်းလီပ်ချှုက်ဆံင်ခံတ်။ ကနာည်လံပ်ပိင်ငျာနီး နှာင်းကတာရ်ႈဒါင်းဟိုက်ဇာရ် ဖုင်လံပ်ပိင်ငျာဂဲ လိုဘိူန်းဘ္လံက် လောတ်လောတ်လာပ်လာပ်။ လိုရီန်းရဲတ်ရေဲန်ဟာဝ်း ဇီုင်းကာန်လံပ်ပိင်ငျာနီး မောကံပ်ရောတ်စာမ်း ဘည်ပ်ုန်ကကာမ်းအူန်းအယ်”အောႏ။
ဆဲႈဒါႇဒီန် ပ္လေါည်ပ္လိုတ်ကျောင်ဒီန် PSLF/TNAL တားချှာင်ဇီုင်းကာန်တောန်နဲ ခူန်ချု တားဘုင်ကျော်၊ တားတီုင်အွံရ်ဆီုက် ခူန်ချု တားဟိူဝ်ပ္လါင်၊ ဂေါပ်တားချှာင်ဇီုင်းကာန်တောန်နဲ (2) ခူန်အွံရ်ဒါင်း တားပါင်လ၊ ဒီဒီပိုႈစေင် အီအွံရ် ကောင်ဆံရ်ဇီုင်းပိင်ငျာကုင်တအာင်း-TLEC၊ ပါမောက္ခ ဒေါက်တာဟောည်၊ ဒေါက်တာမျိုးတာန်းထူန်းကာည်း တာဆြာ/ယာဆြာဂဲ၊ ကောန်ကျောင်ဂဲကာည်း ကူန်ရဝ်မာဂါင်ဂဲ ကစုကပိုမ်ဂေါည်(1200)အီလေႈ ဟိုက်ရောတ်ဒေဲႈ။ ဒါႇခူဒီန် ချဒဲႈဟာဝ်းဆု တကောန်ကျောင် အီလှဲမ်တောန်ကဒါႇ၊ ချဒဲႈဟာဝ်းဘိုးပ္လါႇဘေဲႇလှိုပ်ဂုင် တတာဆြာ/ယာဆြာ အီပနောဂဲကာည်း အာပ်ဒဲႈဟာဝ်းဘွည်ႇဒီပလိုမာအောႏ။
ကျောင် TEA လိူဝ်ႈ(1)နီး ကောန်အီပ်ုန်ဂေါည်(91)အီး၊ ကောန်အီမာည်းဂေါည်(26)အီး ကစုကပိုမ်ဂေါည်(117)အီး ဘံန်ဂဲဟောည်ႇထာမ်းဇီုင်းကာန် ပဲန်တာဆြာယာဆြာလှေင်(1)ဆန်ုမ် စီအာပ်ဒဲႈဟာဝ်း ဘွည်ႇဒီပလိုမာနီးအောႏ။
ဘံန်ဟောည်ႇဒေဲႈ ကျံရ်ဖိုန် ဆငည်း(20)ဒိူန်မာ် ရေဲန်ဟောည်ႇဟာဝ်း ပ္လေါည်ပ္လိုတ်ကျောင်TEAလိူဝ်ႈ(2) ကောန်ႎါင်ပနောအီဟိုက်ဂေါည်(115)အီး။ ဘံန်ရောတ်ဒေဲႈ ကျံရ်(12) (ကျံရ်ဒီဇီန်ဘာ) နံင်ဆီုပ်ႎိူဝ်ႈဟာဝ်းဘိုး ကျောင်TEA လိူဝ်ႈ(3)အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists