ဖုင်ဘေဲႇတအာင်း-TLAဂဲ ရေဲန်ပ္လေါည်ပ္လိုတ်ႎါင်ပနောပ္လံက်တံင်ဇူႈ ဘေဲႇတအာင်း ပလှံင်အေဲမ်ငူည်
21 November 2025
ဖုင်ဘေဲႇတအာင်း-TLAဂဲ ရေဲန်ပ္လေါည်ပ္လိုတ်ႎါင်ပနောပ္လံက်တံင်ဇူႈ ဘေဲႇတအာင်း ပလှံင်အေဲမ်ငူည်
အေဲမ်ငူည်၊ ကျံရ်ကိူရ်အူ ဆငည်း(21)
ဆဒါင်ကုင်တအာင်း
ခည်မိုႈ ကျံရ်ကိူရ်အူ ဆငည်း(19)ဒိူန် ဖုင်ဘေဲႇတအာင်း-TLAဂဲ ဆာ်ႈအွံရ်ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ပ္လံက်တံင်ဇူႈဘေဲႇတအာင်း ပလှံင်အေဲမ်ငူည်၊ အိူင်အေဲမ်ခြီရ်၊ ခေဲင်ကုင်တအာင်းအောႏ။
ႎါင်ပနောဒီန် ကောန်အီမာည်းဂေါည်(40)အီး၊ ကောန်အီပ်ုန်ဂေါည်(62)အီး ကစုကပိုမ် ကောန်ႎါင်ပနောဂေါည်(102)အီး ဟိုက်ဒေဲႈပနော ချဒဲႈဟာဝ်းဆု တအီဘိူန်းဆုကဲ ။ ဆဲႈဒီန် အီဟိုက်ဟောည်ႇဟာဝ်း ႎါင်ပနောဘေဲႇတအာင်းနီး ဖုင်ဘေဲႇတအာင်း-TLAဂဲ စီအာပ်ဒဲႈပ္လါႇဘေဲႇလှိုပ်ဂုင် (Certificates)တဂဲ။
ပ္လေါည်ပ္လိုတ်ႎါင်ပနောဒီန် အီထာမ်းဇီုင်းကပ္လိူင် ပလှံင်အေဲမ်ငူည်၊ တာဆြာ/ယာဆြာTLAဂဲ၊ ကောန်ကျောင်ႎါင်ပနောဂဲ ကာည်း ကူန်ရဝ်မာဂါင်ဂဲ ကစုကပိုမ်ဂေါည်(300)အီး ဟိုက်ရောတ်ဒေဲႈအောႏ။
ပ်ုန်ကယေင်ဒေႎိူဝ်ႈဟာဝ်း ႎါင်ပနောဘေဲႇလူမ်တအာင်းနီးမိုႈ မောဘေဲႇတအာင်း ကံပ်ဘယ်ဒေဘ္လီုက်လှူပ် ခေဲင်ကပီုန်တအာင်း၊ မောကံပ်ဘိူန်းရိူရ်ႈလေႈ ပံပ်ဘေဲႇတအာင်း ကနာည်ကောန်အယ်တအာင်း ကံပ်ဘိူန်းဒီရ်ႈဘေဲႇတအာင်းဂီုန်းဂီုန်း၊ မောကံပ်ဘိူန်း ႎိူဝ်ႈႎါင်ပနော ဘေဲႇတအာင်း ခေဲင်ကပီုန်ကုင်တအာင်း၊ မောအယ်တအာင်း ကံပ်ဘယ်ဆမားဒါကြောႈ၊ ဆမားကိက်၊ ဆမားဒါ ဘေဲႇတအာင်းနီန်း တောန်အီးအောႏ။
ဘံန်ဟောည်ႇဒေဲႈ ကျံရ်ကိူရ်အူ၊ ဆငည်း(1)ဒိူန်မာ် ဖုင်ဘေဲႇတအာင်း-TLAဂဲ ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနောပ္လံက်တံင်ဇူႈ ဘေဲႇတအာင်း ပလှံင်ရူကော၊ ရဝ်မာဝ်းယာ်ႈ၊ ကောန်အီမာည်းဂေါည်(9)အီးကာည်း ကောန်အီပ်ုန်ဂေါည်(9)အီး ဟိုက်ဒေဲႈပနော ဟောည်ႇဟာဝ်း အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists