ဖုင်ဘေဲႇတအာင်း-TLAဂဲ ရေဲန်ပ္လေါည်ပ္လိုတ်ႎါင်ပနော ပ္လံက်တံင်ဇူႈ ဘေဲႇလူမ်တအာင်း ပရဝ်မာန်လိုင်
11 April 2025
ဖုင်ဘေဲႇတအာင်း-TLAဂဲ ရေဲန်ပ္လေါည်ပ္လိုတ်ႎါင်ပနော ပ္လံက်တံင်ဇူႈ ဘေဲႇလူမ်တအာင်း ပရဝ်မာန်လိုင်
လှံင်အေဲမ်ခြီရ်၊ ကျံရ်ဖိုန်၊ ဆငည်း(11)
ဆဒါင်ကုင်တအာင်း
ဖုင်ဘေဲႇတအာင်း-TLA ဂဲ ဆာ်ႈအွံရ်ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ပ္လံက်တံင်ဇူႈ ဘေဲႇလူမ်တအာင်း ပရဝ်မာန်လိုင် လှံင်အေဲမ်ခြီရ်၊ အိူင်အေဲမ်ခြီရ်၊ ခေဲင်ကုင်တအာင်း။
ပ္လေါည်ပ္လိုတ်ႎါင်ပနောနီး ဖုင်ဘေဲႇတအာင်း TLAဂဲ ဆာ်ႈအွံရ်ရေဲန်ဟောည်ႇဟာဝ်း ခည်မိုႈ ကျံရ်ဖိုန် ဆငည်း(8) အခိင်ခီညှာ(9)နြီ ရောတ်စာ်မ်း ရဆံန်(12)နြီ ။
ပ္လံက်တံင်ဇူႈ ဘေဲႇလူမ်တအာင်းနီး ႎိူဝ်ႈဟာဝ်း ပရဝ်မာန်လိုင် ကာည်း ရဝ်ကောင်ခေ အာရ်ဒီ၊ ဆာ်မိုႈပ္လေါည်ႎါင်ပနောနီး ဂဲကစုကပိုမ် ရေဲန်ဟာဝ်းလိူည် ပရဝ်မာန်လိုင်။
အခိင်ႎိူဝ်ႈဟာဝ်း ႎါင်ပနောနီး ကောန်ဒဲႇဂဲ အီဂေါည် ခမိုမာန်လိုင်၊ ရဝ်လောည်အင်၊ ရဝ်မာဝ်းႎါး ကာည်း ရဝ်လောည်လောမ်မာ် ဟိုက်ရောတ်ဒေဲႈပနော။
ပ္လံက်တံင်ဇူႈဘေဲႇလူမ်တအာင်းနီး ကောန်အီမာည်းဂေါည်(80) အီး၊ ကောန်အီပ်ုန်ဂေါည်(122)အီး ကစုကပိုမ် ကောန်ကျောင်ဂေါည်(202)အီး ဟိုက်ဒေဲႈပနော။
ကောန်ဒဲႇအီဟိုက်ဟောည်ႇဟာဝ်း ႎါင်ပနောကဲနီး ဖုင်ဘေဲႇတအာင်း-TLAဂဲ အာပ်ဒဲႈဟာဝ်း ပ္လါႇဘေဲႇလှိုပ်ဂုင် (Certificates)တဂဲ။ ကောန်ကျောင် ကာည်း ကူန်ရဝ်မာဂါင်ဂဲ အီဟိုက်ရောတ်ဒေဲႈ ပ္လေါည်ပ္လိတ်ဝါင်ပနောနီး ကစုကပိုမ်ဂေါည် (300)လှိူဝ်း။
ပ်ုန်ကယေင်ဒေႎိူဝ်ႈဟာဝ်းဝါင်ပနောဘေဲႇလူမ်တအာင်းနီန် မိုႈ နံင်ဘေဲႇလူမ်တအာင်းအယ် မောကံပ်ကတာရ်ႈဒါင်းဇာရ်၊ ဘည်မိုႈ ႎံရ်ခြိုုဝ်းတအာင်း ပိုင်ကြောႈ နံင်အီကနှေရ်၊ နံင်တောန်တီုင်ဌာန ဘိူန်းလီပ်ပနော လောင်ပိင်ငျာဘေဲႇတအာင်းနီး၊ နံင်ကြောႈကူန်တာမာယာအယ် အာဝ်ဟြာည်ႇကမာ်ႈ ၊ နံင်အိီးရံပ် ဇီုင်း ကပ္လိူင်တီုင်ဌာနဖုင်တအာင်း ကာည်း တိုအီးလူမ်ဂဲ ဘယ်ဒေဒါဘေဲႇလူမ်တအာင်း ၊ နံင်ကံပ်ဘယ်ဒေရိူရ်ႈလေႈ ပံပ်မဂ္ဂဇီန် ဘေဲႇလူမ်တအာင်း ၊ ခေဲင်ကျောင်ပိင်ငျာခြိုုဝ်းတအာင်း ကနာည်နံင်ဘယ်ဒေပြိူဝ်ႈလေႈ တာဆြာ/ယာဆြာ အီးနံင်ပနောဟာဝ်း ဖာဆာဘေဲႇလူမ်တအာင်းတောန်နဲ။
ဘံန်ဟောည်ႇဒေဲႈ ကျံရ်ဖိုန် ဆငည်း(2)ဒိူန်မာ် ပလှံင်အေဲမ်ခြီရ် ဖုင်ဘေဲႇတအာင်း -TLAဂဲ ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနော ပ္လံက်တံင်ဇူႈ ဘေဲႇလူမ်တအာင်း၊ ကောန်ကျောင်အီဟိုက်ဂေါည် (166)အီးအောႏ။
#PSLF/TNLA
#တီုင်ပ္လေႈလေႈဆဒါင်
Comment Lists