ရေဲန်ဟောည်ႇဟာဝ်း ပ္လေါည်ပ္လိုတ်ကျောင်ဘြောင်ချှာင် (Administrative School) လိူဝ်ႈ(2)
04 January 2025
ရေဲန်ဟောည်ႇဟာဝ်း ပ္လေါည်ပ္လိုတ်ကျောင်ဘြောင်ချှာင် (Administrative School) လိူဝ်ႈ(2)
ကုင်တအာင်း၊ ကျံရ်အူ၊ ဆငည်း(4)
ဆဒါင်ကုင်တအာင်း
တံပ်အွံရ်ပ်ုန်လောတ်ကပီုန်တအာင်း PSLF/TNLA ဒီဘြောင်ချှာင်ကုင်တအာင်းအူဒီ ဌာနတီုင်ဒါင်းဘြောင်ချှာင်ဂဲ ဆောအွံရ်ႎိူဝ်ႈဟာဝ်း ႎါင်ပနောကျောင်ဘြောင်ချှာင် (Administrative School) လိူဝ်ႈ(2)နီန် ခည်မိုႈ ကျံရ်ကိူရ်အာရ် ဆငည်း (31)ဒိူန် ရေဲန်ဟောည်ႇဟာဝ်း ပ္လေါည်ပ္လိုတ်ႎါင်ပနောဒီန်အောႏ။
ပ္လေါည်ပ္လိုတ်ႎါင်ပနောဒီန် ရေဲန်ဟာဝ်း ခီညှာ(9)နြီ ရောတ်စာ်မ်း ရဆံန်(12)နြီ တာမ်တားတီုင်အွံရ်(1) ခူန်ချုဒါင်း တားဇိုက်ဇာရ် ဟိုက်ရောတ်တံမ်းဟာဝ်း ကြောႈက္လာင်းဒါႈ ခေဲင်လံပ်တီုက်နာန်း 1027နီန် အယ်ဘယ်တီုက်ဆီမ်းဟာဝ်း လှံင်(12)လှံင်၊ ခေဲင်လှံင်ကဲဒီန် ဘည်လိုဘြောင်ချှာင်ဟာဝ်းကဲနီန် တီုင်ဘြောင်ချှာင်နီန်း အ်ုန်မိုႈဌာနအီအရေးဒါင်းအူလှေ၊ ကောန်ကျောင်အီနံင်လေႈဟာဝ်းကဲနီန် မိုႈ တိုပိုင်းတည်း အစိုးယအူလှေအောႏ။
ႎါင်ပနောကျောင်ဘြောင်ချှာင်နီန်း ႎိူဝ်ႈဟာဝ်းလှေင်(2)ဆန်ုမ်လေႈ၊ ကကာ်ႈဟာဝ်းပဲန် ဖာဆာ(3)လှေ၊ ဒါင်းဒါင်းအ်ုန် ကဲပနောဟာဝ်း Personal Capacity Building၊ Basic Poiltic၊ ဖာဆာဇီုင်းကာန်လံပ်ဘြောင်ချှာင် ကာည်း ဖာဆာဇီုင်းကာန်ပလိက်ကဲနီန်၊ ဒဲႈကဲလေႈဒေင် ရေဲန်ဒေဲႈအခ်ုကဲနီန်အောႏ။
ႎါင်ပနောကျောင်ဘြောင်ချှာင်နီန်း ကောန်ကျောင်ဂေါည် (55)အီး၊ ဒီကဲနံင်ရံပ်ထာမ်းဟာဝ်း ဇီုင်းကာန်မိုႈ လံပ်ဘြောင်ချှာင် ကာည်း လံပ်ဒံန်ခြဲတြားဥပဒေကဲနီန်အောႏ။
ဘည်ပ်ုန်ကယေင်ႎိူဝ်ႈဟာဝ်းကျောင်နီန်းမိုႈ (1) ကနာည်နံင် ဘယ်ရေဲန်ဟာဝ်းအခ်ု မူဝါဒ တံပ်အွံရ်ပ်ုန်လောတ်ကပီုန်တအာင်း PSLF ၊ (2) အနာဂတ် တားဘြောင်ချှာင် ကုင်တအာင်း ကာည်း ကနာည်နံင်ပြံတ်လေႈ တားတီုင်အွံရ် ကပီုန်ပလိက်ဂဲ ၊ (3) နံင်ဘယ်ပျိုဝ်ႇယိူဝ်ႇ ယန္တရား လံပ်ဘြောင်ချှာင် ဒဲႈအ်ုန်ပေန်တကူန်ရဝ်မာဂါင်ဂဲ၊ (4) နံင်ဘယ်တောပ် ရေဲန်ဟာဝ်း ဇီုင်းကာန်လံပ်ဘြောင်ချှာင် ကာည်း ဇီုင်းကာန်ဒံန်ခြဲတြားဥပဒေဂဲ နံင်ဇာ်ႈလအောႏ။
ကျောင်ဘြောင်ချှာင် လိူဝ်ႈ(1) ဇူႈ ႎိူဝ်ႈဟာဝ်း ခည်မိုႈ ဆန်ုမ် 2018ဒိူန်၊ ကောန်ကျောင်ဟိုက်ဂေါည်(54)အီး ပနောဟောည်ႇဟာဝ်း၊ ကဇေန်နီန် ကောန်ကျောင်အီလေႈဟာဝ်းကဲဒီန် ကဲရံပ်ထာမ်းဟာဝ်း ဇီုင်းကပ္လိူင် အီချှာင်ဇီုင်းလူမ်တီုင်ဒါင်းဂဲ၊ တားလှံင်ဘြောင်ချှာင်ဂဲ၊ အီချှာင်ဇီုင်းလူမ်အိူင်ဂဲ၊ တားလှံင်ဒံန်ခြဲတြားဥပဒေဂဲ ကာည်း တားလှံင်ပလိက်ကဲနီန်အောႏ။
ပ္လေါည်ပ္လိုတ်ႎါင်ပနောနီန် တံပ်အွံရ်ပ်ုန်လောတ်ကပီုန်တအာင်း PSLF/TNLA တာမ်တားတီုင်အွံရ်(1) တာမ်ခူန်ချုဒါင်း တားဇိုက်ဇာရ်၊ တာမ်တားတီုင်အွံရ်(2) ခူန်ချု တားခူရ်လာန်း၊ ခူန်အွံရ်ချု တားအိုမ်တမာဝ်း၊ ခူန်အွံရ်ချု တားနော်ရိူန်း၊တားတီုင်ဘြောင်ချှာင် ခူန်အွံရ်ချု တားဂူ;ဇာရ်ခူန်အွံရ်ဒါင်း တားကုင်ခြီရ်၊ ခူန် ႎါင်ခူန်ဂဲ၊ ကောန်ကျောင်ဂဲ ကာည်း ကူန်ရဝ်မာဂါင်ဂဲ ကစုကပိုမ်ဂေါည် (200)ထာန်နီန်း ဟိုက်ရောတ်ဒေဲႈအောႏ။
#PSLF/TNLA
#တီုင်ပ္လေႈလေႈဆဒါင်
#ဆဒါင်အရာပ်အရာ
Comment Lists