01 January 2025

PSLF/TNLA တာမ်တားတီုင်အွံရ် ကာည်း တားတီုင်အွံရ်ဆီုက် ဟိုက်ရောတ်ဂြူပ် ပ္လေါည်စဝ်လောန် အန္တိမအဂ္ဂိ စဝ်ဒါင်း ပဓာနနာယက ဘဒ္ဒန္တနန္ဒသီရိ

ရူကော ၊ ကျံရ်အူ၊ ဆငည်း (1)

ဆဒါင်ကုင်တအာင်း

ကုင်တအာင်း၊ လှံင်ရူကော၊ ပရဝ်မာဝ်းယာႈ ကျံရ်ကိူရ်အာရ်၊ ဇူႈ ဆငည်း(25) ရောတ် ဆငည်း(29)ဒိူန် ရေဲန်ဟာဝ်းပ္လေါည်စဝ်လောန် အန္တိမအဂ္ဂိ စဝ်ဒါင်း ပဓာနနာယက ဘဒ္ဒန္တနန္ဒသီရိ လှေင်ဖံန်ဆငည်းအောႏ။

ပ္လေါည်စဝ်လောန်အန္တိမအဂ္ဂိနီန် PSLF/TNLA တာမ်တားတီုင်အွံရ်(1) တာမ်ခူန်ချုဒါင်း တားဇိုက်ဇာရ်၊ တာမ်တားတီုင်အွံရ်(2) ခူန်ချု တားခူရ်လာန်း၊ တားတီုင်အွံရ်ဆီုက် ခူန်ချု တားဟိူဝ်ပ္လါင် ကာည်း အီအွံရ်တီုင်ဌာနဂဲ ဟိုက်ရောတ်ဒေဲႈဂြူပ်အောႏ။

စဝ်ဒါင်း ပဓာနနာယက ဘဒ္ဒန္တနန္ဒသီရိ အဆာက်ဘိူန်း(89)ဆန်ုမ်၊ ဝါတော်ဘိူန်း(69)ဝါ၊ ခည်မိုႈ 1386ဆန်ုမ်၊ တော်သလီန်းလဆာန်း၊ ဆငည်း (8) ဆငည်းချဴင်ဆီ စူန်အံပ်(4:30)နြီဒိူန် အ်ုန်စီ လောန်ဟာဝ်းအောႏ။

စဝ်ဒါင်း ဘဒ္ဒန္တနန္ဒသီရိနီန် ကူန်မာအ်ုန်မိုႈ တာဆဲင်ဟိူဝ် ကာည်း ယာမာကေင် အ်ုန်ကိူတ် ဆန်ုမ် 1297 ဒိူန် ကဲအူပီအူႎါဂေါည်ဖံန်အီး စဝ်ဒါင်းမိုႈ ကောန်နံပါတ်အာရ်၊ အံက်ကျောင်ဆေတဝူန် ရဝ်မာဝ်ယာႈ ထာမ်းဟာဝ်း ဇီုင်းကပ္လိူင်ဆာဆနာနီန်း လှေင်(57)ဆန်ုမ်အောႏ။

ဉတုဇရုပ်ကလာပ်စဝ်ဒါင်းနီန်း ကျံရ်ကိူရ်အာရ်၊ ဆငည်း(27) ကာည်း ဆငည်း(28)ဒိူန် ရေဲန်ပ္လေါည်ဒဲႈကူန်ရဝ်မာဂါင်ဂဲ ဂြူပ်ဟာဝ်း ကျံရ်ကိူရ်အာရ် ဆငည်း(29)ဒိူန် စီတိုက်ဟာဝ်း ရုပ်ကလာပ်စဝ်လောန်နီန်အောႏ။

ပ္လေါည်စဝ်လောန် စဝ်ဒါင်း အန္တိမအဂ္ဂိနီန် ကူန်ရဝ်မာဂါင်ဂဲ အီဂေါည်တပြောရဝ် တာဒါယကာ၊ ယာဒါယိကာဂဲနီန် ‌ရောတ်ဒေဲႈဂြူပ်၊ ကနာည်နံင်ပဲန်ရေဲန်ဟာဝ်း ပ္လေါည်စဝ်လောန်နီန်း တာမ်ခူန်အွံရ်ဒါင်း တားမႎါဝ်း စီလှူဟာဝ်းရိူန်းအောႏ။

#PSLF/TNLA

#တီုင်ပ္လေႈလေႈဆဒါင်

#ဆဒါင်အရာပ်အရာ

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း