ဖုင်လံပ်ခေါခါႇကုင်တအာင်း -THC ဂဲ ထိုဒဲႈ BCG ဆနံမ် ထိင်ခြဲကနာည်တို ကုင်လှံင်ဒီဘြောင်ချှာင် PSLF/TNLA
28 December 2024
ဖုင်လံပ်ခေါခါႇကုင်တအာင်း -THC ဂဲ ထိုဒဲႈ BCG ဆနံမ် ထိင်ခြဲကနာည်တို ကုင်လှံင်ဒီဘြောင်ချှာင် PSLF/TNLA
ဆန်ုမ်2024၊ ကျံရ် (12) ဆငည်း (28)
ဖုင်လံပ်ခေါခါႇကုင်တအာင်း -THC ဂဲ ထိုဒဲႈ BCG ဆနံမ်ထိင်ခြဲကနာည်တို ကုင်လှံင်ဒီဘြောင်ချှာင် PSLF/TNLA ဂဲထိုဒဲႈဆနံမ်ထိင်ခြဲကနာည်တိုလလိုည်း အ်ုန်မိုႈလိူဝ်ႈအူအောႏ။
ပလှံင်အေဲမ်ကိုက် ယာမ်မိုႈ ကျံရ်(11) ဆငည်း (23)ဒိူန်း ဖုင် THC ဂဲ ထိုဒဲႈ ဆနံမ် ထိင်ခြဲကနာည်တို တကောန်ဒဲႇ ဘံန်ဟောည်ႇထိုဒဲႈဆနံမ်ဒီန် ဂဲနံင်ဆီုပ်ထိုဟာဝ်း ဆနံမ်ထိင်ခြဲကနာည်တို ခေဲင်လှံင်အေဲမ်ခြီရ်၊ ရူကော၊ အိုမ်ငျံရ်၊ မိူင်မီတ်၊ မိုဂူႈကဲနီန်အောႏ။
BCG ဆနံမ်ထိင်ခြဲကနာည်တိုနီန် အ်ုန်မိုႈဆနံမ်အီဒံန်ခြဲဒဲႈ တီဗီပိုင်းဟောႇ ကာည်း ရာဂါတိုအီးအီဘူနိုက် ဘံန်ဟောည်ႇထိုဒဲႈဆနံမ် ကောန်ဒဲႇဂဲ ဆမာဆဖေး ဒီထိုဒဲႈဆနံမ်ဒီန်မာ် အာဝ်ဘိူန်းမ ချီန်ဒဲႈဆနံမ်လှေဟံရ်အောႏ။
ဖုင်လံပ်ခေါခါႇကုင်တအာင်း -THC ဂဲ ခေဲင်ဘြည် (5)ဆငည်းနီန် ဂဲဘယ်ဒေထိုဒဲႈဟာဝ်း ဆနံမ်ထင်ခြဲကနာည်တို တကောန်ဒဲႇ အီဂေါည်ခေဲင်ကုင်တအာင်း (1016)အီး။ BCG ဆနံမ်ထိင်ခြဲကနာည်တိုနီန် နံင်ဆီုပ်ထိုဟာဝ်း ကျံရ်ကိူရ်အာရ် ရောတ်ဆငည်း (31)အောႏ။
ဆိင်ဒဲႈပ္လူရ်ႈဆတိ တကူန်ရဝ်မာဂါင်ဂဲအီဂေါည်ခေဲင်ကုင်တအာင်းအယ် ကနာည်ကောန်ဒဲႇဂဲ နံင်ဘိူန်းဒေထို ဆနံမ်ထိင်ခြဲကနာည်တို လိုဟာဝ်းထို ဒီကဒါတ်ဂါင်ဆနံမ်အောႏ။
ဘံန်ဟောည်ႇဒီန် ဆာ်ရောတ်ဒေဲႈ ဆန်ုမ် 2025 ကျံရ်(1) ဖုင်ခေါခါႇကုင်တအာင်း -THCဂဲ နံင်ရီန်းရဲတ်ဒေထိုဒဲႈဟာဝ်း ဆနံမ် ထိင်ခြဲကနာည်တို(7)မျို တကောန်ဒဲႇ အဆာက် (1)ဆန်ုမ်လေႈကတေဲင်အောႏ။
#PSLF/TNLA
#တီုင်ပ္လေႈလေႈဆဒါင်
#ဆဒါင်အရာပ်အရာ
Comment Lists