ပ်ုန်တေဲႇဒေဲႈ ကဝ်အီကဆီုပ်ဒဲႈဇီုင်း ကနာည်နံင်ဟာဝ်းရေဲန်ဇီုင်းကာန် ကဒါႇကုင်ခယ် တိုအီး (500)အီးလေႈ ငျာဘိအူန်းဂဲ ပလှံင်မူစယ်
25 December 2024
ပ်ုန်တေဲႇဒေဲႈ ကဝ်အီကဆီုပ်ဒဲႈဇီုင်း ကနာည်နံင်ဟာဝ်းရေဲန်ဇီုင်းကာန် ကဒါႇကုင်ခယ် တိုအီး (500)အီးလေႈ ငျာဘိအူန်းဂဲ ပလှံင်မူစယ်
လှံင်မူစယ်၊ ကျံရ်(12)၊ ဆငည်း(25)
ဆဒါင်ကုင်တအာင်း
ကုင်တအာင်း၊ ဒီကစာပ် ကုင်ဘြာန်ကာည်း ကုင်ခယ် ဒီဆီုက်ဘြာန်ဂဲ ထိင်အူန်း ပလှံင်မူစယ် ပ်ုန်တေဲႇဒေဲႈ ကဝ်အီကဆီုပ်ဒဲႈဇီုင်း ကနာည်နံင်ဟာဝ်းရေဲန်ဇီုင်းကာန် ကဒါႇကုင်ခယ် ပလှံင်ဆျှိုည်လီ တိုအီး (500)အီးလေႈ အာဝ်ဘိူန်းဒေရေဲန်ဇီုင်းကာန် ဘိအူန်းဂဲ ကတူႈဟာဝ်းကီန်းဒည်းအောႏ။
ဘံန်ဆီုက်ဘြာန်ဂဲဆီမ်းဟာဝ်းအာဏာ ဂေါႇ ငေါႈခံန်ကူမ်ကဲနီန် ဟိုက်ဇာရ် ကာည်း ကီန်းဒည်းအာဝ်မိူဝ်ႈဇီုင်းကာန် ကဝ်အီကဆီုပ်ဒဲႈဇီုင်း စီဲတေဲႇဒေဲႈ ကူန်ရဝ်မာဂါင်ဂဲ အီဂေါည်ပကုင်ဘြာန် တိုအီး(500)အီးလေႈ ကနာည်နံင်ဟာဝ်းရေဲန်ဇီုင်းကာန် ကုင်ခယ် ဒါႈ နံင်ဘိူန်းလဆျှီန်ဂီုန်း ဒဲႈဂဲညူမ် တေဲႇဒေဲႈဂဲဘည်နီန်အောႏ။
ပ်ုန်တေဲႇဒေဲႈ ကဝ်အီကဆီုပ်ဒဲႈဇီုင်း တိုအီး(500)အီလေႈဒီန် အ်ုန်တောပ် ကောန်အီပ်ုန် အဆာက်(20)ဆန်ုမ်ကဲနီး ခည်ဂီုန်း၊ ကဇေန်နီန်း ဂဲငျာဒေဘိအူန်း ပဂိုဒေါင် တေင်သန်းချှီ ပါင်ဒီဇံင်ကား ခေဲင်လှံင်မူစဲ။ ဆဲႈဒီန် ငျာဒေဘိအူန်းဘိုးဂဲ ပဂိုဒေါင် ခေဲင်ဇံင်မံင်ခ္လံက်ကဲဒိူန်အောႏ။
ပ်ုန်ငျာဒေဘိအူန်းဂဲဒီန် တောပ်ဆငည်းအီုင်ဒီး ဟောည်ႇဘိူန်း(3)ကျံရ်လေႈ ညှံမ်ဘိူန်းဒေရေဲန်ဇီုင်းကာန် ငျာဒေဘိအူန်းဂဲ တောပ်ကဇေန်နီန်အောႏ။
ကဇေန်နီန် ကဝ်အီကဆီုပ်ဒဲႈဇီုင်းကာန်ဒီန် ဘိအူန်းဂဲ ခေဲင်ဂိုဒေါင် အာဝ်ဒဲႈဂဲဟောမ်မှာန်၊ ဆဲႈဒီန် ဆာ်မိူဝ်ႈအီမှာန်းဝီရ်ပဂေါည်မာ် အ်ုန်မှာန်းရိူန်း(60)ဆဲန်ဘျာအောႏ။
ခေဲင်ငျာဒေဘိအူန်းကဲဒီန် အီဒဝ်လောတ်ဲဒေဲႈမံင်ခ္လံက်ကဲဒိူန် က္လာင်းဒါႈ အီဂေါည်အူန်းဂဲဒီန် ကနာည်နံင်ဘိူန်း ဒဝ်းလောတ်ဒါႇဒီန် အာဝ်မိူဝ်ႈမ အီဇောည်ဒဲႈဂဲဘည်နီန်အောႏ။
ဂေါႇဘည်ဒီန် အီမိုႈ ကောန်တဘိုက်၊ ကူန်ရဝ်မာဂါင်အယ်ဂဲ ကနာည်နံင်အာဝ်ငျာဘိုးဘာည်းနီန် လိုအူန်းမိူဝ်ႈဆဒိ ၊ ဆာ်အယ်နံင်ဟာဝ်းရေဲန်ဇီုင်းကာန် ကဒါႇကုင်ခယ် လိုမိူဝ်ႈဒီညူမ် ခြိူဝ်းမျိုးအယ် ကာည်း ႎါႎည်းအယ်ကဲနီန် စီဟာဝ်းအောႏ။
#PSLF/TNLA
#တီုင်ပ္လေႈလေႈဆဒါင်
#ဆဒါင်အရာရာ
Comment Lists