ရေဲန်ဟာဝ်းပ္လေါည်ပ္လိုတ်ဓါင်ပနော ဇီုင်းကည်းခူန်-T.A.O.T လိူဝ်ႈ(4)ကာည်း ဓိူဝ်ႈဓါင်ပနော ဇီုင်းကည်းခူန် လိူဝ်ႈ(5)
18 December 2024
ရေဲန်ဟာဝ်းပ္လေါည်ပ္လိုတ်ဓါင်ပနော ဇီုင်းကည်းခူန်-T.A.O.T လိူဝ်ႈ(4)ကာည်း ဓိူဝ်ႈဓါင်ပနော ဇီုင်းကည်းခူန် လိူဝ်ႈ(5)
ဆန်ုမ်2024၊ ကျံရ်(12) ဆငည်း (18)
တံပ်အွံရ်ပ်ုန်လောတ်ကပီုန်တအာင်း PSLF/TNLAဂဲ ရေဲန်ဟာဝ်းပ္လေါည်ပ္လိုတ်ဓါင်ပနော ဇီုင်ကည်းခူန်-T.A.O.T လိူဝ်ႈ(4)ကာည်း ဓိူဝ်ႈဓါင်ပနော ဇီုင်းကည်းခူန် လိူဝ်ႈ(5)ဒီန် ဂဲရေဲန်ဟာဝ်း ဆန်ုမ် 2024 ကျံရ်(11)ဆငည်း (15)ဟောည်ႇဟာဝ်းအူဆငည်း။ TAOT လိူဝ်ႈ(4)နီန် အခိင်ဓါင်ပနောလှေင်ဟာဝ်း (18)ကျံရ် ကောန်ကျောင် ကပိုမ် (132)အီးဟိုက်ရောတ်ဒေဲႈအောႏ။
ဓါင်ပနောဒီန် ခေဲင်လံပ်တီုက်နာန်း 1027 ဒေါန်(2)ဒိူန်(12)အီး လှူဟာဝ်းတိုပိုင်းယံင်နှာမ်အဆာက်။ ဂေါႇဘည်ဒီန် ပ္လေါည်ပ္လိုတ်ဓါင်ပနော ကောန်ကျောင် အီဘယ်ဒေဟိုက် ဂေါည်လိူည်(114)အီး ကောန်ကျောင် အီနံင်ဟိုက်ဓါင်ပနော ဇီုင်းကည်းခူန် လိူဝ်ႈ(5)နီန် ဂေါည်(135)အီး ဘယ်ဒေဓိူဝ်ႈဟာဝ်းဓါင်ပနောကမာည်းအောႏ။
ခေဲင်ပ္လေါည်ပ္လိုတ်ဓါင်ပနောဒီန် PSLF/TNLA တားတီုင်အွံရ် ခူန်ချုဒါင်း တားအိုက်ဘုင် စီတံမ်းကြောႈက္လာင်းဒါႈ ခေဲင်လံပ်တီုက်နာန်း ဂဲအီလေႈတီုက်ဆီုက် လီပ်ကဖြောမ်ကရောမ်တောပ် တီုင်တံပ်ဒါင်း ကာည်းတီုင်တံပ်ဂဲ အောမာ်တိူဝ်ႈကနေဲႈအူန်း တကောန်ဓါင်ပနောခူန်ဂဲ အီလှူဟာဝ်းတိုပိုင်းယံင်နှာမ်အဆာက်၊ ဘည်ဇေန်နီန် ခူန်ဂဲအီနံင်ထာမ်းဟာဝ်းဇီုင်းကပ္လိုင်ဂဲ ဒီညားဒေရေဲန်ဇီုင်းအဆေမာ် လိုကျိုးကျားရေဲန်ဟာဝ်းတောန်ကဝ်တောန်အီးအောႏ။
စီက္လာင်းဒါႈ ဂေါႇမေတ္တာ စေတနာကူန်ရဝ်မာဂါင်ကာည်း ဘိူန်းကဇောည်ကူန်ရဝ်မာဂါင်အယ်ဂဲ စီအံင်ကတီုက်ကပဲင်နီန် စီဘိူန်းဒေဝီရ်ဆီမ်းဟာဝ်းကုင်ကတာည်းအယ်။ ဂေါႇဘည်ဒီန် နံင်ပ်ုန်ကအာ်မ်းအယ်နိုက်လကတီးကရီး လိုရဲင်ဘ္လောမ်ကူန်ရဝ်မာဂါင် ကာည်း ကောန်ဆီုက်ကောန်နာန်းအယ် စီနံင်ဘယ်ဒေဆီုပ်ဟိုက်ဟာဝ်းအောႏ။
PSLF/TNLAတားချှာင်ဇီုင်းကာန်တောန်နဲ ခူန်ချု တားဘုင်စော် စီဒဲခံင်ကျခံင်လ ဒါႈ” ကောန်ကျောင်အီလေႈဓါင်ပနော ဇီုင်းကည်းခူန်နီန် ခေဲင်ကုင်အယ်တအာင်း ဘည်ဆီုက်နာန်းအရေးတီုင်ကုင် ဂေါႇပဲဟည်ကတူႈကဒါႇတိူရ်ႈဇိူင်တိူရ်ႈခေဲင်ငါည်း အာဝ်ဓါန်းလိူည် လောင်ဆီုက်နာန်း အခိင်ထာမ်းဇီုင်းကာန် ခေဲင်တီုင်ဘြောင်ချှာင်၊ ဘ္လံက်ချှာင်တြား ကာည်းဇီုင်းကာန်ပ်ုန်ဟံရ်ခေဲင်တောန်ဌာန ကနာည်ကုင်အယ်တအာင်း ကံပ်ကတာရ်ဒါင်း ဂေါည်ပျော်ဆာယာတခိူည်း ခူန်အယ်ဂဲအီလေႈဓါင်ပနောကဲနီန် ညားဒေဂေါည်ဌာနအဆေမာ် ပ်ုန်ညားဒေရေဲန်ဇီုင်းကာန်ကပ္လိုင်မှောမာ် လိုကျိုးကျားဒေရေဲန်ဟာဝ်း နံင်ကံပ်ဟိုက်ဒါင်းဇာရ်အောႏ။
"အယ်ဟောည်ႇဘယ်ဒေတီုက်ယာႈဝီရ်ဘဝ်ရာန် ခေဲင်ကုင်တအာင်း ကဇေန်နီန်ဟည်ရောတ်အခိင်နံင်တိူဝ်ႈဇီုင်း ရေဲန်ဟာဝ်းယန္တယားဘြောင်ချှာင် ခေဲင်ကုင်တအာင်း လိုရေဲန်ဟာဝ်း ဇီုင်းကာန် လံပ်ဘ္လီုက်လှူပ်တြားဥပဒေ၊ ဇီုင်းကာန်ဘ္လံက်ချှာင်တြား၊ ဇီုင်းကာန်လံပ်ဒံန်ခြဲမှယ်အာည်နီန် နံင်ကူန်ရဝ်မာဂါင်ဂဲ အာဝ်ဇောႈခေဲင်ဖေးဆဝ်း မိုႈဒိုႇဖုင်အယ် မိူဝ်ႈဇီုင်းအောႏ။
ဆဲႈဒီန် PSLF/TNLA တားတီုင်အွံရ်ဆီုက် ခူန်ချု တားဟိုပ္လါင် ဒါႈ ဂေါႇအ်ုန်ညားဒေကကာဇီုင်းအရေးဆီုက် စီအာဝ်ဘယ်ဒေဟိုက်ရောတ်ဒေဲႈ ခေဲင်ပ္လေါည်ပ္လိုတ်ဓါင်ပနော စီတိုန်းဒေဲႈလိူည် ပ္လါႇဘေဲႇလှုပ်ဂုင်အောႏ။
ခေဲင်ပ္လါႇဘေဲႇဒီန် စီကိက်ဒါႈ” ဆငည်းအ်ုန်ဒီးနီး အ်ုန်မိုႈဆငည်းအ်ုန်အရေးဒါင်းခည်း တတံပ်နာန်းအယ် ၊ အောမာ်တိူဝ်ႈကနေဲႈအူန်းတကောန်ခူန်အယ် အီလှူဟာဝ်းတိုပိုင်းယံင်နှာမ်အဆာက် ခေဲင်လံပ်တီုက်နာန်း 1027 ဒေါန်(2) (12)အီး၊ ရံပ်ရိုႈအူန်း ကောန်ကျောင် (135) အီး အီနံင်ဟိုက် ဇီုင်းကည်းခူန် လိူဝ်ႈ(5)၊ ခူန်၊ဓါန်ခူန်ဂဲ အီထာမ်းဇီုင်းတောန်အီးမာ် လိုဆမား လောင်အရေးဆီုက်၊ အရေးတီုင်ကုင် ကာည်း လောင်ကဏ္ဍဘြောင်ချှာင် ဆာ်အယ်ဆမားလောင်ကဲနီန် စီနံင်ဘယ်ဒေဒံန်ခြဲ ကူန်ရဝ်မာဂါင်အယ်ဂဲကတီးကရီးအောႏ။
ခေဲင်ပ္လေါည်ပ္လိုတ်ဓါင်ပနောဒီန် ဇူႈဒေရေဲန် အခိင် (9)နြီရောတ် (12)နြီ ခေဲင်ပ္လေါည်ဒီန် အပ်ဒဲႈဟာဝ်းဆုတကောန်ကျောင် အီဘိူန်းဆု တောန်ကဒါႇ၊ အီဘိူန်းဆုလောင် စာပေ ကာည်း အီဘိူန်းဆု လောင်အရေးဆီုက်ကဲဒီန်အောႏ။
ခေဲင်ပ္လေါည်ဒီန် PSLF/TNLA တားတီုင်အွံရ် ခူန်ချု တားအိုက်ဘုင် ၊ တားချှာင်ဇီုင်းကာန်တောန်နဲ ခူန်ချု တားဘုင်စော်၊ တားချှာင်ဇီုင်းဆီုက် တားနောရိူန်း ကာည်း အီရံပ်ဇီုင်းကပ္လိုင်တောန်တီုင်ဌာန ခူန်၊ ဓါန်ခူန် ကောန်ကျောင်ကာည်း ကူန်ရဝ်မာဂါင် ကစုကပိုမ် (700)အီး ဟိုက်ရောတ်ဒေဲႈအောႏ။
#PSLF/TNLA
#တီုင်ပ္လေႈလေႈဆဒါင်
#ပ္လေါည်ပ္လိုတ်ဓါင်ပနော ဇီုင်းကည်းခူန်
Comment Lists