ဆီုက်ဘြာန်ဂဲ ဒါဂျဲတ်ဖိုက်တာ ကာည်း ပ္လေဘျုင် ရောတ်ဒေဲ;ပဲင်ဟာဝ်း ပလှံင်မာဝ်းႎံင်း
31 August 2024
ဆီုက်ဘြာန်ဂဲ ဒါဂျဲတ်ဖိုက်တာ ကာည်း ပ္လေဘျုင် ရောတ်ဒေဲ;ပဲင်ဟာဝ်း ပလှံင်မာဝ်းႎံင်း
ကုင်တအာင်း၊ ကျံရ်(8) ဆငည်း (31)
ကုင်တအာင်း ၊ အိူင်အိုမ်ယ်ုရ် ၊ အာဝ်းမိူဝ်ကတီုက်ကပဴင်မာ် ဆီုက်ဘြာန်ဂဲ ဒါဂျဲတ်ဖိုက်တာ ကာည်း ပ္လေဘျုင် ရောတ်ဒေဲ;ပဲင်ဟာဝ်း ပလှံင်မာဝ်းႎံင်းအောႏ။
အခိင်စူန်မှိူဝ် (11)နြီဒိူန် ဆီုက်ဘြာန်ဂဲ ဒါဂျဲတ်ဖိုက်တာ ရောတ်ဒေဲ;ပဲင် ခေဲင်လှံင်မာဝ်းႎံင်း ဇံင်(၁) ကဒါ, လူမ်ပလိတ် ကာည်း တပြောလူမ်တီုင်ဘြောင်ချှာင် အောႏ။ ဂေါ,ဆီုက်ဘြာန်ဂဲ ဒါဂျဲတ်ဖိုက်တာ ကာည်း ပ္လေဘျုင်ပဴင်ကဒါ, ဇံင်(၁)ပ္လေဒါင်းပဴင်ဆီုက်ဘြာန်ဂဲ စီဇော;ပဒူ; လံက်ဟာဝ်း ပရဝ်ပါင်ပေါဒဲ့ ကာည်း ဇံင်အူန်ကျင် တောပ်ဘိုးဂါင်ကူန်ရဝ်မာဂါင်လူလှဲဝ်ႏဟာဝ်း အာဝ်မိူဝ်ႈမတိုအီးယံမ်းအောႏ။
မိုးဘို ကျံရ်(8) ဆငည်း(27) အခိင်ရမှိူဝ်(11)နြီ ပလှံင်မာဝ်းႎံင်း ဇံင်(9) ကာည်း ဇံင်(2)နီန် ဂေါ,ဆီုက်ဘြာန်ဂဲ ဒါဂျဲတ်ဖိုက်တာ ကာည်း တာန်ဇံန်(500)ပိုင် ရောတ်ဒေဲ;ပဲင်ဟာဝ်း ပ္လေဒါင်းပဴင်ဆီုက်ဘြာန်ဂဲ စီဇော;ပဒူ; ခေဲင်ကျောင်ပနောဘေဲ, ခံန်ဇာရ် လံက်ဟာဝ်းဘို ကောန်အီမာည်း(1)အီးယံမ်း (2)အီးကတူႈဖေးဆဝ်းအောႏ။
အာဝ်းမိူဝ်ကတီုက်ကပဴင်မာ် ဂေါ,ဆီုက်ဘြာန်ဂဲ ဒါထာမီန် ကာည်း ပ္လေဘျုင် အယေင်ပဲင်ဟာဝ်းလို ဒီဂါည်ကူန်ရဝ်မာဂါင်ဘည်ဒီန် မိူဝ်ႈတိုအီးယံမ်း ကာည်း တိုအီးကတူႈဖေးဆဝ်း ဂီန်းအခည်း တောပ်ဘိုး ကျောင်စဝ်၊ ကျောင်ပနောဘေဲ,၊ ကျောင်ဖာဆာ ကာည်း ဂါင်လူလှဲဝ်ႏဟာဝ်းကိူည် ဆီုက်ဘြာန်ဂဲ တောန်ဆငည်း လူည်,ဟာဝ်းခေါပ်ပြာ,ဥပဒေဆီုက်ရာဇဝတ်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists