ပလှံင်အေဲမ်ကိုက် ဆီုက်ဘြာန်ဂဲ ဒါဂျဲက်ထမေန် ဒေဲႈပဴင်ဟာဝ်း ပ္လေထာန်ဇံန်(500) (4)လိူဝ်ႈ ကူန်ရဝ်မာဂါင် (5)အီးယံမ်း ၊ (4)အီးကတူႈဖေးဆဝ်
06 August 2024
ပလှံင်အေဲမ်ကိုက် ဆီုက်ဘြာန်ဂဲ ဒါဂျဲက်ထမေန် ဒေဲႈပဴင်ဟာဝ်း ပ္လေထာန်ဇံန်(500) (4)လိူဝ်ႈ ကူန်ရဝ်မာဂါင် (5)အီးယံမ်း ၊ (4)အီးကတူႈဖေးဆဝ်
ကုင်တအာင်း ၊ ကျံရ်(8) ဆငည်း(6)
ကုင်တအာင်း ၊ အိူင်အိုမ်ခြိုင်၊ ပလှံင်အေဲမ်ကိုက် အာဝ်မိူဝ်ႈမပဲန်ကတီုက်ကပဴင်ဘည်ဒီန်မာ် ဆီုက်ဘြာန်ဂဲ ဒါထမေန် ရောတ်ဒေဲႈပဴင်ဟာဝ်းပ္လေဘျုင် ကူန်ရဝ်မာဂါင် (5)အီးယံမ်း၊ (4)အီးကတူႈဖေးဆဝ် တောပ်ဘိုး ဆဲင်ခေဲင်က္လာႈ ကာည်း ဂါင်(5)ဂါင် ညားငံရ်ကဆူမ်းလူလှဲဝ်ဟာဝ်းအောႏ။
ဘည်မိုႈဘည်ဘာည်း ကျံရ်(8) ဆငည်း(5)ဒိူန်း ဆီုက်ဘြာန်ဂဲ ဒါထမေန်ကီင်ထာ့် ဒေဲႈပ်ုရ် ခေဲင်လှံင်အေဲမ်ကိုက် အခိင် စူန်အံပ်(3:05)မနေဲတ် (1)လိူဝ်ႈ ၊ ရောတ်(3:11)မနေဲတ် (1) လိူဝ်ႈ ၊ ရောတ်(3:20)မနေဲတ် (1)လိူဝ်ႈ၊ အခိင်(3:30)မနေဲတ်ဒီန် ဂဲဒါထမေန် ပဴင်ပ္လေလာက်နာက် ကာည်း ပ္လေဘျုင်ထာန်ဇံန်(500) ရောတ်ဒေဲႈပဴင်ဟာဝ်း (7)ပိုင်းအောႏ။
ဂေါႇဂဲပဴင်ပ္လေဘျုင်ဘည်ဒီန် ကဒည်ဒေင်လှံင်အေဲမ်ကိုက် အူဒီ၊ ခေဲင်က္လာႈလှံင်အေဲမ်ကိုက် ကာည်း စီဇောႈပဒူႈခေဲင်လှံင် ဂေါႇဘည်ဒီန် အီမာည်းအီဘဒေဲႈဆဲင်ကယ် (3)အီး ကာည်း ကူန်ရဝ်မာဂါင်အီဂေါည်ခေဲင်ကဒည်လှံင် (2)အီး ကစုကပိုမ် (5)အီး ယံမ်းဟာဝ်းပွံတ်အ်ုန်ဒီး၊ ဆာ်မိုႈ(4)အီး ကတူႈဟာဝ်းဖေးဆဝ်အောႏ။
ဆဲႈဒီန် ဂေါႇပ္လေဘျုင်ဇောႈပဒူႈဘည်ဒီန် လံက်ဟာဝ်း ဂါင်(5)ဂါင် ညားငံရ်ကဆူမ်းလူလှဝ် ကာည်း ဆဲင်အီဂေါည်ခေဲင်က္လာႈကဲဒီန်မာ် ညားငံရ်ကဆူမ်းဟာဝ်း PSLLF/TNLA ဖုင်အီပျံတ်ငံရ်လှံင်အေဲမ်ကိုက်ကဲ ပေါရောတ်ဒေပျံတ် ငံရ်စီယံတ်ဟာဝ်းအောႏ။
ယာမ်မိုႈ ကျံရ်(7) ခေဲင်ဆငည်း (27)ဒိူန်း ဘည်ဟောည်ႇဘိူန်း ဆီုက် MNDAA ကဲဒေဘြောင်ချှာင်ဟာဝ်း လှံင်ဆဲင်ဝီဒီန် ဆီုက်ဘြာန်ဂဲ ဒါထမေန် ရောတ်ဒေဲႈပဴင်ဟာဝ်း ပ္လေဘျုင် ဂေါႇပ္လေဘျုင် ဇောႈပဒူႈ လံက်ဟာဝ်း တိုအီရဝ်(7)အီးယံမ်း ဆဲႈဒီန်ဂေါည်ဂေါည်ဒါထမေန် ဒေဲႈ ပဴင်ဟာဝ်းပ္လေဘျုင် ခေဲင်လှံင်လာဝ်ကဲင်ဘည်ဒီန်အောႏ။
#PSLF/TNLA
#တီုင်ပ္လေႈလေႈဆဒါင်
#ဆဒါင်ပ္လေဲဝ်အခွါင်းအရေး
Comment Lists