တံပ်နာန်းတအာင်း TNLA ဘိူန်းဆီမ်းဟာဝ်း တံပ်ဆခါန်းဆီုက်ဘြာန် အီဂေါည်ပလှံင်မိုဂူႈပါဒိုႇဒိုည်ႇ
26 July 2024
တံပ်နာန်းတအာင်း TNLA ဘိူန်းဆီမ်းဟာဝ်း တံပ်ဆခါန်းဆီုက်ဘြာန် အီဂေါည်ပလှံင်မိုဂူႈပါဒိုႇဒိုည်ႇ
ဆဒါင်ကုင်တအာင်း၊ ကျံရ် (7) ဆငည်း (26)
လံပ်တီုက်နာန်း1027 ဒေါန်(2)
ကုင်တအာင်း၊ အိူင်အိုမ်ယ်ုရ်၊ ခည်မိုႈ ကျံရ်(7)၊ ဆငည်း(24) အခိင် စူန်အံပ်(5)နြီဒိူန် တံပ်အွံရ်ပ်ုန်လောတ်ကပီုန်တအာင်း PSLF/TNLAဂဲ အခိင်လီပ်တီုက်တံပ်ဆီုက်ဘြာန် ဘိူန်းဒေဆီမ်းဟာဝ်း တံပ်ဆခါန်းဆီုက်ဘြာန် အီဂေါည်ပလှံင်မိုဂူႈပါဒိုႇဒိုည်ႇ တံပ်ဆခါန်းလပခ၊ ခလရ(78၊88၊148) ဒီဂေါည်ဗျူဟာဒါင်းဂဲအောႏ။
တံပ်ဆခါန် အီဂေါည်ပလှံင်မိုဂူႈဂဲဒီန် တံပ်အွံရ်ပ်ုန်လောတ်ကပီုန်တအာင်း PSLF/TNLA လံပ်တီုက်နာန်း 1027 ခေဲင်ဒေါန်(2) ဇူႈကျံရ်(7)၊ ဆငည်း(25) ပဲန်ဟာဝ်းကတီုက်ကပဴင် ခေဲင်(4)နှား ရောတ် ကျံရ်(7)၊ ဆငည်း(24) အခိင်စူန်အံပ်(5)နြီဒိူန်း ဘယ်ပွံတ်ဒေဆီမ်းဟာဝ်း တံပ်ဆခါန်းဆီုက်ဘြာန်ဂဲ ပါဒိုႇဒိုည်ႇအောႏ။
ကဒါႇ လှံင်မိုဂူႈ(လံပ်က်ုတ်ဆငည်း)ဒီန်မာ် အီမိုႈ တံပ်ဆခါန်ဆီုက်ဘြာန် ဆျှိုည်မျဲတ်ဝူန်း၊ အေစေတီးကိုင်၊ အာကာမို၊ ဂေါင်ဒေါ်နာန်းစီ၊ ဗျူဟာကိုင်၊ ဆျှိုည်တာယာ၊ ပါင်ဆပေ ကာည်း ဖျူရောင်ကိုင်း တံပ်ဆခါန်းကဲဒီန် ခည်မိုႈကျံရ်(6) ဆငည်း(30)ဒိူန်း ဘိူန်းဒေလီပ်ဆီမ်းဟာဝ်းကတီးကရီးအောႏ။ ဆဲႈဒီန် ကဒါႇ လှံင်မိုဂူႈ(လံပ်လေႈဆငည်း)မာ် အခိင်ထီမ်းပဲန်ဟာဝ်းကတီုက်ကပဴင် မာန်တဲင်(5)တံပ်၊ တံပ်ဆခါန်းငရံမ်း၊ တံပ်ဆခါန်းရေကာန်၊ တံပ်ဆခါန်းတာဝါတဲင်၊ တံပ်ဆခါန်းကောင်မှူပတ္တမြား၊ ရဝ်ပါင်မထေက်၊ တာမ်ကဘေဲမ် ကာည်း တောႇဘိုတံပ်ပလိတ် ဌာနတောန်ဌာနပါဒိုႇဒိုည်ႇ ဘိူန်းဒေဆီမ်းကတီးကရီးအောႏ။
ပလှံင်မိုဂူႈဒီန် တံပ်ဆခါန်း လပခ ခြူမ်တီုင်တံပ် ခလရ-78၊88 ကာည်း ခလရ-148ဂဲ မိုႈအီဒေဲႈဂေါည် ခေဲင်လှံင်အူလှံင်ဒီန်အောႏ။
အခိင်တီုက် မိုဂူႈတံပ်ဆခါန်းဒီန် ကဒါႇ တီုင်တံပ်ဆီုက်ဘြာန်ဂဲ ဒါထမေန် ကာည်း ကစုကပိုမ် ဒါ Jet Fighter ပဴင်(21)လိူဝ်ႈ၊ ဒါY12 ပဴင်(9)လိူဝ်ႈ၊ ဒါပ္လေဒါင်းပဴင်(78)လိူဝ်ႈ ကာည်း ဒါပ္လေဒိုင်းပဴင် (18)ပိုင်းထာန်ဒီန်အောႏ။
ခေဲင်ကတီုက်ကပဴင်ဒီန် ပ်ုန်ဘိူန်းဒေဆီမ်း ဂြိုခြီုင်ဆီုက်ဘြာန်ဂဲ အ်ုန်တောပ် ဆနာတ်ဒါင်းဒီဒါပဴင်ပ္လေဒိုင်း၊ ဆနာတ်တောန်မျို (73)လံဝ်း၊ 120MM (2)လံဝ်း၊ 60MM (11)လံဝ်း၊ 81 MM(1)လံဝ်း၊ ငဂျင်းမီး(3)လံဝ်း၊ ပွိင်းဖိုက် (1)လံဝ်း၊ RPG(2)လံဝ်း၊ ဂျမ်းပါ(1)စူင်၊ ပ္လေဒိုင်း(4)ကဂေါႇ (1)လံဝ်း၊ မဲင်၊ ပ္လေဆနတ်တောန်မျို ကာည်း ဂြိုခြီုင်ဆီုက်တောန်မျို ဘိူန်းဒေဆီမ်းဟာဝ်းအောႏ။ ပလှံင်မိုဂူႈ အခိင်လီပ်ဆီမ်ဟာဝ်း ခေဲင်တံပ်ဆခါန်းဆီုက်ဘြာန်ဒီန် ဘိူန်းတိုည်း တိုးအီမ်းဆီုက်ဘြာန်ဂဲ (30)အီးလေႈ ကာည်း ဆနာတ်တောန်မျို(200)လေႈထာန်ဒီန်အောႏ။
တံပ်အွံရ်ပ်ုန်လောတ်ကပီုန်တအာင်းPSLF/TNLA + တံပ်ကပိုမ်ဂဲ အခိင်လီပ်တီုက် တံပ်ဆခါန်းဆီုက်ဘြာန် ခေဲင်လှံင်မိုဂူႈဒီန် ကဒါႇ ဆီုက်ဘြာန်ဂဲ ကယေင်ပဴင်လိူည်ဒီဂေါည် ကူန်ရဝ်မာဂါင် ဂေါႇဆီုက်ဘြာန်ဂဲ လီလာပဴင်ပ္လေဒါင်းဘည်ဒီန် လံက်ဟာဝ်း တိုအီးရဝ် ကောန်အီမာည်း(14)အီး၊ ကောန်အီပ်ုန်(8)အီး၊ ကောန်ဒဲႇ(9) ယံမ်းဟာဝ်း၊ (59)အီးကဲဒီန် ကတူႈဟာဝ်းဖေးဆဝ်းဒါင်း ကာည်း လံက်ဟာဝ်းဘိုး ကျောင်စဝ်(4)ကျောင် လူလှဲဝ်ဟာဝ်း ကာည်း ဂါင်(29)ဂါင် ငံရ်ကဆူမ်းဟာဝ်းအောႏ။
2024 ကျံရ်(7) ဆငည်း(24) လံပ်တီုက်နာန်း 1027 ဒေါန်(2)နီန် တံပ်အွံရ်ပ်ုန်လောတ်ကပီုန်တအာင်း PSLF/TNLA ဂဲ ခေဲင်လိူဝ်ႈအာရ်နီန် ဘိူန်းဒေဆီမ်ဟာဝ်း လှံင်မိုဂူႈကတီးကရီးအောႏ။
#PSLF/TNLA
#တီုင်ပ္လေႈလေႈဆဒါင်
#ဆဒါင်ဘိူန်းဒေဆီမ်းလှံင်မိုဂူႈ
#ဆဒါင်ပ်ုန်ဘိူန်းဒေဆီမ်းဂြိုခြီုင်
Comment Lists