ဂေါႇပ္လေဒါင်းပဴင် ဆီုက်ဘြာန်ကဲ ဇောႈပဒူႈ တိုအီးရဝ် (3)အီးယံမ်း၊ (9)အီး ကတူႈဖေဆဝ်း
17 July 2024
ဂေါႇပ္လေဒါင်းပဴင် ဆီုက်ဘြာန်ကဲ ဇောႈပဒူႈ တိုအီးရဝ် (3)အီးယံမ်း၊ (9)အီး ကတူႈဖေဆဝ်း
ဆန်ုမ်2024၊ ကျံရ်ပူရ် ဆငည်း (17)
ကုင်တအာင်း၊ ခေဲင်တီုင်တံပ်ဒါင်း(6)၊ (2) ဂေါႇပ္လေဒါင်းပဴင်ဆီုက်ဘြာန်ကဲ ဇောႈပဒူႈ တိုအီးရဝ် (3)အီးယံမ်း၊ (9)အီး ကတူႈဖေဆဝ်းအောႏ။
ခည်မိုႈ ဆငည်း (12) အခိင်စူန်အံပ် (4:30)မနေတ်ဒိူန်း ပ္လေဒါင်းစီဇောႈပဒူႈ ခေဲင်လှံင်လာဆဝ် ဇံင်(4) တပြောကျောင် အ.ထ.က ဂေါႇဘည်ဒီန် လံက်ဟာဝ်း တိုအီးရဝ် (3)အီး ယံမ်းဟာဝ်းပွံတ်အောႏ။
ဆဲႈဒီန် ဆငည်းဒိူန်းမာ် ပလှံင်လာဆေဝ် ဇံင် (2) ကာည်း ဇံင် (10) ဒီန် ဂေါႇပ္လေဒါင်းဇောႈပဒူႈလံက်ဟာဝ်း တိုအီးရဝ် အီဂေါည်ခေဲင်ဇံင်ကဲဒီန် (5)အီး ကတူႈဖေဆဝ်း ကာည်း ခေဲင်ဇံင် (1)မာ် ဂေါႇပ္လေဒါင်းဇောႈပဒူႈ ဂါင်အူဂါင် ညားငံရ်ကဆူမ်းဟာဝ်းအောႏ။
မိုႈဘိုး တပြောလှံင်မာဝ်းဝံင်း ပရဝ်မာန်ခဲဒီန် ဂေါႇပ္လေဒါင်းဇောႈပဒူႈ ကောန်ဒဲႇ အဆာက် ထာန်(10)ဆန်ုမ် (2)အီး ကာည်း ကောန်အီမာည်း (2)အီး ညားပ္လေဒါင်းလံက် ကတူႈဟာဝ်းဖေဆဝ်းအောႏ။
ကတီုက်ကပဴင် ခေဲင်(19)ဆငည်းနီန် ဆီုက်ဘြာန်ဂဲ ဒါထမေန်ကယေင်ပဴင် ကူန်ရဝ်မာဂါင် ကာည်း ဂေါႇပ္လေဒါင်းပဴင်ဆီုက်ဘြာန်ဂဲ တိုအီးရဝ် (61)ယံမ်းဟာဝ်း ၊ (91)အီး ကတူႈဟာဝ်းဖေဆဝ်းအောႏ။
#PSLF/TNLA
#တီုင်ပ္လေႈလေႈဆဒါင်
#ဆဒါင်ပ္လေဲဝ်အခွါင်းအရေး
Comment Lists