ဂေါ, ကြာ,ဟယ်အူတို တော,ဟိုက်တော,လေ;ဒေဒူ;တိုအီး အူအီးယံမ်း (19)အီးကတူ;ဖေးဆဝ်း
26 June 2024
ဂေါ, ကြာ,ဟယ်အူတို တော,ဟိုက်တော,လေ;ဒေဒူ;တိုအီး အူအီးယံမ်း (19)အီးကတူ;ဖေးဆဝ်း
ဆန်ုမ်2024၊ ကျံရ်တောရ်၊ ဆငည်း25
ကုင်တအာင်း၊ အိူင်အိုမ်တမာဝ်း၊ လှံင်မူစယ်၊ ရဝ်မိူင်းယု(105)လှံက် . ဂေါ,ကြာ,ဟယ်အူတို တော,ဟိုက်တော,လေ; ဒေဒူ;တိုအီး ကောန်အီပ်ုန်အူအီးယံမ်း (19)အီးကတူ;ဖေးဆဝ်းအောႏ။
ကျံရ်တောရ်၊ ဆငည်း22 စူမ်အံပ်ဒိူန်း ကဲတံင်ဒေဒိူန်းကြာ,ခေဲင်ကားအူကြော ဂေါ,မို; ကြာ,ဒီန် ဘိူန်းဒေဒဲဝ်လေ; တော,ဟိုက်တော,လေ;ဒေဒူ;တိုအီး ခေဲင်ရဝ်အောႏ။
ဆဲ;ဒီန် ယာကျာအေ အ်ုန်အီးဂေါည် ဇံင်(3) အဆာက်(52)ဆန်ုမ် ဂေါ, ကြာ, ဒူ;ကအာင်းပျာ်ည်, ကာည်း ပါင်အိူဝ့်အ်ုန် ကတူ;ဆဝ်းဒါင်း တိုန်းဟိုက်ပယုင်ဆနံမ်း လှံင်အေဲမ်ကိုက်မာ် ရောတ်ခီညာ ယံမ်းဟာဝ်းအောႏ။
ကြာ,ဟယ်အူတို တော,ဟိုက်တော,လေ; ဒေဒူ;တိုအီး(3)ဒိူန်း ကတူ;ဖေးဆဝ်းဒါင်း လံက်ဟာဝ်း ကအာင်းပျာ်ည်,၊ ကအာင်းဂါ,၊ ကဒူ,ကဆံင်း ကာည်း ပါင်အိူဝ့် တိုန်းဟိုက်ဆနံမ်း ပယုင်ဆနံမ်းလှံင်အေဲမ်ကိုက်အောႏ။
ဆာ်မို; ကဲကတူ;ဆဝ်း ပဘ္လဲဝ်း ကာည်း တည်း ဒိူန်း (16)အီးဒီန် တိုန်းလိူည်ကဲဟိုက် လူမ်ဆနံမ်းဖုင်ကဇောည်ကူန်ရဝ်မာဂါင်(ကြက်ခြေနီ )မိူင်းယု(105)လှံက်အောႏ။
ကနာည်နံင်ဘိူန်းဆနံမ်း ကဲအီးကတူ; ကြာ,ဒူ; ကာည်း အီယံမ်းဟာဝ်းဒီန် PSLF/TNLAဖုင်ဒံန်ခြဲတြားဥပဒေဂဲ ကာည်း ကငျားကြာ,ဒိူန်း ရေဲန်ထိဝ်းအူန်အောႏ။
#PSLF /TNLA
#တီုင်ပ္လေႈလေႈဆဒါင်
Comment Lists