ဆဒါင် PSLF/TNLA ဂဲ ရေဲန်ဟာဝ်း ပ္လေါည်ဝိူဝ်; ကျောင်အရေးတီုင်ကုင် လိူဝ်;(2)
22 April 2024
ဆဒါင် PSLF/TNLA ဂဲ ရေဲန်ဟာဝ်း ပ္လေါည်ဝိူဝ်; ကျောင်အရေးတီုင်ကုင် လိူဝ်;(2)
ဆန်ုမ်2024၊ ကျံရ်ဖိုန် ဆငည်း (22)
ကုင်တအာင်း၊ အိူင်အိုမ်ယ်ုရ်၊ ဒီလှံင်အိုမ်ယ်ုရ်အူဒီ ခည်မို; ကျံရ်ဖိုန် ဆငည်း (20) ဒိူန်း တံပ်အွံရ်ပ်ုန်လောတ်ကပီုန်တအာင်း PSLF/TNLA ဂဲ ရေဲန်ဟာဝ်း ပ္လေါည်ဝိူဝ်; ကျောင်အရေးတီုင်ကုင် လိူဝ်;(2)အောႏ။
ကဲအီဟိုက်ရောတ်ဒေဲ;ပ္လေါည်ဝိူဝ်; ကျောင်အရေးတီုင်ကုင်ဒီန် မို; တံပ်အွံရ်ပ်ုန်လောတ်ကပီုန်တအာင်း PSLF/TNLA ဂေါပ်တားချှာင်ဇီုင်းကာန်တောန်နဲ (2) ခူန်အွံရ်ဒါင်း တားပါင်လ၊ တာမ်တားတီုင်ဘြောင်ချှာင် တာမ်ခူန်အွံရ်ဒါင်း တားအစော် ကာည်း ခူန်၊ဓါန်ခူန်ဂဲ ကောန်ကျောင် ကပိုမ် (27)အီး ကာည်း ကူန်ရဝ်မာဂါင် ကစုကပိုမ် (250)အီး ဟိုက်ရောတ်ဒေဲ;အောႏ။
ခေဲင်ပ္လေါည်ဝိူဝ်;ကျောင်အရေးတီုင်ကုင်ဒီန် အ်ုန်အီမို; ဂေါပ်တားချှာင်ဇီုင်းကာန်တောန်နဲ(2) ခူန်အွံရ်ဒါင်း တားပါင်လ ဟိုက်တံမ်းကြော;ဒါ;” ကျောင်အရေးတီုင်ကုင်နီး နံင်ဖီုက်လျံင်အိုမ်ဘဲ ဘည်ဘြောင်ချှာင်၊ နံင်ဘယ်ဒေဆမားကကာ;ကဆာင်းဇီုင်းကာန်၊ ခေဲင်တီုင်ဌာန ကနာည်နှာင်ဘယ်ဒေရေဲန်ဟာဝ်း ဇီုင်းကာန်ကတီးကရီး ဘည်ကဲနီန် က္လာင်းဟာဝ်း အ်ုန်အရေးဒါင်းပွံတ်အခည်းအောႏ။
ကောန်ကျောင်အီဟိုက်ဒေဲ; ကျောင်အရေးတီုင်ကုင်အူအီး စီက္လာင်း ဘည်မို;ဘည်ကယေင်ဒေဲ;ဟိုက်ကျောင် နီန် စီဒါ;” ပိင်ငျာပ်ုန်နံပ် ပ်ုန်ဘိူန်း ခေဲင်ကျောင်အရေးတီုင်ကုင်နီန် ကနာည်ခေဲင်ကုင်တအာင်း နံင်ပိင်ငျာကတာရ်;ဒါင်းဇာရ် နံင်ရီန်းရဲတ်ဒေ ကဇောည်ငိူပ်မေန်းဟာဝ်းဘည်ကဲဒီန်အောႏ။
ပ်ုန်ကယေင်ဒေဝိူဝ်;ဟာဝ်း ကျောင်အရေးတီုင်ကုင်နီးမို; နံင်မိူဝ်;အီဘယ်ဒေဆောအွံရ် ဘည်ကဏ္ဍအရေးတီုင်ကုင်၊ ကဏ္ဍဘြောင်ချှာင် ကာည်း PSFL/TNLA ကဏ္ဍဌာနတီုင်တောန်ဌာန၊ ခြိူဝ်းမျိုးတအာင်းတောန်အီး ကာည်း ကနာည် PSFL/TNLA နံင်မိူဝ်;အီဘယ်ဒေဆောအွံရ်အရေးတီုင်ကုင်၊ နံင်မိူဝ်;အီဘယ်ဒေဆောအွံရ်ရေဲန်ဇီုင်းကာန်တောန်နဲ ၊ ကနာည်နံင်မိူဝ်;ဒေဲ; အီဘယ်ဆောအွံရ် လံပ်လည်ကလာ, ကာည်း ကောန်ဆီုက်အီလီပ်ထာမ်းဇီုင်းကာန် ခေဲင်ဖုင်အယ် နံင်မိူဝ်;အီဘယ်ဒေတဂေန်ဘည်မို;အရေးတီုင်ကုင်၊ ဘည်ဖီုက်လျံင်နံင်ဘယ်ဒေတဂေန် စီပဲန်ဒေဝိူဝ်;ဟာဝ်း ကျောင်နီန်အောႏ။
#PSLF/TNLA
#တီုင်ပ္လေႈလေႈဆဒါင်
Comment Lists