28 March 2024

ဆဒါင် တားတီုင်အွံရ် PSLF/TNLAဂဲ ဟာဝ်းကတူ;ကငျာ ရေဲန်ပါင်ကမိုန်တောပ်  ကူန်ရဝ်မာဂါင် ပလှံင်အိုမ်ငျံရ်

ဆန်ုမ်2024၊ ကျံရ်(3)၊ ဆငည်း(19)

     တံပ်အွံရ်ပ်ုန်လောတ်ကပီုန်တအာင်းPSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်ကျော် ခည်မို; ကျံရ် (3)  ဆငည်း (18) ဒိူန် ဟာဝ်းကတူ;ကငျာ ရေဲန်ပါင်ကမိုန်တောပ် ကူန်ရဝ်မာဂါင် ပလှံင်အိုမ်ငျံရ်အောႏ။

     ပါင်ကတူ;ကငျာဒီန် ကဲရေဲန်ဟာဝ်း ပလှံင်အိုမ်ငျံရ် ဇံင်ပါင်ဟာည်, ဒီဓှါင်းဂါင် ဂဲအီဟိုက်ရောက် ပါင်ကမိုန်ဒီန် မို; တံပ်အွံရ်ပ်ုန်လောတ်ကပီုန်းတအာင်း PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်ကျော် တားတီုင်ဘြောင်ချှာင် ခူန်အွံရ်ချု တားဂူရ်;ဇာရ် ၊ တာမ်တားတီုင်ဘြောင်ချှာင် တာမ်ခူန်အွံရ်ဒါင်း တားအိုက်ကျော်၊ မို;ဘိုး ဂဲအီရံပ်ဇီုင်းကပ္လိူင် အရာပ်အရာ ကာည်း အီရံပ်ဇီုင်းဘြောင်ချှာင် ခေဲင်လှံင်အိုမ်ငျံရ်ပါဒို,ဒိုည်,အောႏ။

     ခေဲင်ပါင်ကတူ;ကငျာဒီန် တံပ်အွံရ်ပ်ုန်လောတ်ကပီုန်းတအာင်း PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်ကျော် စီကဘ္လာင်းဆာင်လာင်းဟာဝ်း ဘည်ဓိူဝ်; ဘဝ်ကီုဝ်ဒါင်း (3)စူမ်း တလံပ်တီုက်နာန်းကတီုက်ကပဲင်၊ လောင်ဘည်ဒါ မူဝါဒပေါ်လစီ PSLF/TNLA၊ လောင်ဘည်နံင်ဆီုပ်ရေဲန်ဟာဝ်း လံပ်ပိင်ငျာခေဲင်လှံင်ငျံရ်၊ ဇီုင်းကာန်လံပ်ခေါခါ,၊ ဇီုင်းကာန်အရာပ်အရာဟိုက်ဇာရ်၊ ဘည်ဘာည်းလံပ်ကတူည်,ဒေင် ကာည်း နံင်ရီန်းရဲတ်ဒေရေဲန်ဟာဝ်း ကနာည်ဇီုင်းကာန် အခွါင်းအရေးတကူန်ရဝ်မာဂါင်ဂဲအောႏ။

     ပ်ုန်ဘိူန်း PSLF/TNLA တဒေဆီမ်းကတီးကရီး ခေဲင်လှံင်အိုမ်ငျံရ် ၊ လှံင်ရူကော ကာည်း လှံင်အိုမ်ယ်ုရ်ကဲနီန် ခည်မို; ကျံရ်(3) ဆငည်း(4)ဒိူန်း ဆီုက်ဘြာန်ဂဲ စီဓီရ်ထူက်ပြံတ်လေ;ပ္လါ,ဘေဲ, ဒါ;ဒေနံင်ဝီရ်ဘြောင်ချှာင်ဆီုက် ခေဲင်လှံင်(3)လှံင်နီန် ဂေါ,မို;ဘည်ဒီန် ကူန်ရဝ်မာဂါင်ဂဲ မိူဝ်;နော;ယောဟာဝ်းအောႏ။

     ဆဲ;ဒီန် တံပ်အွံရ်ပ်ုန်လောတ်ကပီုန်းတအာင်း PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်ကျော် ကဘ္လာင်းဆာင်လာင်းဟာဝ်း လောင်ပ္လါ,ဘေဲ, ပ်ုန်ထူက်ပြံတ်လေ; ဆီုက်ဘြာန်ဂဲ ဘည်မှောနံင်ဘာည်းဒေဲ;၊ က္လာင်းဟာဝ်းဘိုး လောင်ပ်ုန်ထီပ်ပ်ုန်ညဲ့ နဘာည်း ဆီုက်ဘြာန်ဂဲ တေဲင်ကူန်ရဝ်မာဂါင်ကဲနီန်မာ် တေဲင်အနေအယ် ကူန်ရဝ်မာဂါင်ဂဲတောန်အီး လိုအူန်းဆတိ ဆေဆေ တောန်အခိင်ခါအောႏ။

     ဟောည်,ဒီန် PSLF/TNLA တားတီုင်ဘြောင်ချှာင် ခူန်အွံရ်ချု တားဂူရ်;ဇာရ် ကဘ္လာင်းဆာင်လာင်းဒါ;” ခေဲင်လှံင်အိုမ်ငျံရ် နံင်ရီန်းရဲတ်ဒေဘြောင်ချှာင်ဟာဝ်း တောပ်လိူည် ဘည်ယန္တရား  PSLF/TNLA ကာည်း ခံပ်ကယည် ကနာည်နံင်ဘည်ဒေဓီရ်ဘြောင်ချှာင်ဟာဝ်း ကတီးကရီးအောႏ။

     ခေဲင်ပါင်ကတူ;ကငျားဒီန် ခူန်ချု တားဘုင်ကျော် ကာည်း ခူန်အွံရ်ချု တားဂူရ်;ဇာရ် ကဘ္လာင်းဆာင်လာင်း တဂဲအီမို; ကောန်တီုင်ကုင် အီရံပ်ဇီုင်း ဖုင်ထုင်ရိုးဘိုးဇေန် ကာည်း ပ်ုန်လိုကူန်ရဝ်မာဂါင် ဂဲအီဂေါည်ခေဲင်လှံင်အိုမ်ငျံရ် ဘည်လိူည် လောင်ဘ္လံက်လှူပ်တြားဥပဒေ၊ ကနာည်းဇီုင်းကာန် မိူဝ်;အကျိုးကူန်ရဝ်မာဂါင်၊ ဇီုင်းကာန်ပရဟိတတောန်မျိုး ကာည်း ဆမွံတ်ဟာဝ်း ပ်ုန်ဆိင်နံပ်၊ ဒဲ;ဟာဝ်းခံင်ကျခံင်လကဲနီန်အောႏ။

     ခေဲင်ပါင်ကတူ;ကငျားဒီန် ကူန်ရဝ်မာဂါင် ဝါဝည်းကောန်တီုင်ကုင် ခြိူဝ်းမျိုးဆျံမ်၊ ခါင်း၊ ချင်း၊ ကရေင်၊  ဘြာန်၊ လီဆူ၊ ဂေါ်ရခါး၊ ခယ် ကာည်း ကူန်ရဝ်မာဂါင်  ကစုကပိုမ်ဂေါည်(300)အီး ဟိုက်ရောက်ဒေဲ;အောႏ။

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း