10 October 2024

ဆဒါင် PSLF/TNLA တီုင်ဒံန်ခြဲတြားဥပဒေဂဲ ရေဲန်ဟောည်ႇဟာဝ်း  ဝါင်ပနော ပ္လံက်တံင်ဇူႈပလိက် လိူဝ်ႈ(5) ၊ ခူန်ချု တားဘုင်စော် က္လာင်းကြောႈ  တံမ်းဒါႈ ခေဲင်ကုင်အယ်တအာင်း လိုရီန်းရဲတ်ရေဲန်ဇီုင်းကာန် လံပ်ဒံန်ခြဲတြားဥပဒေ

ဆန်ုမ်2024၊ ကျံရ် (10) ဆငည်း (10)

ကုင်တအာင်း၊ ဒီဘြောင်ချှာင် PSLF/TNLA အူဒီ  ယာမ်မိုႈ ကျံရ်တီမ် ဆငည်း (8)ဒိူန်း တီုင်ဒံန်ခြဲတြားဥပဒေကဲ ရေဲန်ဟောည်ႇဟာဝ်း ဝါင်ပနော ပ္လံက်တံင်ဇူႈပလိက် လိူဝ်ႈ(5)အောႏ။

ဝါင်ပနောဒီန် ကဲဇူႈ အခိင် ခိညှာ (9)နြီ ရောတ် ကဒည်ဆငည်း (12)နြီ ရေဲန်ဟောည်ႇဟာဝ်း အီရောတ်ဒေဲႈမိုႈ PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်စော်၊ တားတီုင်အွံရ်တီုင်ဘြောင်ချှာင် ခူန်အွံရ်ချု တားဂူႈဇာရ် ကာည်း ကာ်မ်မတီတီုင်ဒါင်းပလိက် ခူန်အွံရ်ဒါင်း တားကုင်ခြီရ်ဂဲ ဟိုက်ရောတ်ဒေဲႈ တံမ်းကြောႈက္လာင်းအောႏ။

PSLF/TNLA တားချှာင်ဇီုင်းကာန်တောန်နဲ ခူန်ချု တားဘုင်စော် က္လာင်းကြောႈတံမ်းဒါႈ” ခေဲင်ကုင်အယ်တအာင်း လိုရီန်းရဲတ်ဒေရေဲန်ဇီုင်းကာန် လံပ်ဒံန်ခြဲတြားဥပဒေ၊ လိုငိူပ်မေန် ကူန်ရဝ်မာဂါင်ကဲ ဇောမ်အူဇောမ် ဥပဒေပ်ုန်ဘ္လံက်ချပ္လေႈအူန်းအယ် ၊ အယ်မာ်လိုကျိုးကျားဒေဇောမ်ဥပဒေ ပ်ုန်ဘ္လံက်ချအူန်း ကာည်း လိုဒံန်ခြဲငိူပ်မေန် လံပ်ဘ္လီုက်လှူပ် ကူန်ရဝ်မာဂါင်ဂဲအောႏ။

ဝါင်ပနောပလိက်ဒီန် အ်ုန်လှေဟာဝ်း (4)ပကျံရ် အီမိုႈ တားဆြာအီလီပ် CDM ဂဲ ပနောဒဲႈဖာဆာ ကပိုမ် (26)နဲ။ ခေဲင်ဝါင်ပနောဒီန် ကဲပနောဟာဝ်း ခေါြပာႇဘည်ပ်ုန်လိုဇောမ်ပလိက်၊ တီုင်ရျံရ်ႈဒံန်ခြဲတြားဥပဒေ၊ လောင်အီဒဲႈတာမ်အီုင်ဂ္လံတ်၊ လောင်တြားမမှု၊ လောင်တာမ်ဆံက်ဆေဥပဒေ၊ အမှုအီုင်ဂ္လံတ်ပ်ုန်လူည်ႇဥပဒေထုင် ကာည်း ပနောဟာဝ်းဘိုး ဖာဆာဇီုင်းကာန်အီးဟံရ်ကဲနီန်အောႏ။

ခေဲင်ဝါင်ပနောဒီန် ကောန်ကျောင်ကဲအီဟိုက် ကောန်အီမာည်း ဂေါည် (90)အီး၊ ကောန်အီပ်ုန် ဂေါည်(45)အီး ကစုကပိုမ် (135)အီး အံင်ဒိုႇတောန်အီး။ ခေဲင်ကုင်အယ်တအာင်း ဆိင်ရအာည်ႇနီန် နံင်အယ်ဘယ်ဒေကပါ်ႇကပံန် ဇီုင်းကာန် ဒံန်ခြဲတြားဥပဒေ ကဲအီရံပ်ဇီုင်းကပ္လိူင် အိူင် ကာည်း လှံင်ကဲ နံင်တိူဝ်ႈဇီုင်းရံပ်လာည်းဟာဝ်းအောႏ။

ဝါင်ပနောဒီန် PSLF/TNLAတားဒါင်းအယ်ဂဲ၊ ကူန်ရဝ်မာဂါင်၊ တားဆြာ ကာည်း ကောန်ကျောင် ကစုကပိုမ် (150)အီးလေႈ  ဟိုက်ရောတ်ဒေဲႈအောႏ။

#PSLF/TNLA

#တီုင်ပ္လေႈလေႈဆဒါင်

အာ၀်နံပ်ဇီု၀်တိုအီး

ဘိူန်းတိူရ်

Comment

Comment Lists

ဘည်တိူရ်;လိူရ်;ယိူ၀်းမည်း