သီပေါတွင် ဘုန်းကြီးကျောင်းဆောင်တစ်ဆောင် မီးလောင်မှုဖြစ်ပွား
23 April 2025
သီပေါတွင် ဘုန်းကြီးကျောင်းဆောင်တစ်ဆောင် မီးလောင်မှုဖြစ်ပွား
သီပေါ၊ ဧပြီလ ၂၃ရက်
တအာင်းပြည်သတင်း
တအာင်းပြည်၊ တပ်မဟာ (၂)နယ်မြေ၊ သီပေါမြို့၊ အုတ်ကျင်းရပ်ကွက်ရှိ ဘုန်းကြီးကျောင်းဆောင်တစ်ဆောင် မီးလောင်မှုဖြစ်ပွားခဲ့သည်။
ဖြစ်စဉ်တွင် ဧပြီလ (၂၁)ရက် ည (၉း၄ဝ)နာရီအချိန်တွင် မဟာမြတ်မုနိဘုန်းကြီးကျောင်းအတွင်းရှိ ကျောင်းဆောင်တစ်ခုတွင် သာမဏေများသည် ဘုရားရှိခိုးချိန် ဖယောင်းတိုင်များကို မီးထွန်းထားခဲ့ပါသည်။
ထို့နောက် ထွန်းထားသည့်ဖယောင်းတိုင်တစ်တိုင်သည် လှဲကျပြီး မီးစတင်လောင်ကျွမ်းသွားခဲ့ခြင်းဖြစ်သည်။ ၎င်းမီးလောင်မှုကြောင့်ကျောင်းအတွင်းပစ္စည်းများ မီးလောင်ကျွမ်းခဲ့ပြီး စုစုပေါင်းကာလတန်ဖိုး သိန်း (၄ဝ)ကျော် ဆုံးရှုံးသွားခဲ့သည်။
အဆိုပါ မီးလောင်မှုဖြစ်ပွားခဲ့သည့်နေရာကို ပလောင်ပြည်နယ်လွတ်မြောက်ရေးတပ်ဦး PSLF/TNLA ၏ မီးသတ်တပ်ဖွဲ့၊ အုပ်ချုပ်ရေးအဖွဲ့၊ ရဲတပ်ဖွဲ့နှင့် ပြည်သူလူထုတို့မှ ဝိုင်းဝန်းပြီး မီးငြိမ်းသတ်ခဲ့ပါသည်။
အလားတူ ပြီးခဲ့သည့် ဧပြီလ (၄)ရက်လည်း ကွတ်ခိုင်မြို့၊ ရပ်ကွက် (၅)ရှိ နေအိမ်တစ်အိမ်တွင်ဝါယာကြိုးရှော့ဖြစ်ရာမှ နေအိမ် (၂)လုံး မီးလောင်မှုဖြစ်ပွားခဲ့ပါသည်။
#PSLF/TNLA
#သတင်းနှင့်ပြန်ကြားရေးဌာန
မှတ်ချက်များ